السلام عليكم و رحمة الله و بركاته


بصوا انا هحكي عالطول
العربية رينو كليو 2002 هاتشباك فرنساوي
المشكلة عندي لمبة الانجكشن .. بوابة كهربا .. مش عادية
لمبة الانجكشن بتنور عالطول و الاكسداتير يبقى ملهوش لازمة العربية بتزود بنزين لوحدها و كمان لو دوست دبرياج او فرامل اسمع صوت غبي جدا لان يعتبر بنزين وفرامل في نفس الوقت
المهم احتارت عند التوكيل كنت كل لما اروح اللمبة تطفي والعربية تعد يومين و في الاخر يقولوا مش عارفين السبب اية
اخر مرة قالوا المشكلة تقريبا كدة عندك في بوابة الانجشكن
بكام .. البوابة بتاعت العربية دي مش موجودة هنا تيجي من فرنسا باكتر من 7000 سبعة الاف جنية
ناس قالولي سيبك من التوكيل و روحت لواحد في صقر قريش تقريبا بيشتغل في التوكيل
المهم كشف بالجهاز اللي مش فاكر اسمة دة قالي اة المشكلة عندك بوابة الانجكشن عايزة تتغير
طيب اية الحل مفيش منها هنا ... قالي نقلبها عادية بدل كهربا الموضوع دة يتكلف 3 الاف جنية
سألت ميكانيكي كبير عندة مركز صيانة رينو في اسكندرية قالي اوعى تعمل الموضوع دة هياثر على حاجات كتير في العربية واكتر حجاة هتحس بيها الدركسيون هيبقى تقيل جدا معاك وهتأثر على abs
فأنا دلوقتي صراحة معييش حوالي 7 او 8 الاف علشان اغيرالبوابة
و كمان خايف اغيرها عادية تأثر على حاجة تانية
و طبعا لو بيعتها محدش هيشتريها بالحالة دي او لو حد اشتراها اكيد هيبقى مبلغ قليل اوووي


يا ريت اللي عندة حل كويس للمشكلة دي يشور عليا لاني بجد تعبت نفسيا و العربية بقالها 3 شهور مركونة

يعني مثلا لو في حل لتصليح البوابة
ولا اغيرها اخليها عادية
ولا ابيع وامري لله .. ولو حد يدي تمن للعربية في الحالة دي يقولي