الموضوع: استطلاع رأى...بيه فى مصر وللا ارزقى برة

حكاية اخونا عصام الحضرى اللى ساب ناديه ذو السمعة القوية محليا واقليما الى نادى سمعته على قده فى البلد اللى راح لها دفعتنى للتفكير فى هذة القضية

لو حيدنا كل الجوانب المادية، يعنى هنفترض ان امامك فرصة العمل فى مصر ب5000 جنيه مثلا فى مجالك (مهندس ، محاسب، طبيب، الخ) وفرصة اخرى فى الخليج بما يقابل 7000 ريال سعودى بحسب عملة البلد( وقيمتهم فى بلدهم زى ال5000 آلاف جنيه فى مصر تقريبا) وهتشتغل فى تخصصك لكن بدون ألقاب ، يعىن بدلا ما انت شغال هنا فى مصر سنيور او مدير قسم هتشتغل فى الخليج جونيور تحت رئاسة مدير هندى ، والاختيار التالت انك هتشتغل فى اوروبا سائق تاكسى او بياع فى محل ساندويتشات او بيتزا ب1500 يورو ، وفى التلات حالات عندك مكان للإقامة وسيارة متوسطة ودخلك بيكفيك اكل وشرب ولبس

ياترى اختيارك هيكون إيه وليه

سبعاوي العزيز
انت فعلا اغفلت فى الستطلاع حالة رابعة :
أعيش في بلد غربي و بمهنة محترمة و دخل محترم
لأن ده option متاح للكثيرين

---------------------------------------------------
أما موضوع بيه في مصر ....
هوا حضرتك بيه هنا ؟؟؟
و للا انت يا كريم بيه هنا ؟؟
و للا أنا بيه هنا ؟؟
نحن لسنا بهوات نحن نتحول الى مواطنين من الدرجة السادسة (واجبات بلا حقوق) و الغريب ان البلد مافيهاش درجة تالتة و لا رابعة (اولى و سادسة بس), طب لييه
دا أنا حتى لو عشت بره مصر درجه تانية (عرقيا و ليس ماديا) مش هاكون زعلان , ما هي بلدهم وأنا غريب ,
انما لما أكون هنا و مواطن مصري صالح من أبوين و جدين مصريين و امتهن مهنة في ألى السلم المهنى و في أعمل في مؤسسة هي قمة المؤسسات الوظيفية و برضه ...ماتعاملش كويس !!!!!!
ليه يعني ؟؟؟
مييين فيكو يقدر يخطط للسنة الجاية بس (مش لحياته كلها) مين يقدر يقول أنه بيطور حياته و معيشته (أو يقدر يطور مهما عمل) .
لا يوجد دخل -حلال- في مصر يكفي للطفو فوق موجة الغلاء و التضخم
و لا يوجد وسيلة حضارية و مشروعة تكفي للرؤية خلال سحب الفساد والرشوة و انعدام الضمير
و كلما تمسكت بمبادئك و دينك كلما زادت الجروح ألما كل يوم
الحل لتفادي الألم هو الموالاة , موالاة الغش بالغش و الواسطة بالواسطة و البلطجة بالبلطجة و الفساد بالفساد
و لا ينكر اي منكم انه يوما ما على صوته في مكان او دفع اكرامية (بلاش رشوة و لا فردة) في مصلحة ما , او ريح زبون جاهل علشان وجع الدماغ , او شلف واسطة علشان تقضي مصلحة ...
وأنا أولكم , عملت كده و أنا زعلاااااان
ليه ؟؟؟
ليه الحياة المموهة دي ؟؟؟ بلا شكل و لا لون ؟؟؟ ليه لازم اعيش انسان و بس ؟؟؟ ليه مايكونش ليا اسم ؟ اعرف انا مين و على فين و ليه ...و تكون مساحات اختياري اوسع فيما يتعلق بحياتي اليومية و على المدى الطويل ...

ما تعيبوش على الحضري يا جماعة
ما حدش بيسيب الراحة و يدور التعب و لا الغنى و يدور على الفقر
هوا أكيد تعبان
زينا كلنا ...او زي انا بس