هنا هل ينفع التحويل الى غاز؟ - دعوة لتبادل الاراء والخبرات

**Defender** · 31-07-2011 12:31 AM

الغاز كوقود بيختلف فى طبيعة عمله عن البنزين بمعنى ادق ان عند تحويل المحرك ليعمل بالغاز بدلا من البنزين يجب مراعاة عدة نقاط اساسيه اولها و اهمها توقيت

الشراره الذى يجب تغييره ليناسب خصائص الحتراق المختلفه للغاز عن البنزين ولو لم يتم

ضبط موعد الشراره سيحدث اجهاد حرارى عالى على جسم الاسطوانه و المكبس و يحدث تأكل شديد و سريع على شكل احف أكس متوازيه ( يحدث تسلخ للاسطوانه) و هذا ما يعجل من سرعة احتياج المحرك لعمره ضبط الشراره ايضا يؤثر فى القدره المفقوده مما يقلل من قدرة المحرك الحصانيه عند تحويله ليعمل بالغاز بدلا من البنزين

أيضا يجب تغيير زيت المحرك على فترات اقل بمعنى انه لو تقوم بتغيير الزيت كل الفين كيلو تقوم بتغييره كل الف و خمسميه او الف و مراعاة

مراجعة دورة التبريد بأستمرار

بالنسبه لمشكلة الشراره فيوجد شركه بمصر اسمها غاز تك موجوده بالبنزينه اللى فى اول عباس العقاد

الشركه دى بتركب جهاز بيظبط الشراره على الغاز او البنزين حسب الوقود المستخدم و ده بيقلل من مشكلة استهلاك المحرك بشكل كبير و لكن تذكر دائما مراجعة دورة التبريد و مواعيد تغيير الزيت للحفاظ على عمر اطول للمحرك مع التوفير بسعر الوقود

دة راي محترم جدا منقول من الدفي دي عرب

**Defender** · 31-07-2011 12:33 AM

http://www.nilemotors.net/Nile/7053-...n-gas-not.html

**eslamashour2005** · 02-08-2011 05:52 AM

انا حبيت ارد بناء عن تجربتي
عربيتي جين 2 موديل 2007 مانيوال بقالي سنة و نص محول غاز تقريبا مشيت اكتر من 50000 الف كيلو بعد التحويل عربيتي عاملة 95000 الف كيلو دلوقتي
بالنسبة للتحويل انا بنصح الناس بيه لان كل اللي بنسمعوه عن الضرر علي الماتور وهم كبير نظرا لانظمة التحويل القديمة
دلوقتي فيه انظمة حديثة عالجت كل المشاكل اللي ذكرت قبل كدة في مشاركة العضو mmmgogommmm
النظام الذي يعمل علي سيارات بروتون اسمه sequential و هو احدث انظمة التحويل و يكلف حوالي 7000 جنية
هتكلم عن النقط الايجابية و السلبية و ايه الحول من خلال تجربتي
اولا الايجابيات :
1- طبعا التوفير متر الغاز 0.45 بدلا من لتر 92 ب 1.85 ( اسطوانت الغاز تقريبا تمشي العربية من 300 - 350 كيلو ) بتمتلي ب 5 جنية (ملحوظة لتر البنزين لا يساوي متر الغاز اسطوانة الغاز ممكن تمشيك قد تانك بنزين رغم انها بتمتلي ب 15 متر )
2 - طبعا احسن للبيئة بس اظن محدش هيفرق معاه الموضوع ده كتير :D

ثانيا السلبيات : هنا هكتب السلبيات و حلولها او ازاي السيستم الجديد عالج المشكلة
1- فقد العزم الموضوع ده لا يتجاوز 10 في المية عن قدرة المحرك لان السيستم الجديد بيتحكم في دخول الغاز عن طريق ecu خاصة بيه بتدرس احتياجات الماتور و تديله الغاز اللي محتاجة
2 - بالنسبة للسرعة القصوي بتقل شوية يعني بالغاز السرعة القصوي في العربية عندي ممكن تكون 170- 175 يعني برضو في رنج ال 10% الفرق
طبعا في حل للنقطتين اللي فاتوا لانك هتقولي عايز اشد مع حد بالعربية في الحالة دي في زرار قدامك في الطابلة بمجرد لمسة العربية بتقلب بنزين عادي جدا و منغير ما تطفي العربية و تستفيد بقوة البنزين في الشد و اما تخلص هتدوس علي الزرار تاني و نرجع للتوفير
3 - نيجي بقه للمهم التاكل في الماتور ده كان سببه الكبيريت اللي بيحصلة تكثف مع بخار الماء و يتحول لحمض كبريتيك ياكل الماتور التفاعل ده مبيحصلش الا لو الماتور بارد لكن السيستم الجديد بيخلي العربية تدور علي البنزين و تسخن لحد ما توصل للحرارة الطبيعية اللي هيا 80 عندنا و بعدين يحول غاز اتوماتيك يعني المشكلة دي انتهت تماما
و طبعا مشكلة انا العربية بتتاخر في الدوراة الصبح دي مش موجودة اصلا لان العربية بتدور بنزين
و مشكلة بردو الكربون اللي بيحمي الماتور هيبقي موجود لان العربية بتشتغل بنزين لحد ما تسخن في الفترة دي هتحمل طبقة الكربون يعني تقريبا 90 % من مشاكل الغاز اتحلت
4 - طبعا مساحة الاسطوانة هيا مش كبيرة قوي يعني لسه عندي شنطة برضو بس انا دايما بسوق في القاهرة و مبفكرش افتح الشنطة اصلا الا لو رايح مصيف و دي ممكن نتصرف يومها بشبكة فوق العربية او اي بديل وده يوم في السنة و يعدي

دي تجربتي مع الغاز و اي استفسار انا تحت امركوا

**Defender** · 02-08-2011 08:31 PM

ألف شكر أستاذ إسلام على الرد ، استأذن حضرتك فى كام سؤال
المكان اللى انت عملت فيه عنوانه وتليفون إذا أمكن
هل اى مكان تحويل زيت هنلاقي فيه نظام sequential ؟
تغيير الزيت ، هل بيكون على فترات اقصر ؟
هل الماتور هيحتاج عمره بدري عن الميعاد الطبيعي " انا معرفش ايه هو الميعاد الطبيعي بس اعتقد 250 كيلو الف والله اعلم "
الصيانة للغاز ازي بتعمل وكل كام الف كيلو ؟ وتكلفتها ؟
فى حالة ان العربية مش محتاجة تسخين ، هل الإنطلاق من 0 ل 100 اتغيرت السرعة بعد الغاز الطبيعي ؟

**eslamashour2005** · 03-08-2011 11:53 PM

المشاركة الأصلية كتبت بواسطة Defender

ألف شكر أستاذ إسلام على الرد ، استأذن حضرتك فى كام سؤال
المكان اللى انت عملت فيه عنوانه وتليفون إذا أمكن
هل اى مكان تحويل زيت هنلاقي فيه نظام sequential ؟
تغيير الزيت ، هل بيكون على فترات اقصر ؟
هل الماتور هيحتاج عمره بدري عن الميعاد الطبيعي " انا معرفش ايه هو الميعاد الطبيعي بس اعتقد 250 كيلو الف والله اعلم "
الصيانة للغاز ازي بتعمل وكل كام الف كيلو ؟ وتكلفتها ؟
فى حالة ان العربية مش محتاجة تسخين ، هل الإنطلاق من 0 ل 100 اتغيرت السرعة بعد الغاز الطبيعي ؟

معلش علي التاخير
بالنسبة للتحويل انا حولت في غازتك مصطفي النحاس
و معظم محطات الغاز فيها تحويل و بالنسبة لنظام السيكونشال موجود في اي محطة بتحول لانه بيبقي خيار من ثلاثة اختيارات من انظمة التحويل لكن عربيات بروتون بيفضل السيكونشال لانه اعلي نظام موجود حاليا
بالنسبة لوقت التحويل هو 3 ساعات يعني هتوديها الصبح و تعدي تاخدها علي العصر كدة جاهزة و فيه انظمة تقسيط لذيذة قوي
بالنسبة للزيت انا مش عارف بس بحس اني بنزل الزيت بعد الوقت المفروض ليه و يبيقي لونه لسه ذهبي مش محروق و صوت الماتور علي فكرة بالغاز هادي جدا عن صوته بالبنزين
انا بستعمل زيت فيسكو 3000 و بغيره كل 7000 ك
صيانات الغاز عليها ضمان سنة لكن مفيش صيانة اصلا لانك مش محتاجها لو عندك مشكلة بتروحلهم
بس الحمد لله محصلش مشاكل معايا فمحتجتش اروحلهم غير علشان اختبار الاسطوانة و ده بيبقي كل سنة بيختبروا الوصلات و الاسطوانة لو فيه اي تسريب
انا مش فاهم قصدك لتسجين العربية
هو اللي بيحصل انك بتدور و تمشي علي طول زي العادي بس العربية بتبقي ماشية بنزين لحد ما تسخن مع المشي عادي بعد دققيقة او اتنين بيتم التحويل للغاز اتوماتيك و فيه لمبة صغير قدامك في التابلوة بتوضحلك الموضوع و بيبقي فيها عداد للغاز اللي في الاسطوانة و علي فكرة شكل العداد شيك قوي و لو معاك جين او بيرسونا بيركبوة في الحتة المدورة اللي علي شمال الدركسيون لدرجة ان الناس بتبص عندي و تفتكرها من اصل العربية

بص علي الفيديو ده ده نفس شكل الزرار اللي عندي في التابلوة و العربية و هي بتجري بالغاز
‪Gen-2 Test gas 180km‬&rlm; - YouTube

**Sh_sunsea** · 04-08-2011 12:33 AM

eslamashour2005
السلام عليكم
أولا كل سنة وانتم طيبين جميعا ورمضان كريم

ثانيا كنت عايز آخد رأي حضرتك في نقطة - أنا معايا فيرنا 2009 ومحولها غاز من سنة بالضبط - بس حاسس ان استهلاكها في الغاز عالي عن معظم الارقام الي بسمعها

اسطوانة الغاز عندي بتعمل 170-200 كيلو صيفا بسبب التكييف - بيزيدوا في الشتاء لحد 230 بالكتير

انا طريقي كله دائري ومحور بما اني ساكن في اكتوبر وشغلي في النزهة - والتكييف شغال على طول - فلماذا الاسطوانة بتعمل معايا مسافة قليلة كده - مع العلم اني غير التكييف مش بحرق وسواقتي هادية يعني

بالنسبة للأخ الي كان بيعلق على الزيت - بالعكس - مع الغاز انت بتحتفظ بالزيت مسافة أطول من استخدام البنزين - وذلك لأن استخدام الغاز بيقلل من ترسب الكربون داخل الماتور وده من أكتر العوامل الي بتغير لون الزيت وتفقده خصائصه بسرعة

**MOSHAKS** · 04-08-2011 01:42 AM

[QUOTE=Defender;3873693994]

تم تصنيع الاسطوانات من صلب بدون لحامات ثم يتم اختبارها تحت ضغط شديد حيث يصل إلي 350 ضغط جوي وكذلك تخضع الاسطوانة لاقصي الاختبارات فيتم اسقاطها من ارتفاعات عالية وهي مركبة بالسيارة تبدأ من 10 اقدام وحتي 30 قدما.. كما يتم تعريضها للحريق الشديد ولطلقات الرصاص الخارق للدروع ولابد من تجاوز الاسطوانات لكل هذه الاختبارات وزيادة في الامان فقد تم تزويد محبس الاسطوانة بخاصية تسمي الخاصية الحرارية وفي حالة حدوث الحريق ووصول الحرارة الي درجة معينة تنصهر مادة معينة داخل المحبس وتغلق الاسطوانة واذا استمر الحريق ووصل الضغط داخل الاسطوانة الي اعلي من المعدلات الطبيعية وهي 280 بار تبدأ الاسطوانة في تصريف الغاز في زمن لا يزيد عن دقيقة ولان الغاز اخف من الهواء فعند التسرب يتصاعد الي اعلي وبذلك يكون أقل خطورة من انواع الوقود الاخري

طبعا هو كلامى مش تشكيك فى الكلام اللى حضرتك قولته..بس انا شوفت ادام عينى بيجو 307 كان نازل من الكوبرى اللى على الصحراوى بتاع العاشر من رمضان وخبطته عربية من ورا والعربية البيجو كانت غاز والاسطوانة ديه انفجرت والجزء الخلفى من العربية اتفرتك والعربية ولعت بالكامل فى ثوانى ومحدش لحق يعمل اى حاجه ورحم الله ما كان بها من بشر..ايه التعليق على الموضوع ده لانى بحس انى اللى بيركب غاز ده اكنه شايل قنبلة موقوتة
بس هنعمل ايه محنا شعب غلبان وعايزين نمشى حالنا على اد الامكانيات اللى معانا. ربنا يسترها على الجميع

**Defender** · 04-08-2011 01:49 AM

ألف شكر على ردك حضرتك استاذ إسلام ، فعلا فى الفيديو سحب العربية حاسس انه عادي جداً ، وشكراً استاذ Sh_sunsea على تعليق حضرتك

بالنسبة للسؤال اللى موصلش حضرتك يا استاذ إسلام ، هو على اعتبار ان العربية مشيت فترة بنزين ، مثلا 10 دقائق ، وبعدين ركنتها خمس دقائق عملت اى حاجة ، هل لما تشتغل العربية بالغاز ديركت سحبها بيكون من 0 : 100 طبيعي بردو ، هو السؤال ممكن يكون غبي بس معلش :D
وبردو فى استفسار اللى هو " هل الماتور هيحتاج عمره بدري عن الميعاد الطبيعي " انا معرفش ايه هو الميعاد الطبيعي بس اعتقد 250 كيلو الف والله اعلم " لأن الموضوع تحويل الغاز داخل دماغي لأبعد الحدود وفى نفس الوقت متردد جداً من موضوع التأثير على الماتور ، لأن العربية قميتها كلها تقريبا فى الماتور بس

**Defender** · 04-08-2011 01:53 AM

[quote=moshaks;3873703071]

المشاركة الأصلية كتبت بواسطة defender

طبعا هو كلامى مش تشكيك فى الكلام اللى حضرتك قولته..بس انا شوفت ادام عينى بيجو 307 كان نازل من الكوبرى اللى على الصحراوى بتاع العاشر من رمضان وخبطته عربية من ورا والعربية البيجو كانت غاز والاسطوانة ديه انفجرت والجزء الخلفى من العربية اتفرتك والعربية ولعت بالكامل فى ثوانى ومحدش لحق يعمل اى حاجه ورحم الله ما كان بها من بشر..ايه التعليق على الموضوع ده لانى بحس انى اللى بيركب غاز ده اكنه شايل قنبلة موقوتة

بس هنعمل ايه محنا شعب غلبان وعايزين نمشى حالنا على اد الامكانيات اللى معانا. ربنا يسترها على الجميع

على فكرة يا أخي انا شوفت جيب شروكي ولعت فى الباركنج قبل ما صحابها يتحرك من مكانه ، وهو كان بيدورها بس، بيدور ، وبعدين حصل صوت خبطة جامدة تحت الكبوت ، والنار بدأت تاخد طريقها فى العربية ، عقبال ما المطافي وصلت ، فى 15 دقيقة مثلا ، كانت العربية تقريبا انتهت .
وكمان انت فى كل الأحوال معاك يا تنك بنزين ، يا اسطوانة غاز ، والأثنين دمار إذا حصل حوادث لا قدر الله :)

**eslamashour2005** · 04-08-2011 03:21 AM

المشاركة الأصلية كتبت بواسطة Sh_sunsea

eslamashour2005
السلام عليكم
أولا كل سنة وانتم طيبين جميعا ورمضان كريم

ثانيا كنت عايز آخد رأي حضرتك في نقطة - أنا معايا فيرنا 2009 ومحولها غاز من سنة بالضبط - بس حاسس ان استهلاكها في الغاز عالي عن معظم الارقام الي بسمعها

اسطوانة الغاز عندي بتعمل 170-200 كيلو صيفا بسبب التكييف - بيزيدوا في الشتاء لحد 230 بالكتير

انا طريقي كله دائري ومحور بما اني ساكن في اكتوبر وشغلي في النزهة - والتكييف شغال على طول - فلماذا الاسطوانة بتعمل معايا مسافة قليلة كده - مع العلم اني غير التكييف مش بحرق وسواقتي هادية يعني

بالنسبة للأخ الي كان بيعلق على الزيت - بالعكس - مع الغاز انت بتحتفظ بالزيت مسافة أطول من استخدام البنزين - وذلك لأن استخدام الغاز بيقلل من ترسب الكربون داخل الماتور وده من أكتر العوامل الي بتغير لون الزيت وتفقده خصائصه بسرعة

هو بالنسبة لعدد الكيلومتر انا فعلا لاحظت ده في الاول ان العربية مبتعملش الكيلوات اللي قالوا عليها كانت بتعمل معايا بتاع 120-150 كيلو و ده كان العادي بتاعي لاني بحرق و نفس المشوار ده كان ممكن اخلص فيه نص تانك بنزين ب 50 جنية
بس مع الوقت ابتديت افهم الموضوع و ابتديت اهدي شوية في سواقتي بقت ممكن تعمل 200-250 و انا لاحظت حاجة ممكن ترجع لمنحني العزم بتاع عربيتي مش عارف عندك يبقي ايه يعني انا لو ماشي علي 100 علي الخامس بيبقي rpm علي 2.5 العربية بتستهلك غاز اكتر بحوالي 30% من لو مشيت علي 100 علي الرابع و rpm علي 3.5

المشاركة الأصلية كتبت بواسطة Defender

ألف شكر على ردك حضرتك استاذ إسلام ، فعلا فى الفيديو سحب العربية حاسس انه عادي جداً ، وشكراً استاذ Sh_sunsea على تعليق حضرتك

بالنسبة للسؤال اللى موصلش حضرتك يا استاذ إسلام ، هو على اعتبار ان العربية مشيت فترة بنزين ، مثلا 10 دقائق ، وبعدين ركنتها خمس دقائق عملت اى حاجة ، هل لما تشتغل العربية بالغاز ديركت سحبها بيكون من 0 : 100 طبيعي بردو ، هو السؤال ممكن يكون غبي بس معلش :D
وبردو فى استفسار اللى هو " هل الماتور هيحتاج عمره بدري عن الميعاد الطبيعي " انا معرفش ايه هو الميعاد الطبيعي بس اعتقد 250 كيلو الف والله اعلم " لأن الموضوع تحويل الغاز داخل دماغي لأبعد الحدود وفى نفس الوقت متردد جداً من موضوع التأثير على الماتور ، لأن العربية قميتها كلها تقريبا فى الماتور بس

بالنسبة انك تركن العربية و ترجع تدورها و هيا سخنة الغاز هيشتغل علي طول بعد 5 ثواني لانك مش هتحتاج تسخن بالبنزين تاني لان العربية اصلا سخنة
بالنسبة لموضوع العمرة في اعتقادي مش هيفرق يعني ممكن نقول 200-220 الف بدل 250 بس انا مش مقتنع بكل الارقام دي لاني مسمعتش عن عربية قعدت 200 الف كيلو من غير عمرة ده حوالي استهلاك 10 سنين ده انتا ممكن تكون جبت عربية تانية اصلا قبل الفترة دي
بس التجربة بتاعتي بعد سنة و نص الماتور متاثرش باي شكل من الاشكال و بصراحة انا حاسس ان لو كان معايا عربية تانية غير الجين 2 كان الماتور تعب لان انا سواقتي فيها حرق كتير و سفر كتير

الموضوع: هنا هل ينفع التحويل الى غاز؟ - دعوة لتبادل الاراء والخبرات

LinkBack

أدوات الموضوع

عرض

-

-

-

-

-

-

-

المواضيع المتشابهه

دعوة للحوار و تبادل الاراء بين أعضاء قسم هيونداي

مكتبة نايل موتورز لتبادل الكتب

يعنى ينفع منعملش ولا مقابله لحد دلوقت .. دعوة للاول مقابله ((:

هل ينفع التحويل من المدارس الازهرية للمدارس الحكومية ؟

دعوة للتصالح-دعوة للحب-دعوة للاخاء

الكلمات الدلالية لهذا الموضوع

المفضلات

المفضلات

ضوابط المشاركة