قف للانسر المكواة احتراماً

ايوة انا برفع القبعه للعربية دي مش عشان عربيتي لا عشان انا جربتها كمان في رحلة 1200 كيلو ( طنطا مطروح - عجيبة مطروح طنطا )
قبل الرحلة رحت للمكانيكي قالي خير قلتله مفيش حاجة انا بس مسافر انا والاولاد الي مطروح وعايزك تبص علي العربية طبعا هو عارف عربيتي قالي انت كله معاك تمام قلتله ايوة قالي خلاص اتوكل علي الله
انا كنت لسه مغير الزيت بقالي 1200 كيلو وانا بغيره علي 10000 موبيل وان هو تيل الفرامل ولابوجيهات طقم الصيانه اللي كلكم عارفينه
بس انا بعنله كل 10000 كيلو
العربية بصراحة ما شاء الله عليها علي الطريق كنت ماشي بها 130 علي زراعي اسكندرية طنطا و 160 علي صحراوي اسكندرية مطروح ثبات ولا كلمة بس بصراحة علي ال 160 كانت ضعيفة شوية في الثبات ( الحق يقال )
الكبوت مرفعتوش غير للطمئنان فقط طوال ال 3 ايام اللي قضتهم هناك محطتش نقطة مياه في الرداتير لانها مستهلكتش اصلا مياه طوال هذه الرحلة الشاقة وكان اولادي الاتنين راكبين ورا وزوجتي بجواري وشنطة العربية مليانه طبعا شنطتين كبار ولوازم المصيف يعني العربية كانت تقيلة
ولما رجت العربية مش عايزة والحمد لله اي حاجة غير انها تتغسل غسلة حلوة لان ولادي بهدولها من جوة بالرمل بتاع الشاطئ

عربية محترمة جدااا ربنا يبارك لك فيهااا

بسم الله ما شاء الله

يا باشا مصيف سعيد يا رب كون استمتعت انت و المدام و الاولاد

اللانسر طول عمرها عربية نضيف و محترمة و بتاعة شغل

ربنا يباركك فيها

ماشاء الله
ربنا يباركلك فيها

شكرا لردودكم ودعائكم

ربنا يديك خيرها

هو العربيه محترمه بس حضرتك الي مروقها اوي واضح لان الصيانه الي حضرضك بتتكلم عنها التيل كل 20000 الف و في ناس بتعد معاهم اكثر من كدا بكتير حسب الاستخدام
و البوجوهات كل 60 او 70 الف كيلو!!
انا معاك طبعا العربيه اصلا عمرها ما بتقول انا في ايام العربيه بتفضل ديره من الساعه 6 الي 1 او 2 بليل و عادي خالص
بس الحقيقه الي اثبتت لي كفائه اوي هي الكورولا الشكل القديم صحبي جاي من الكويت لمصر العربيه مكنتشي بتقف الا عشان تتفول و تكمل التكييف متقفلشي 3 ايام و العربيه موقفتشي بردو فيهم دقائق معدوده و كانت محمله حجات بالعبيط
ربنا يبارك لك فيها يا مان و يديك خرها و يكفيك شرها

طبعاً معظم العربيات اليابانيه اثبتت كفاءه عاليه جداً في التحمل في المسافات الطويله وبالذات نقطة السخونه والاعطال الالكترونيه
فكرتني لما كان عندنا جالانت 91 2000 سي سي مشينا بيها اكتر من 2000 كيلو مع تشغيل التكيف من الكويت لمكه ومن مكه للمدينه ومن المدينه للكويت بدون ما نفتح الكبوت اصلاً والكلام ده كان سنة 99 تقريباً يعني العربيه كان بقالها 8 سنين بتجري في الحر بتاع الخليج وكانت الرحله من المدينه للكويت (12 ساعه متواصل بدون راحه)

ومستغربتش لما عرفت انهم اخدو نفس البلوك بتاع الموتور وحطوه في الايفو بعد كده

بتغير الزيت كل 10.000 كيلو


أنا كنت بغير للــ3.000 كيلو

ياترى إلي إنت بتغير منه ..إسمه إيه وبكام؟؟؟

شكرا لردودكم يا جماعه وانا بغير زيت موبيل وان كل 10000 كيلو الجركن 235 جنية

بالنسبه لميا الريداتير عندى فى العربيه انا مزودتش ميتها من اكتر من 9 شهور لحد دلوقتى والميا زى مهيه منقصتش

بالنسبه لتغيير الزيت عندى بغير كل 3000 كيلو فقط كل شهرين ونص تقريبا بغير لان معظم مشى العربيه معايا سفر وقليل جدا داخل البلد

ربنا يبارك لك بالعربيه ورحله سعيده :)

اولا انا فعلا بحترم تجاربك الشخصية اللي بتنقلهالنا عن عربيتك وانا عن نفسي بستفيد منها جدا لان فعلا حضرتك بتقول اللي ليها واللي عليها. ثانيا كنت عايز استفسر عن حوار الزيت ده لاني كنت ناوي عليها بس خوفوني منها ان العربية موديل 2001 والزيت ده اللي بيتغير علي 10000 او 20000 للزيرو عشان الموتور لسة جديد. اخر حاجة واسف للاطالة كنت عايز اعرف نوعية تيل الفرامل اللي بتستخدمه والبوجيهات لاني ناوي اغير قريب ومحتار في الانواع مع العلم ان العربية مانوال. وفي انتظار ردك ياجميل وفي انتظار تجاربك الممتعة اللي بتحسسني بجد اني معاك في العربية من تفاصيلها.

الف حمد لله على السلامه
وربنا يباركلك في عربيتك ويملى حياتك كلها سعاده وسرور

عزيزي مستر فامبير
شكرا علي كلامك الجميل وردك
بالنسبة الي الزيت فمفيش مانع ابدا من وضع زيت موبيل وان لعربيتك وحكاية الزيرو دي ملهاش اساس لان العربية ممكن تبقي زيرو وحاله موتورها بعد اول 5000 كيلو اسؤا من حالة موتور عربية موديل 99 مثلا يبقي الحكم لحالة الموتور مش سنة الصنع
لو حاله موتورك ممتاز توكل علي الله وحط موبيل وان حيوفر معاك اوي
تيل الفرامل انا بجيب نوع اسمه جولد تركي الصنع وماشي معايا زي الفل ومش بيصفر
البوجيهات هات ال3 شمعه الماني
لو بتحط بنزين 90 او 92 ولكن لو بتحط 80 يبقي كفاية 2 شمعه اي نوع ممكن يبقي nkg

شكرا جدا علي ردك وفي انتظار مزيد من التجارب الممتعة وربنا يستر طريقك وطريقنا جميعا