مكنة ازاز الاوبل !!!!!!!!!!!!!!
انا قبل كدة كنت بقول ان الازاز ساعات بيطلع شوية و بيوصل لغاية النص و بعدين بينزل تانى
فعلا الزميل اللى قال ان الحكاية دى فى الاوبل علشان المكنة متتحرقش دة راجل فاهم موت
امبارح و انا باركن العربية تحت البيت - و بالرغم من ان فيها مكنة رفع للاربعة ازاز
رحت قفلت الازاز الامامى يمين و جاى بقفل الازاز بتاعى انا . و فى نهاية القفلة سمعت صوت حاسة بتتكسر
رحت منزل الازاز على طول و طبعا راح الازاز قالب و طلع من برة المجارية
انا قلت بسم الله ما شاء الله - اديها مكنة ازاز
رحت مغطى العربية بالغطا و قلت الصبح اشوفها
و فعلا بدل ما اروح للكهربائى " محب باشا جميل " رحت رايح للسمكرى " الحاج حسن " و فى ظرف ربع ساعة كانت المكنة برة و لقينا الدراع اللى بيركب فى الازاز متنى لتحت
راح استعدلها و ركب ليها حتة صاجة و لحمها فى الدراع و دى للتقوية " نفس فكرة تركيب الشريحة فى جراحة العظام "
و قفلنا يا معلم و الحمد لله كله زى الفل و فى الاخر بسال الراجل كام " الحاج حسن " راح قالى 25 جنية
طبعا اديتة 30 جنية و قلتلة و الخمسة شاى الرجالة
و اتسترت
و لو المكنة مكنتش بتفصل و هى بتزرجن كانت الدنيا خربت
كدة زى الفل و انا بصراحة كنت واخد فى بالى انها مكنة و تعمل 200 جنية
لكن الحمد لله - مال الواحد حلال