التجمع الخامس....

**hamdy** · 25-02-2008 09:57 AM

المشاركة الأصلية كتبت بواسطة دموع الثلج

يا هيرو فيه مساكن الشباب هناك

المساحات صغيره

لكن الاسعار حدث ولا حرج

والشكل العام للعمارات

شى مقزز
الصرف الصحى مبوظ الحيطه

لان دى اللى اديتها الحكومه للشباب

علي فكرة اللي حضرتك قصدك عليها دي اسكان التعاونيات مش الشباب
السباب العماير شكلها الي حد ما مش وحش قوي و تشتطيبها علي قده بس مفيش الصرف والكلام ده دي منطقة نظيفه جدا

**hero** · 26-02-2008 04:39 PM

يا حمدي باشا الف شكر...
بس الشقق بتاعه الشباب دي ....بتيجي منين ....
يعني اقصد هل دي ملك بنك....ولسة في منها ....

ولا دي بتشتريها من واحد كان حصل عليها قبل كدة.....

**Jato.33** · 26-02-2008 05:25 PM

فعلاً أربيلا بتاعت أشرف مروان
ودية معلومة أكيد وعلى فكرة هيا في النازل بعد ما هوا مات وبقت فلوسها وحشة وإدارتها كمان يعني للي شغاليين
لكن طبعاً الناس إلي ساكنة فيها حاجة تانيه ناس جامدة كتير ساكنيين هناك
واحد صاحبي هناك بيحكيلي حاجات كتير

بالنسبة للتجمع الأول فأنا أختلف تماماً مع الأخ حمدي هو مش أقل التجمعات ولا حاجة بالعكس ده بينافس التجمع الخامس ومش كده وبس ده ممكن يكون أحسن منه بعد فترة من الوقت
لكن الفرق بينهم إن الخامس بدأ يتبني قبله وعمران أكتر

التجمع الاول يشمل الرحاب ومدينتي مستقبلاً ويعتبر الإمتداد الطبيعي لمدينة نصر من الجهة المقابلة للدائري وكذلك أكادمية الشرطة الجديدة وعلى فكرة الأكاديمية واخدة أراضي كتير بمساحات شاسعة في المناطق المحيطة بالأكادمية عشان تعملها سكن للبشوات إلي شغاليين هناك (من جاور السعيد يسعد) وكمان في مناطق كبيرة مخصصة للفيلات فقط ممكن تكون في مساحتها أكبر من التجمع الخامس نفسه والشركة السعودية إلي عاملة العمارات إلي في المعادي واخده أرض كبيرة هناك عشان مشروع فيلات فقط وكمان بدأت شركات بترول كتير تنقل هناك ونادي القطامية (إشتراكة 30 ألف) ونادي سكاي (إشتراكه50ألف) التابعين لشركة بتروسبورت بالإضافة إلى الأرض إلي واخدها الفطيم في مقدمة التجمع والله أعلم هتبقى إيه
بالنسبة لإسكان الشباب هناك فهم كويس معقول لشاب متوسط الحال موضوع الصرف ده أنا شفتوش العمارات من بره كويسة والشوارع جوة حلوة وليها مواصلات كتير من موقف العاشر وبينها وبين الرحاب 100 متر بالكتير وكمان مباني التعاونيات وهي أقرب للرحاب من عمارات شباب المستقبل وهي تحت الإنشاء حالياً ويمكن الوصول لها من الرحاب كالآتي :
تدي ضهرك لبوابة 5 أو 6 وتمشي 100 متر أو أقل هتلاقيها على الشمال

وهي عبارة عن نموذجين من العمارات أحدهم على 3 شقق والآخر على 4
المساحات لا تتعدى ال80 متر بأي حال كصافي
وعشان كده ناس كتير لما بتشتري بتشتري 2 جمب بعض وتفتحهم
التكلفة مش كبيرة أوي على المالك ولكنها قفلت من ناحية الحجز خلاص من زمان وممكن تروحوا دلوقتي تسألوا الغفراء إلي هناك على شقق في ناس بتبيع وتكمل إنتا الأقساط وهي 2000 أو 2500 ج كل 3 شهور حتى الإستلام والباقي عليه سنتين بحد أقصى إن شاء الله والله أعلم
وبعد ما تستلم تدفع 2000 جنية كل سنة لمدة 40 سنة حاجة كده
بس هتاخدها بكام من صاحبها إلي مدفعش فيها أكتر من 60 ألف هيه دية المسألة أنا سألت من سنة كانوا عايزيين في الشقة ال80 متر 120 ألف يعني ضعف إلي دفعه الله أعلم بكام دلوقتي
الشقق على فكرة هتستلمها سوبر لوكس بس طبعاً لما تعمله الحكومة مش هيبقى كده

**hamdy** · 19-03-2008 08:59 AM

المشاركة الأصلية كتبت بواسطة hero

يا حمدي باشا الف شكر...
بس الشقق بتاعه الشباب دي ....بتيجي منين ....
يعني اقصد هل دي ملك بنك....ولسة في منها ....

ولا دي بتشتريها من واحد كان حصل عليها قبل كدة.....

بص يا هيرو باشا الشقق بيعلن عنها من قبل وزارة الاسكان بالتعاون مع بنك الاسكان و التعمير وبتبقا مدعمة من الحكومة فانت احسن ليك انك تتابع ياباشا في الجرايد الجمعة اكثر و تابع في بنك الاسكان والتعمير