الموضوع: الرحلة الي مرسي مطروح

وحشتني كلكم
سافرت انا واسرتي الصغيرة الي مرسي مطروح يوم 7/6 وكان في بعض التحذيرات اللي احب الناس كلها هنا تعرفها
انا خرجت من طنطا الساعه 5 الفجر علي اساس اصل 10 الصبح واخدت الزراعي لحد اسكندرية كنت ماشي 120 /130 وبعدها اخدت الصحراوي كان بدأ النهار يطلع وشفت مناظر ساحرة بجد علي الطريق الصحراوي اسكندرية - مطروح
وطبعا بما اني كنت ماشي علي الزراعي 120 يبقي حمشي كام علي الصحراوي ( ما الطريق فاااااااااضي) جبت ال 160
المهم
قبل مرسي مطروح ب 50 كيلو فؤجئت برادار ( رغم تحذير بعض الاعضاء في موضوعات سابقة الي وجود ردار في هذه المنطقة ) وطبعا اتصورت ونزلت باشا دفعت 150 جنية
وسألت الظابط علي شقق ايجار اداني رقم واحد سمسار ظبطني بصراحة اداني الشقة ب 170 جنية في اليوم وده سعر معقول جدا بالنسبة للمصيف هناك
وبعد ما مشيت من اول ردار لقيت لافتات بتقول السرعه القصوي 60 واحنا علي الصحراوي وفجأة لقيت نفسي اتصورت تاني 80 يا نهار بلاش ااقول اسود لان دي اجازة
نزلت للظابط لقيت بيحب في التليفون وحيطلع الوصل قلتله لالالالالالالالا ده انا لسه حالا متصور ووريته الايصال راح مشاوري بيده اني انتظر ثانية فبعدت عنه عشان لو كانت حبيبته بطرقعله ولا حاجة وهو قدر اني استذوقت معاه لقيته هو اللي بينادي عليا وقالي هات 105 بس واداني 10 وصولات تابعييت للمحافظة
والحمد لله دخلت مرسي مطروح الظاهر انهم كانوا بيعاقبوني علي السرعه بس بأثر رجعي طول الطريق
طبعا الحاجة كلها غالية جدا علي اساس انك جي تصيف يعني حرامي
حتي الحكومة بتعمل كدا لدرجة ان في اخر يوم قلت اتمشي علي الكورتيش بالعربية لقيت لجنة جديدة قلتله اانا رابط الحزام وماشي 40 عايز ايه بقي؟
قالي الستارة اللي ورا قلتله انا بروح بيها مصر وبعدي علي 100 لجنة في بلدي طنطا وفحصت بيها العربية من 8 شهور وحضرتك ممكن تشوف تاريخ اصدار الرخصة لقيته بصلي كدا وقالي خلاص خلاص هات 42 جنية بس واداني 4 وصولات من اياهم
ده بقي سبب كتابتي للموضوع
يا جماعه اللي يروح مطروح يخلي باله من المرور لانهم بجد ممكن يبوظولك الاجازة يعني انا لو مكنتش عامل حسابي كانت اجاتي فعلا باظت انا دفعت 300 جنية مخالفات في 3 ايام يعني مش الناس والبائعين بس اللي حيسرقوك لا ده الحكومة كمان تخيلواااا
بس بالنسبة للرحلة وللبلد كانت اجازة حلوة
اما بالنسبة للعربية فكانت بسم الله ماشاء الله زي الفل مرفعتش الكبوت غير للاطمئنان فقط