لو ناس كلفوك تسألهم عن عريس متقدم لبنتهم ....!!!

**أبو_يوسف** · 13-07-2010 02:27 PM

السلام عليكم ورحمة الله وبركاته..
الموضوع كالتالي:
لو في ناس كلفوك انك تسألهم عن عريس متقدم لبنتهم ومعاك عنوان الشركة اللي بيشتغل فيها وعنوان السكن بتاعه ..
هاتعمل ايه وهاتسأل ازاي؟ وهاتسأل عن ايه؟ علشان تتعرف على دينه وأخلاقه وطباعه؟ ولو قابلته هو نفسه هاتسأله عن ايه؟
ولو رحت شغله هل تطلب تقابله الاول وبعدين تقوله عايز حد اسأله عنك ولا هاتسأل اول واحد يقابلك عنه ..؟!
افيدونا بخبراتكم يا جماعة وجزاكم الله خيرا..

**mohamed_selim** · 13-07-2010 02:36 PM

لو عايز تعرف الصح متجبش سيره ان الموضوع فيه نسب
الافضل لو تدعبس لحد ما تلاقى حد معرفه فى المكان اللى هو فيه او بيتعامل معاهم

**aly_hosny** · 13-07-2010 02:39 PM

المشاركة الأصلية كتبت بواسطة mohamed_selim

لو عايز تعرف الصح متجبش سيره ان الموضوع فيه نسب
الافضل لو تدعبس لحد ما تلاقى حد معرفه فى المكان اللى هو فيه او بيتعامل معاهم

ومثلا تروح يوم الجمعة تشوف بينزل الصلاة بدري ولا على الاقامة
و تسال عليه في الشغل برضو و تنقل كل حاجة زي ما هي بالظبط الحلو و الوحش

**kh_talaat** · 13-07-2010 02:51 PM

المشاركة الأصلية كتبت بواسطة aly_hosny

ومثلا تروح يوم الجمعة تشوف بينزل الصلاة بدري ولا على الاقامة

وتفتكر النقطة دي هتفرق ؟؟؟؟

يعني لو بالصدفه اتأخر ونزل على الإقامة يبقى راجل مش ظبوط

أكيد حضرتك بتهزر

**أبو_يوسف** · 13-07-2010 02:58 PM

وجهة نظر برضه..
بس يا جماعة عندي احساس ان لو مجبتش سيرة انه موضوع نسب .. هايبقى صعب حد يديني معلومات وهايشكوا فيا!!
كمان اعتقد ان الناس لما بتعرف انه موضوع نسب بيراعوا ربنا حتى لو هايجاملوا شوية بس بيحاولوا يقولوا الحقيقة..

**بحري** · 13-07-2010 03:00 PM

١- الأول مين الناس اللي كلفوك..درجة ثقتهم في تقييمك..مسامحتهم في احتمال أن تخطئ..النقاط دي مهمة جدا لأن الموضوع ده بيعمل حساسية عابرة للعقود الزمنية...منه لله فلان هو اللي دبسنا في الجوازة دي
٢- يختلف الأمر باختلاف المناطق...لو مناطق مترابطة يبقى أحسن حاجة الواحد يسأل وسط جيرانه..لو مش مترابطة قوي بيكون كلام الجيران نوع من الاستئناس ليس إلا
٣- معرفة أحوال أصدقائه والمقربين منه ومن يقضي معهم أغلب أوقاته
٤- معرفة أحوال أقربائه وبالذات أبوه وأمه وأخوته وطبيعة العائلة وعاداتهم الاجتماعية
٥- معرفة رأى زملائه في العمل
مع مراعاة عدم الانخداع بالظواهر
بالنسبة لمعايير التقييم فطبعا أمر الدين والالتزام به، تحمل المسؤولية، طريقة التعامل مع المشاكل (بتاع وجع دماغ ومحاضر وإجرام وللا له كبير يوقفه عند حده)
وفي البداية والنهاية الاستخارة الاستخارة الاستخارة

**shaddadfalcon1** · 13-07-2010 03:03 PM

االحاجات دي بتبقي محرجه قوي وبرده مش بتعرف حاجات غير الحاجات الظاهره لكل الناس او اللي هو عايز الناس تعرفه عنه

انا من كام شهر واحد اتقدم لاخت مراتي وحاماتي قالتلي اسال وانا سالت وقلتلها بلاش ومع ذلك وافقو والفرح بعد بكره

الفكره بقي ان دخلته كانت انه راجل حافظ القران ومتدين وده السبب اللي خلي اخت مراتي توافق وبعد الخطوبه بقي عايز يقعد لوحدهم ويخرج ويعيش حياته

من الاخر تعرف فلان اه اعرفه - عاشرته ؟ لآ - يبقي متعرفوش

**mohamed_selim** · 13-07-2010 03:05 PM

المشاركة الأصلية كتبت بواسطة timtim

وجهة نظر برضه..
بس يا جماعة عندي احساس ان لو مجبتش سيرة انه موضوع نسب .. هايبقى صعب حد يديني معلومات وهايشكوا فيا!!
كمان اعتقد ان الناس لما بتعرف انه موضوع نسب بيراعوا ربنا حتى لو هايجاملوا شوية بس بيحاولوا يقولوا الحقيقة..

هوه للأسف ساعات بيغطو على المشاكل علشان بيستحرمو يبوظو الدنيا !!!! و ساعات يقولو ماهو لما يتجوز ربنا هيهديه

**aly_hosny** · 13-07-2010 03:10 PM

المشاركة الأصلية كتبت بواسطة kh_talaat

وتفتكر النقطة دي هتفرق ؟؟؟؟

يعني لو بالصدفه اتأخر ونزل على الإقامة يبقى راجل مش ظبوط

أكيد حضرتك بتهزر

ايه ال يتاخر دا ينزل في نص الخطبة
مش على الاقامة
ال بينزل على الاقامة بيبقى بمزاجه
اهزر ليه هي المواضيع دي فيها هزار

**أبو_يوسف** · 13-07-2010 03:13 PM

المشاركة الأصلية كتبت بواسطة بحري

1- الأول مين الناس اللي كلفوك..درجة ثقتهم في تقييمك..مسامحتهم في احتمال أن تخطئ..النقاط دي مهمة جدا لأن الموضوع ده بيعمل حساسية عابرة للعقود الزمنية...منه لله فلان هو اللي دبسنا في الجوازة دي

هي طبعا مسئولية مش سهلة وغير محببة للنفس ولكن لابد منها..
لذلك كنت افضل أني اسأل عن اوجه معينة وانقل ردود الناس اللي هسألهم بعيد عن تقييمي لهذا الشخص او على الاقل تقييمي يأتي في اخر مرتبة..
وبالتالي كنت محتاج اعرف الاوجه اللي اسأل عليها..
لان في اوجه الردود عليها بتكون قاطعة زي مثلا:
مدخن - عصبي - مصلي بالمسجد - ....
وفيه حاجات تانية بتكون الردود تقديرية .. مثلا:
متعاون - اخلاقه ايه - ....
لو الاخوة يفيدوني لو حد متقدم لبنته او اخته او قريبته هايهتم يسأل عن ايه.. والشخص نفسه ممكن تسأله عن ايه..