صنايعية الكاوتش في محطات بنزين الصحراوي - نصابين؟

**maghnom** · 13-07-2010 03:59 PM

انا اتعرضت يا جماعة لموقف في اول بنزينة على الطريق الصحراوي بعد البوابات في ناس قالتلي انه نصباية و بيعملها كل عمال الكاوتش في محطات البنزين في الطريق الصحراوي خصوصا الاماكن النائية

انا حبيت اطمن على ضغط الهواء في الكاوتش في اول محطة بنزين على الطريق الصحراوي و انا مسافر من القاهرة للاسكندرية و بالفعل دخلت اول محطة بنزين على يميني بعد عبور البوابات و مسافة تقريبا 15 كيلو بعدها و مش فاكر اسم المحطة بس كانت خضرة و فيها اسم مصر تقريبا

دخلت مباشرة عند منطقة الكاوتش و كانوا اتتنين عمال و قالولي واحد منهم قالي ان العجلة اليمين قدام ناقصة كتير و شكلها فيها مشكلة مع اني شايفها عادية جدا و ارتفاعها طبيعي

المهم رفع جنب العربية بالكريك و قالي اكسر الدركسيون كله يمين و جاب مية بصابون و قعد يدلق على العجلة و كل شوية يطلعلي خرم و حتة بتبقلل فقاقيع لدرجة انه طلعلي 12 خرم و قالي في نوعين خوابير لحام واحد ب 10 و التاني امريكي ب 15 و عمل كل خرم ب 10 , و جه زميله الصنايعي التاني قاس العجلة اللي ورا اليمين برضه و قالي ناقصة كتير برضه و طلع فيها كمان 3 اخرام غير مرئية برضه بقللة فقاقيع صابون على الكاوتشة و انا احترت هي فعلا فقاقيع بتطلع عند نقطة معينة بس الكاوتشتين كانوا عاليين و مش مريحين خالص و العربية ما بتحدفش و لا فيها اي مشكلة, ده غير ان الكاوتش اصلا كان جديد و ما كملش 3 الاف كيلو, همة قالولي اكيد انت مشيت على ازاز و على جنب واحد علشان كده العجلتين اليمين همة اللي فيهم اخرام! و لان الكاوتش جديد و زيي بيبقى طري زي العجينة و بيتخرم اسهل! انا في قمة ضيقي بجد لأني كنت داخل اظبط ضغط الهوا في الكاوتش و ادفعلي جنيه , بس طلعت من عندهم دافع 150 جنيه و انا ما حبتش اخاطر ان كلامهم يكون صح و انا عل طريق سفر و سرعة عالية و عملت اللي قالوا عليه و خلاص

انا عارف ان ناس كتير هتفتكرني اهبل و زبون بس انا راجل كنت عايش علطول برة مصر و متعود كل واحد بيشوف شغله كويس و شغل مين اللي يضحك على التاني ده مش متعود عليه

رايكوا ايه في الموقف ده و هل دي حاجة بتحصل علطول في الصحراوي او حد اتعرض لموقف مشابه؟

**mohamed_selim** · 13-07-2010 04:13 PM

باشا ابعد عن الاصلاح فى البنزينه ... يزود ماشى يقولك فيها حاجه قوله شكرا و روح شوفها عند حد تانى مش فى بنزينه
لو دورت فى المنتدى هتلاقى حكايات كتيره زى اللى حصل معاك
مش مشكله الفلوس كويس انك مسافر و انت مطمئن بس النصب ده زاد عن حده و فى نفس الوقت متضمنش شخص باللا اخلاق دى شغله عامل ازاى و ممكن يبوظ الدنيا علشان مفيش ضمير

و على فكره مش فى الصحراوى بس ... لللأسف فى اغلب البنزينات

**samihanwar** · 13-07-2010 04:17 PM

بصراحه 99.9% من بتوع الكاوتش نصابين وحلنجيه
ونادر لو لاقيت فيهم واحد عندو ضمير

**maghnom** · 13-07-2010 04:39 PM

شكرا على الردود يا جماعة
بس هل في التفاصيل اللي قلتها حاجة تؤكد انهم فعلا نصابين؟
او حاجة معينة في اللي عملوه معايا آخد بالي منها و اول ما اشوفها يبقى مؤشر ان ده نصب؟

انا بجد نفسي اعرف موضوع فقاقيع الصابون ده بيتعمل ازاي؟
هل همة بيخرموا العجل بنفسهم و انا مش واخد بالي او و انا جوة العربية بكسر العجل؟
برضه حتة ان كل الخرام في الناحية بتاعتهم ده مريب
خصوصا انهم قالوا اكيد الاخرام دي بسبب انك عديت بالناحية دي على ازاز مكسر
بس الازاز ما يعملش كده الا لو قطعة كاملة انحشرت جوة الكاوتش و ساعتها بتكون واضحة و سايبة اثر
بس اخرام غير مرئية عاملها ازاز؟ ازاي؟ ده كانها معمولة بدبوس

حد ليه خبرة مع الموضوع ده؟

**dolly13** · 13-07-2010 04:50 PM

كل الحكاية ان الكاوتش بيبقى سخن واول ما المية دى بتنزل عليه طبيعى جدا انه يعمل الفقاقيع دى ويبتدوا يشتغلو الزبون
طالما العربية مابتحدفش على الطريق يبقى اكيد مش مهوية لدرجة العشر اخرام
هما كدة بوظولك الكاوتش منهم لله
وعموما معلش محدش بيتعلم ببلاش لكن طالما نزلت ارض المحروسة يبقى لازم تخلى عنيك فى وسط راسك

**A.Saad** · 13-07-2010 09:43 PM

صنايعى فى بنزينة يقولك الكاوتش مخروم
تشخط فيه وتقول له اختفى من هنا
ومعلش
وصفك لمكان المحطة مش مفهوم المحطة الخضرا اللى فيها اسم مصر هيا الامارات
ودى قبل البوابات
اتاكد من المكان تانى

**maghnom** · 13-07-2010 10:02 PM

المشاركة الأصلية كتبت بواسطة a.saad

صنايعى فى بنزينة يقولك الكاوتش مخروم
تشخط فيه وتقول له اختفى من هنا
ومعلش
وصفك لمكان المحطة مش مفهوم المحطة الخضرا اللى فيها اسم مصر هيا الامارات
ودى قبل البوابات
اتاكد من المكان تانى

لا هيا قطعا ما كنتش الامارات
الامارات يمكن اكتر محطة محترمة في مصر

انا فعلا مش واثق من الاسم, على اي حال هي اول محطة في الطريق الصحراوي من القاهرة بعد البوابات و تقريبا على بعد 10 كيلو و بتنزلها في طريق ترابي

اي حد طالع اسكندرية اليومين دول يبقى ياخد باله و يقولنا

**samyomar** · 13-07-2010 10:34 PM

اخى الكريم
احب اطمنك
لست وحدك
انا كمان اتعرضت للموقف ده من سنتين و برضه كنت على سفر و محبتش اخاطر
و طلعت من البنزينه زى الباشا دافع 200 جنيه
و بعدها اكتشفت انى اتنصب عليا
و من وقتها اللى يقولى فيه خرم فى الكاوتش اقوله ملكش دعوه اضبط الهواء و انتا ساكت
و طول ما الكاوتش تيوبلس خلاص
تقدر تسافر و انتا مطمن لانه مش بينام بسرعه بياخد وقت طويل
العيب مش فينا طبعا
العيب فى قلة الضمير و الاستغلال
المهم اننا نتعلم من المواقف دى
و نصيحه من اخوك لو شكيت ان فيه خرم فى الكاوتش بلاش الخابور
خليه يحل العجله و يركبلها بادج احسن
افضل 100 مره من الخابور
و اسف للاطاله

**MoOoD** · 13-07-2010 11:58 PM

حاجه تدايق فعلاً
وكما تدين تدان ...ربنا هيكرمهم بواحد يخدلك حقك

مشكور على التحذير أخى

الموضوع: صنايعية الكاوتش في محطات بنزين الصحراوي - نصابين؟

LinkBack

أدوات الموضوع

عرض

-

-

-

المواضيع المتشابهه

عناوين وتليفونات محطات بنزين وطنية

هام لجميع الاعضاء (احذروا من بتوع الكاوتش فى محطات البنزين دى)

ما هي أفضل محطات بنزين 80

ما هى أفضل محطات بنزين من وجهة نظرك؟

محطات البنزين وعمال الكاوتش

الكلمات الدلالية لهذا الموضوع

المفضلات

المفضلات

ضوابط المشاركة