السلام عليكم
الحبيب ... عمرو
تحياتي لموضوعك المميز جدا
للأسف الشديد . ماحدش حاسس باللي انت بتقولوا ... غير اللي في زي ظروفك ... المعرضة في مصر خلقت جو من التطاول والشتيمة بدل من السعي السليم ناحية الاصلاح .. وقبل ما اكمل كلامي ... انا مش حزب وطني .. ولا معارضة .... انا مصري، وبس ...
انت صح .. وكلامك صح ... احنا اللي بنقلل بنفسنا ... كل البلدان العربية عندها بلاوي مستخبية وحكام مش احسن حال مننا ... الفرق .. اننا معلش بدون زعل لسان طويل وبس... وخدها حكمة .. اللي كلامه كتير ...فعله أقل كثيرا من كلامه ... كلنا محبطين .. ده صحيح
كلنا اليأس متسرب لينا .. رضو صح .. لكن ما نقتلش روحنا .. لو مش قادر ترفع من روحي المعنوية .. سيبني في اوهامي يا سيدي .. حتي النبي صلي الله عليه وسلم ..قال فليقل خيرا او ليصمت ... وماحدش يقولي ما النبي صلي الله عليه وسلم قال الساكت عن الحق شيطان اخرس .. لان الحال مختلف.. لو اتطلبت لشهاده هاترجع بيها الحق.. لازم تقول وتتكلم ... انما اللي للأسف بنعمله .. بنفرغ شحنات الطاقة بتاعتنا لسباب وشتيمة، حتي اللي بينتقد بيتهكم وبيشتم وده مش الحل
الاخوة الاعزاء اللي بيقولوا ان الامريكان والاوروبيين بيشتموا في بلادهم ... مع كل احتراااامي وتقديري.. ما اتعاملوش معاهم اساسا ... انا احتكيت بجنسيات اوروبية كتير ... واحتكيت بأمريكان .. وسافرت برة ... وشوفت قد ايه الناس دي بتناقش مشاكلها بموضوعية... يمكن في بلادهم بيقطعوا بعض وبيعملوا اللي ما يتعملش .. بس لو حس انك وجهة نظرك هاتتغير .. يا خبر .. ما اقولكش قد ايه بيحاول يحسن صورة بلده في عينيك ... صادفت اني كنت في المانيا في شهر 10 اللي فات وكانت عندهم الانتخابات ... قبلها باسأل الناس اللي معانا من الالمان عن الاحزاب اللي بيأيدوها ... والمناقشة بينهم حميت .. وحنا قاعدين نسمع . وفجأة واحد منهم اتكلم معانا وقالي عبارة مش قادر انساها فيما معناها ان انتوا اكيد بتقولوا علينا قد ايه احنا ألمان بنكره بلدنا ومش حاسين بقيمتها ... كل حتة فيها مشاكل بس احنا عايزين نحلها وده سبب الخلاف وبعد بكرة "اللي هو اليوم بتاع الانتخابات " مستحيل تلاقي نفس الروح المشحونة دي
ساعتها قارنت بين الحوار ده .. وحوار دار بيني وبينهم قبلها بكام يوم عن مصر ... وزمايلي اللي معايا ما اتوصوش بقي :) .. قلت احنا اللي فعلا مش عاملين لينا قيمة
النهارده يا عمرو انا لو مش عارف اقول كلمة حلوة .. او مش عارف انتقد انتقاد بناء ... باحااول اسكت و ما احبطش ..باعلم الطلاب اللي عندي انهم هما اللي بيخلقوا الظروف ومش هي اللي بتخلقهم ... بحاول علي الاقل لو مش هاعمل دفعة ايجابية .. ما اكونش سلبي
ولو كانت اعفن بلد في الدنيا
ولو كانت جحيم الارض
برضو
بحبك يا بلدي
عاجبك كده اديك عيطتني
:)
تحياتي
المفضلات