شارك برأيك في اصلاح البلد...بدل ما نشتم فيها

**3mr Farrag** · 09-07-2010 03:36 PM

انا قلت فيما سبق ان كلامك مقنع و صح
بس احنا لو جينا نقول نصلح نفسنا ....شوف بقي مين هيصلح نفسه و مين لأ
و مين هيصلح نفسه و يلاقي اللي حواليه مش صالح للتعامل الادمي
فترجع ريما لعادتها القديمه من بعض الناس

و ده مش معناه ان الناس مستحيل ينصلح احوالها...

و لكن انا بقول المجهودات المؤسسيه و الوزاريه المفروض تطبقها
هتقولي ما هي المؤسات ديه من افراد برضوا
بس هنا يختلف لما يكون فيه خطه ذي اي خطه عمل في اي مكان ..
و اللي بينفذوا الخطه افراد بيؤدوا العمل... حتا لو ماكانوش بيؤدوه علي اكمل وجه بس لازم ينفذوه علشان ده عملهم و بياخد اجر عليه...

غير ما نقول الافراد تصلح من نفسها و من وجهه نظرها ..فين اجر كده؟؟؟؟

و برضوا مش معني كده ان الاساس اللي انا بقوله
بس ده الاسهل حاليا تطبيقه لما فيه تغير من الناحيه الوزاريه او الحكوميه فقط في عمليه التنفيذ...
غير ما 80 مليون لسه هيفكر غير نفسه ...

رايي ده من اليأس الواحد شايفه في اصلاح الافراد
طبعا ده بينطبق علي الاقل في اصلاح الجهه الاعلي اللي بتكمن في الحكومه..
و مش معني كده يعني هيدفعوا من جيبهم...ما كل ده من فلوس الشعب

و قد يكون وجهه نظري خاطئه و نرجع لأساس اصلاح الافراد الاول

**omar-saad** · 09-07-2010 04:53 PM

طبعا ياجماعة ردودكو فى الموضوع بصراحة حاجة مشرفة
فعلا ودى حاجة لازم نعملها اننا نصلح من نفسنا الاول
كل واحد يبقى فى قلبة تعاليم الدين والقيم والمبادئ الصالحة علشان نبقى مجتمع صح يعرف يصلح ويستصلح
انا شايف وحهة نظر تانية خالص
اولا
الغذاء
احنا ناسيين ان اكلنا بقى كلة مايتكلش ( استغفر الله العظيم) كله ومبيدات مسرطنة وقرف وتلوث والواحد بياكل وهوة مش مطمن
غير كدة يا جماعة والله العظيم ناس كتيير اوى مش لاقية تاكل وبتمشى نفسها بالعافية وماتعرفش اللحمة الا فى العيد الكبير علشان الاضحيات اللى بتتوزع من اهل الخير
تقدرو تقولولى ازاى شعب هاينتج ويتقدم وهوة اصلا مش لاقى ياكل للاسف ناس كتير مننا قاعد ورا الكيبورد مش حاسس غير بحاجات صغيرة اوى ( الزحمة- الموصلات - الحر وفى ناس اصلا ماعندهاش مراوح-وغيرو كتييير ....................)
مصر بقى فيها ناس كتير اوى تحت خط الفقر
ودة بسبب ان الناس بصراحة مابقتش تزكى والحكومة مابتديش الناس الغلابة دى حقها
ثانيا
الصحة
الصحة بقت فى الحضيض والامراض انتشرت بطريقة فظيعة وامراض والعياذ بالله مذمنة وعمرنا ماكنا بنسمع عنها قبل كدة
القطاع الصحى كلة عايز النسف
تتخيلو ان اللى عامل النظام التامينى الصحى فى امريكا مصرى
واوباما لسة مكرمة وعاملة جايزة
واحنا هنا بنلاقى الدوا والدكاترة بالعافية والمستشفيات بقت مزبلة وحاجة مش ادمية خالص
الواحد دخل مستشفيات عاملة كتير اوى بجد حاجة تجيب القهر والله
العيان احسن له انو يموت ولا يتبهدل البهدلة دى انا مش عارف احكى ايه ولا ايه الواحد لو فتح مش هايسكت منهم لله اللى عملو فينا كدة

ثالثا
المسكن
كل يوم بنسمع عن بيت بيقع على سكانة علشان السكان مش راضيين يسيبو البيت لانهم ماعندهمش مكان تانى يسكنوا قيه
دا غير اصلا ان الفقر بقى منتشر والناس بتدور على العشش علشان تسكن فيها
دا غير اسعار التمليك والايجار اللى بقت حاجات عباطة
فى ناس كل حلمها انها تسكن تحت سقف والميه ماتنزلش عليهم فى الشتا
يبقى فيه نظام سكن محترم ادمى يليق بكل الناس وباسعار رخيصة
وتسهيلات محترمة علشان كلة يقدر يسكن فى مكان محترم
رابعا
التعليم
طبعا التعليم انتو عارفين ان التعليم بقى روووووووووووووووووووبة
انا بقالى سنة مخلص
حاسس انى ماتعلمتش حاجة واى حد يسالنى انتا كان عليك مواد ايه فى الكليه سعات بنسى
المفروض يبقى التعليم للتعليم مش شهادة الواحد بياخدها وخلاص
علشان يلاقى شغل انامش عارف اقول ايه
يبقى فى نظام تعليمى محترم
احنا خرجنا من ترتيب الجامعات العالمى بقالنا فترة والشهادات بتاعتنا بقت مش معتمدة ولا حتى فى كفر البطيخ
ليه مايجيش مثلا اى حد من علماءنا الكرام يجي يمسك وزارة التربية و التعليم زىاحمد زويل مثلا
ليه مصرييين اللى يمسك التعليم دكتور ومستشار وضابط
عمر ماحال التعليم هايتصلح الا لما يمسكة واحد مسك الطباشيرة وشرح على السبورة
لما الحاجات الاساسية دى تبقى تمام ومية مية
ساعتها نتكلم على البنا والانشاء والمدن الجديدة
والمصانع والتطوير وكل دة
لان عمر ماالشعب هايتقدم خطوة واحدة طول ماالحاجات دى ناقصاه
واسف للاطالة
وتقبلوا تحياتى

**deee** · 09-07-2010 05:02 PM

صلحوا زمم الناس الاول وبعدين شوفوا الباقى ..

صحوا الضماير وبعدين اتكلموا

ابأو قابلونى .. ياكش تخرب اكتر مهى خربانة

**elassar2010** · 09-07-2010 05:10 PM

سيادة القانون وتطبيق القانون هما الى فيهم الاصلاح للبلد دى

**MTAK** · 09-07-2010 06:16 PM

المشاركة الأصلية كتبت بواسطة momo_sunny

لان عمر ماالشعب هايتقدم خطوة واحدة طول ماالحاجات دى ناقصاه
واسف للاطالة
وتقبلوا تحياتى

عارف هانتقدم امتى
اولا و قبل اى شئ لما نخلص لما نفعله
"و لا اقول لما نتتدين فقط لان ناس تقدموا و هم كفرة لانهم اخلصوا فى كفرهم و احنا لما اخلصنا تقدمنا "سواء اخلصنا فى الدين او الدنيا ""

--
ثانيا لما نفكر فى بعض بطريقه افضل شوية و نتمنى الخير للكل
يعنى هاضرب كام مثل على بالى الان

1- لما كل واحد عايز يعمل مشروع يفكر
هايعمل المشروع صاحب المكسب الكبير المضمون و لكن بدون فائدة لمجتمعه
"مثلا لما تلاقى 5000 مشروع مصانع بسكويت او مكرونه او حاجات استهلاكية تغيظ"
و لا هايعمل المشروع اللى ممكن يكون مكسبة معقول بس هايفيد المجتمع به
"يعمل مشروع يخرج منه صنايعى شاطر و منتج كويس الكل ممكن يستفيد به"

2- لما تلاقى الناس تستغل مهاراتها التورنتيه و قعدتها قدام النت بالايام و البحث بالابرة فى سبيل فيلم جديد او ما شابه "حقكم لا اجادل فى هذا" و ينزل فى الشهر بالـ 20 جيجا
لو استغل مهارته و خبراته و جيجهاته فى تنزيل محاضرات تعليمية او افلام تسجيليه
او برامج تعليميه و حتى لو مالوش فى الكلام ده يعنى عمرة ماهايشوفه و لا ناوى يتعلم حاجه جديدة او قديمة حتى
لو عمل كده و نزل مثلا كل شهر 4 جيجا فى مختلف الافرع و حرقهم على dvd و اعطاهم لمن يريد و من لا يملك مهارته فى البحث و من ليس عنده تلك الجيجهات
و اعتبرها زكاة لوقته و ما يصرفه على النت
و فى نفس الوقت بمثابة علم ينتفع به
مش اكيد فى ناس هاتتعلم حاجات من الممكن انها تعمل بها حاجه نافعه لها و لمجتمعها

3- لما الشباب بدل ما تحرق بنزين و غيارات و كاوتش "حقهم برضه بفلوسهم "
تاخد القليل من اللى هايصرفوة على كده و يحطوه فى مؤسسه خيريه او جمعية شرعيه

4- لما ييجى الواحد عنده ارض و بدل ما يفكر يزرعها كنتالوب و اديها كيماويات يفكر انه ممكن يزرع ربعها غله

5- لما و لما و لما
انما اهم لما
من وجهة نظرى

هى ان لما الواحد يحاول يفكر
يفكر صح و يفكر بدون جمود
و يحاول يبقى مبدع فيما يفعله
حتى لو كان بيبع شاندوتشات فول

ارجو ان اكون قد اوضحت قليل من وجهة نظرى

**hesham_tawfiq** · 10-07-2010 12:05 AM

وليه مانشوفش اللى سبقونا عملوا ايه ونبئى زيهم فى كل المجالات

ماليزيا ودبى ... نهضه اقتصاديه فى اقل من 20 سنه
الهند .... عملاق صناعةتكنولوجيا المعلومات فى عشر سنين بس
التعليم فاليابان ... احسن نظام تعليم فى العالم ( ابتدوا من تحت الصفر 1945 )
البرازيل عملاق صناعى قادم وعضو فى ال g8
روسيا من انهيار تام 1991 الى استعادةمكانتها الدوليه والسياسيه والاقتصاديه
طبعا مش محتاج اكللمكم عن الصين - القطب الثالث سياسيا واقتصاديا وعسكريا
انا شايف ان مشاكلنا فى قادتنا ونظام العمل والاداره ولازم كل واحد يعرف حقوقه وواجباته وبعد كده نظام عادل للثواب والعقاب

السؤال هو : هل الناس تقدر تتحمل تكلفة الاصلاح دا ولا لا خلاص اتعودنا على السلبيه و الانماليه ؟