ياريت حد من المحاسبين يفهمنى

**hussein** · 08-07-2010 02:19 PM

كنت عايز اعرف ازى البنوك بتكسب من خلال برامج تمويل السيارات بمعنى
انا مثلا هجيب عربيه بضمان وديعة فى البنك ( انا مليش و ديعة و لا حاجة و مبتعملش غير مع بنوك اسلاميه و مش بناقش الحلال و الحرام)
الوديعة مثلا 100 الف بفائدة 9%سنويا
البنك بيدفعلى لحد 90 الف بفائدة 7.5 % سنويا
التقسيط مثلا 5 سنوات
انا كده كل سنه هيجيلى فائدة 9 الاف جنيه
و هدفع فايدة 6750 جنيه فى السنه
يبقى البنك ازاى بيكسب
ياريت حديكو فاهم و يشرحلى بالتفصيل

**Medo.Malek** · 08-07-2010 04:12 PM

اعتقد البنك بيكسب من استثمار مبلغ الوديعة نفسه (100الف)

**hussein** · 08-07-2010 04:23 PM

طب ماهو هيدينى 90 الف جنيه فى ايدى!!!!

**o.boshra** · 08-07-2010 04:43 PM

1: الوديعه فائدتها مركبه لانك مش هتصرف كل شهر فى الغالب هتكون مرتين فى السنه وحتى لو كل شهر هو كده ضمن وجود المبلغ بالكامل فى البنك طول فتره القرض .
2: القرض لايخصم بالتساوى كما هو الظاهر لديك و لكن هو يبدا بفائده حوالى 14 % متناقصه يعنى لو مبلغ القرض 120000 على 60 شهر يبقى يعنى هتدفعهم 165000 / 60 = 2750 هتفتكر كده ان 2000 من اصل القرض و 750 فايده لا .
هى 1350 من اصل القرض و ( 120000 * 14% / 12 شهر )1400 فايده وكل شهر تقل الفائده ويزيد نسبه اصل القرض

هى طبعا شرح للفكره وليست الارقام اكيده

**MMamdouh** · 08-07-2010 04:59 PM

المشاركة الأصلية كتبت بواسطة o.boshra

1: الوديعه فائدتها مركبه لانك مش هتصرف كل شهر فى الغالب هتكون مرتين فى السنه وحتى لو كل شهر هو كده ضمن وجود المبلغ بالكامل فى البنك طول فتره القرض .
2: القرض لايخصم بالتساوى كما هو الظاهر لديك و لكن هو يبدا بفائده حوالى 14 % متناقصه يعنى لو مبلغ القرض 120000 على 60 شهر يبقى يعنى هتدفعهم 165000 / 60 = 2750 هتفتكر كده ان 2000 من اصل القرض و 750 فايده لا .
هى 1350 من اصل القرض و ( 120000 * 14% / 12 شهر )1400 فايده وكل شهر تقل الفائده ويزيد نسبه اصل القرض

هى طبعا شرح للفكره وليست الارقام اكيده

+1

الفائدة المتناقصة دى خدعة كبيرة جدا و اعتقد ان اللى اخترعها واحد يهودى ابن يهودى

باختصار شديد انت فعلا حتدفع فايدة 7.5 فقط على الفلوس اللى اقترضتها... و مش هى دى اللعبة... اللعبة انك لما تدفع اول قسط بيعتبر القسط دة سداد للفوايد اللى عليك اولا و لو فضل حاجة بيعتبر سداد لاصل القرض...

بالتالى مبلغ القرض الاساسى بيقل حاجة بسيطة جدا فى بداية مدة القرض لان معظم القسط بيروح فى سداد الفوائد المتلتلة اللى عليك... و طبعا الشهر الى بعدة بيبقى عليك فوايد متلتلة الا 3 جرام و هكذا.... و القصة دة بتنعكس على تصفية القرض برضة... يعنى لو جيت تدفع كل مديونيتك بعد سنة من القرض مثلا حتلاقى نفسك دافع مبلغ كبير جدا فوق ما انت كنت متخيل... برضة دة راجع لان معظم التسديدات اللى عملتها كنت بتغطى الفوائد و حاجة بسيطة من اصل القرض

لو انت عايز تعمل المقارنة بتاعت القرض و الوديعة يبقى تحسب اجمالى الفوائد اللى حتدفعها كام و تنسبها لاصل المبلغ و تطلع النسبة اللى هى تعتبر هنا flat rate interest... ساعتها حتلاقى نسبة محترمة تغطى فوائد الوديعة بتاعتك مرة و نص مستريح

ملحوظة: اول مرة اجاوب على سؤال فى مجال دراستى منذ انضمامى للمنتدى

MMamdouh

**ابو ليلى** · 08-07-2010 05:09 PM

حصل معايا نفس الموقف قلى هديك الفلوس فى ايدك وانت اشترى العربية ولما سالت عرفت انه كده معناه انى باخد قرض بضمان الوديعه

وهما بيخدو فائدة على القرض وبتعتبر عملية منفصلة تماما عن الوديعه انا مثلا باخد عائد من الوديعه

11% وبصرف العائد كل 3 شهور وهو هياخد 13.5% فائدة القرض شهريا والفرق هو ده مكسبه

انا الوديعه فى البنك الاهلى ووقتها من اربع شهور مكنوش بيتعملو مع تمويل السيارات

انما من قيمة اسبوعين تقريبا قريت انهم فتحو الباب لتمويل السيارات وبضمان الوديعه كمان وده بتكون الفايدة اقل شى تقريبا 6%

البنوك شغله الشاغل القروض لان ده اللى بيكسب من وراه .

**fady.bekatcho** · 08-07-2010 06:14 PM

بص انا هشرحلك الفكرة علشان انا عامل الحوار دة وهقول السبب الى خلانى اعملة

احنا عندنا وديعة متهيالى فى البنك الاهلى ب 80 الف

تمام كدة
انت ينفع تاخد قرض بضمانها والقرض بيبقى 80% من قيمة الوديعة
يعنى احنا خدنا القرض ب 64 الف

الوديعة فوائدها 10 %

والبنك مش لزمنى بشروط ولا مدة ولا قسط شهرى

مكسب البنك فين بقى
البنك اولا بياخد فوائد الوديعة يعنى يعنى بياخد ال10% كاملين وبياخد كمان 1% زيادة ودى انا بدفعها مع الاقساط
غير طبعا عمولة البنك والكلام دا كلة

فالبنك كسبان كتير مش زى ما انت متخيل

بس انا الى خلانى اعمل كدة ان الحمدلله انا خلاص بقيلى 4 الاف فى القرض اخلصة وابقى سددة فى سنتين بس
يعنى العربية وقعت عليا اقل بكتير من انى اجبها تقسيط عربيات

**ابو ليلى** · 08-07-2010 06:15 PM

المشاركة الأصلية كتبت بواسطة hussein

طب ياجماعة بصو معايا على المثال دا مثلا
انا هحط 100 الف جنيه فى البنك بفائدة 9 % لمدة 5 سنين
هاخد قرض 90 الف بفائدة 7.5 % على 5 سنين بردو
هدفع ال 90 الف دول = 90 * 5 سنين * 7.5 % = 123.750
يعنى كل شهرهدفع 2062 جنيه
بعد 44 شهر هاكون سددت ال 90 الف جنيه كلهم (حوالى 4سنين الا ربع) وهكون لسه مسددتش حاجة من فوائد القرض اللى هى 33 الف جنيه تقريبا
و فى نفس الوقت الوديعة هتكون عملت ارباح 33 الف جنيه ( دا بفرض كمان انى بسحب الفلوس مش بسبها)
ممكن ساعتها اسدد المتبقى عليا كاش و اكون مخسرتش حاجه خالص او اسدد ال 33 الف دول بالتقسيط اللى هما ال 2062 على ال 14 شهر اللى باقيين لا و كمان هاخد فوايد الوديعة
يبقى البنك بيكسب ازاى !!!!

انت هتاخد القرض بضمان ايه ؟؟؟

افتراض بضمان الوديعه فى الحالة دى الفائدة مش هتكون 7.5 % هتكون 13.5 يعنى اكبر من فايدة الوديعه 4.5 تقريبا .