الموضوع: أخيرا بعت السيراتو

يا جماعة و الله انتوا كلكم في منتهي الذوق و الجمال و هي دي أخلاق المنتدي الجميل و هو الحوار و تقبل الرأي الأخر انا معاكم فعلا ان التيريوس في ثباتها علي الطريق و خصوصا في السرعات العالية موش قوي بس كل عربية و ليها ميزاتها و عيوبها و التيريوس فعلا علي الدائري و حوه البلد سواقتها ممتعة انك كاشف الطريق و عالية علي المطبات و كمان فيها و دي استغربت منها مرونة و خفة المناورة

العربية طبعا ياباني و أحلي ما في الياباني العفشة بتاعتها و الموتور رغم اني كنت أعتقد انه ضغير علي العربية لكن طلع فعلا مناسب جدا لحجمها و وزنها و بيحرك العربية و بيجاوب معايا زي مانا عايز انا مش هاتكلم علي كماليات لأن كل العربيات بقت مليانة كماليات و خصوصا بعد ما حبايبنا بتوع الصين خلوا اتخن كماليات ببلاش انا بتكلم علي شاسيه و موتور و عفشة و فعلا التيريوس كشاسيه و عفشة و موتور متوافقين مع بعض و الحمد لله.

أما بالنسبة لحبيبتي السابقة السيراتو فانا ما بأقواش انها عربية وحشة و لا حاجة لكن انا كنت بحس اني ماشي مع واحدة حلوة و كل الناس بتعاكسها زي الميكروباصات و التكاتك و خلافه كله بيكسر عليك و هو متاكد انك هتخاف منه و تبعد عنه لن معاك حتة شيكولاته هي عربية جميلة شكلا و شيك جدا لكن للأسف غير مناسبة لعقلية و فكر السواقة في مصر الواحد محتاج دبابة علشان يمشي في الشارع بإحترامه للأسف.

و برضه أعتقد فيها مشكلة و خصوصا في العفشة الخلفية بتأثر علي ثبات العربية و خصوصا بعد ال 140 و انا جربتها علي طريق السخنة كذا مرة اي شوية هوا بتحس العربية بتزق منك و طبعا انا سقت اللانسر و النوبيرا و الهوندا السيفيك و هما علي السرعات العالية زي 160 ما بيتأثروش كده رغم إن من المفترض ان السيراتو من نفس الفئة و علشان كده انا كان بيجيلي إحباط لما أخويا اللي معاه النوبيرا 2008 بيجري مني علي الطريق و انا اللي معايا سيراتو 2010 زيرو مقدرشي أحصله بأمان - ده إحساسي الداخلي - انا معاكم ان السيراتو بتجيب سرعات زي 160 و 170 بس انا باقول اللي يعمل كده بيها يبقي حرام عليه لأن أي مفاجأه علي الطريق عوافبها ها تبقي صعبة و اعتقد إن حادثة التونسي خير دليل.

و عموما إحنا كلنا زمايل و أصدقاْ و زي ما قلت ده رأيي الشخصي و ده ما يمنعش إن بعض الإخوه عنده السيراتو و هما مبسوطين بيها و ربنا يباركلهم فيها و يكفيهم شرها و عقبال ما نشوف عربية مصرية نحبها كلنا و ندافع عنها كده زي السيراتو التيريوس و خلافه ... مش كده و لا إيه

و أخيرا يسعدني أن أسمع أرائكم و انتقاداتكم كمان و ما فيش مشكلة و أهلا و سهلا بيكم كلكم أصدقاء و زمايل و إخوات