تقرير صيانة ال 1000 كم و الانطباعات -- بروتون جين 2 (2010)
السلام عليكم ورحمة الله وبركاته...
تقرير صيانة ال 1000 كم لبروتون جين 2 (2010).
http://img85.imageshack.us/img85/3617/02072010058.jpg
بدأ اليوم الساعة 9:20 صباحا يوم السبت 3/7 و كان في استقبالي باشمهندس بهاء الدين.
الملاحظات كانت كالتالي:
1- الإزاز القدام يمين بيعصلج في الطلوع والنزول.
2- موتور الكشافات الأمامية بيطلع صوت زنة وبتفضل معلقة حتى بعد التعديل.
3- فيه صوت تزييق ساعات بيظهر في الحتت المكسرة.
4- العربية بتحدف يمين.
5- فيه صوت تسريب هواء من ناحية باب السواق.
المهم تم استلام العربية وتحديد ميعاد الساعة 2 تخلص فيه العربية.
طبعا بما إني مبعضش خالص وبفضل واقف متابع العربية هقولكم اللي حصل بالتفصيل.
العربية دخلت الورشة الساعة 9:45 وابتدوا يشتغلوا فيها, يعني تَغيير زيت على تربيط و تشحيم عفشة .
http://img84.imageshack.us/img84/3676/geni.jpg
بعد كده العربية نزلت شيكو عالكهرباء وقعدوا يشتغلوا في الإزاز اليمين وشوية تخبيط على باب السواق من بره كده.
كله تمام... العربية طلعت بره وقفت الساعة 11...خدوا بالكم 11 هـه! يعني الصيانة تعتبر خلصت كلها في ساعة وربع.
فضلت العربية واقفة بره مستنية دورها في ظبط الزوايا من 11 ل 12:15 لحد مالقيت واحد جه ركبها ورايح على بيها على ورشة سيتروين عشان يحطها عالجهاز ظبط الزوايا.
http://img694.imageshack.us/img694/8519/03072010059.jpg
تقريبا بعد 20 دقيقة طلعت العربية بعد تعديل الزوايا ورجعت وقفت تاني بره.
الساعة 1:15 كده جه مهندس الفحص والجودة قال لي يلا نجرب.
طلعنا نجرب, وكان طبعا أكتر حاجة ملاحظها صوت تسريب الهوا اللي كان لسة زي ما هو.
المهم رجعنا تاني الورشة دخلت قعدوا يخبطوا عالباب بس من قدام شوية مكان صوت التسريب ويلا نطلع نجرب...الصوت قل بس لسة موجود.
رجعنا تالت مرة ودخلت ونفس النظام برده تخبيط على تعديل ونجرب للمرة التالتة والمرة ده عامل من التوكيل...الصوت قل بالنسبة كبيرة بس لسة موجود.
الغريب في الموضوع إن مفيش أي هوا بيخش من أي حتة في الباب...هو صوت بس...مبقتش عارف ده طبيعي ولا ايه يعني...طبعا العامل ركب وطبعا قال لك مفيش أي صوت. :B4_556:
طبعا أنا كنت بصراحة اتأخرت وعايز أمشي فـقلتلهم خلاص كده تمام وقمت قايلهم سلموني بقى العربية.
النتايج بالنسبة للملاحظات اللي ذكرتها فوق:
1- ماكانش فيه مكن إزاز فاتكتبلي واحدة وقالوا لي تبقى تتابعنا عشان لما تيجي نقلك وتركبها, وكان حال مؤقت إنهم زيته المجرى ولا معرفش رشوا سبراي كده بقى الإزاز بيطلع وينزل بسهولة.
2- الحمد لله الصوت اختفى.
3- تم تشحيم العفشة زي ما قلت قبل كده والحمد لله كله تمام دلوقتي.
4- تم ظبط الزوايا وكله تمام بس الدركسيون لسة برده مش متظبط في النص, محتاج يتفك ويتعدل سنة شمال.
5- اتحل بنسبة 80% لكن لسة موجود.
بعض الملاحظات عالتوكيل والعربية:
1- التوكيل يعيبه إن فيه بطء لما يكون العربية ماحدش شغال عليها...يعني مثلا ممكن تخلص في ساعة أو أقَل وتفضل مركونة بره أكتر من ساعة, ويرجع واحد ياخدها 20 دقيقة وييجي يركنها ساعة الا ربع تانيين. :L_bhuhhh[1]:
2- العربية فيها بعد عيوب التقفيل لو ركزت, زي مثلا صوت التسريب بتاع الإزاز ده, أو المراية بتاعت الكرسي الجنب السواق من الجنب لاحظت إنها مش لازقة كويس...وبرده شنطة العربية الإزاز بتاعها من الشمال فيه فراغ أكبر من اليمين, يعني حاجات كده ساعات لو ركزت معاها هتلاقيها.
3- سيبكوا بقى من الكلام اللي فات ده, العربية على الطريق حاجة تانية, بجد بشهادة صحابي اللي ركبوا معايا وانا رايح الساحل, كله عمال بيشهد عالثبات و فيه واحد لما قلتله كنت ماشي على 190 ماكانش مصدق, أنا بالفعل ومن غير تهويل, لما كنت بهدي كنت بارجع ل 120 كم, وكده أبقى ماشي بالراحة...قوي!
4- فرامل العربية جامدةةةة!! بجد أنا كنت ماشي في شارع في 6 أكتوبر بسحب جامد عالتالت ولسة بجيب الرابع لقيت مطب على بعد أقَل من 4 متر, دست فرامل وقلت هلبسه أكيد بس الحمد لله العربية بجد كالبشت في الأرض ووقفت قبل المطب من سرعة 90 كم تقريبا. :S_thum1[1]:
5- استهلاك البنزين مش عارف أقول هو عالي ولا لأ دلوقتي لأني سواقتي متقلبة حاليا, بس طبعا مثلا وانا بجري على طريق العالمين على 180-190 بالتكييف مش عايز أقول لكم الاستهلاك كان عامل إزاي, كان قلة أدب فعلا.. لدرجة اللمبة بتاعت البنزين نورت وأنا فاضلي بتاع 45 كله على طريق العالمين, اللي اتضرني إني اقفل التكييف وامشي على 80 بقيت الطريق لحد ماوصلت ل بنزينة Mobil اللي قدام مارينا 2...طبعا التنك ماكانش متفول, كان فيه تقريبا أقَل من النص سِنة قبل مطلع على طريق العالمين.
6- العربية ما شاء الله محترمة جدا, وعجباني جدا برغم ظهر بعد عيوب التقفيل البسيطة عندي بس بصراحة لما الواحد بيسوقها بينسى كل ده. :M_yes[1]:
في النهاية يا ريت يكون التقرير مفيد, ولو حد عايز يسأل على أي حاجة تانية يتفضل.
تحياتي
محمود.