الموضوع: العمل اكثر من 12 ساعة يومياً ( هو ايه بالظبط ) ؟!

المشاركة الأصلية كتبت بواسطة M.Osman

بص يا درش...
انا مش هقدر افيدك اوي
بس انا اشتغلت حوالي اسبوعين لمدة 13 ساعة يومياً حتى ايام الجمعة ..

هي كانت حاجة زي الجيش
بس اتعلمت حاجات بسيطة... و عالأقل كتبت حاجة جديدة في الـcv..
و حالياً بدور على شغل تاني...
النصيحة .. مفيهاش حاجة لو استنيت شوية في الشغل دا... اسبوعين مثلاً تشوف الدنيا ماشية ازاي و اكيد هتستفيد
و بالتوفيق

هستنى كام يوم و اقرر بعدها ان شاء الله و ربنا يوفقك و يوفقنا ان شاء الله يا محمد .

المشاركة الأصلية كتبت بواسطة SeiffoZ

إستمتع بأجازتك يا درش ..

الأجازة مش بعزقة!

سيب الشغل و أعمل حاجة تفيدك ...

سافر , كورسات لغة , إتعلم رياضة جديدة ... إتعلم أله موسيقية .....

إتعلم حاجات مش ممكن تتعلمها إللى فى فراغ الدراسة

سيف انت هتبوظنى كده , انا من اول الاجازة و انا عايز انزل الجيم تانى لان وزنى بقى ميتشفش و كمان كنت عابز اتعلم الات موسيقية كتيرة بس للاسف مزاجى مش مظبوط , حاسس انى عايز اشوف الدنيا بشكل تانى او اعمل حاجة كويسة فى حياتى لانى محتار اساسا و مش عارف الصح فين !

المشاركة الأصلية كتبت بواسطة Ahmed Nouh

بص يا درش انت كدا كدا لازم تسيبه , 13 ساعه شغل فى دراسه يبقى انسى انك تعمل اى حاجه فى الجامعه

بس لسه الاجازه فاضل فيها شهرين على الاقل مش هتخسر حاجه لو كملت منهم شهر ونص شغل وتريح الاسبوعين الباقيين قبل بدايه الدراسه

كل فتره شغل هتستفاد منها فى حياتك كتييير جدا

حتى لو الشغلانه نفسها نمطيه قوى ومفيهاش اى مهاره تفيدك مستقبلا ولا ينفع يتحط الشغل ده فى cv خليك فيه لحد ما الاجازه تخلص او تلاقى شغل احسن , اى شغل فيه حاجه جديده هتتعلمها

تحب اقولك على سبب تافه اتعلمته من شغلانه تافهه نفعنى جدااااااااااا فى شغلى الحالى ؟

اشتغلت فتره كوول سنتر فى فودافون , اتعلمت اكلم العملاء فى التليفون وفهمت دماغ الشاب اللى قاعد جوا الشركه بيكلم العميل

دلوقتى بما ان شغلى حاجات مهمه فيه معتمده على مصاحبه والطبطبه وتوقيع بتوع خدمه عملاء الشركه فى الكلام حسيت ان ال 6 شهور اللى ضاعوا من حياتى فى فودافون ادونى افضليه فى شغلى كبيره علشان محدش من اللى شغالين معاى كلهم بيعرف يتعامل مع موظفين خدمه العملاء وبيلطشوا مع بعض سريعا ( بنكلمهم ممكن 6 مرات فى اليوم )

اطحن نفسك يا باشا ربنا يوفقك , و من النهارده ودع اهلك واصحابك

اثنين صحابك دلوقتى بس هيوحشوك , اكل الست الوالده والسرير :)

نوح انت كده خبرة و الله , لان فعلا اكتر اتنين وحشونى هما السرير و اكل البيت ( ده انا معدتى باظت ) , انت ادتنى دفعة ايجابية بس اللى يعوقنى انى لسه بدرس بس ربنا يسهل و احاول اوفق بين الاتنين .

المشاركة الأصلية كتبت بواسطة A7MED_PHARMA

أنا بقالي 3 سنين تقريبا

بنام 8 ساعات (في المتوسط)...وبشتغل 16 ساعة
هههههههههه

بس أنا أخدت على كده...وعلشان أنا صاحب الشغل..لو ينفع أني مانمش وأفضل قاعد في شغلي
كنت عملتها

لما تكون إنت صاحب الشغل..تحس إنك عاوز تديله كل وقتك
ومش فكرة فلوس بس...
لا
فكرة إنك تشوف مشروعك بيكبر قدامك

لازم طبعا تموت نفسك علشان مشروعك , لكن لو شغال بره هتحس انك بتتعب زيادة عن اللزوم , ربنا يوسع عليك فى صيدليتك ان شاء الله .

المشاركة الأصلية كتبت بواسطة أبو إياد

بالنسبه لانك طالب فالعمل من اجل العمل وليس العمل من اجل المال
اكتسب خبرات واتعود على العمل واشتغل كل ما هو صعب لا من اجل المال انما من اجل اكتساب خبرات التعامل مع الاخرين والتعود على الشغل علشان لما تتخرج وتشتغل الشغل اللى نفسك فيه وبتحبه هتلاقى نفسك انت عاوز تتعب فيه علشان تنجح وده لانك متعود على الشغل

صدقنى هايجى عليك وقت وتفتخر كل الفخر بما انت فيه الان
اشتغل اى حاجه افضل من انك تدور على شغل او انك تقعد فى البيت
لان الشغل فيما بعد هتلاقيه سهل اوى
وربنا يوفقك

و الله ما ببحث عن المال يا ابو اياد ( فقط ) لانى ابقي كذاب لو قلت ان لازم الاجر يكون كويس , و لكن بس ده بعتبره نوع من التحفيذ للشخض ذاته بدل ما تكون معنوياته واقعة طول الوقت , و فعلا الشغل مهما كان افضل من قعدة البيت بس مياخدش كل الحياة ليه بس !

المشاركة الأصلية كتبت بواسطة heshamzaky

بص عفوا فى الى حا اقولة انت ذكرت انك لم تتخرج يعنى فى بيت الحاج و طبعا هو قايم اكيد بالواجب وزيادة 13 ساعة عمل كتير جدا مش حا تلاقى وقت تعيش و تستمتع بكرة يا بطل لما تتجوز حا تتمنى يوم من ايام بيت الوالد حاول تشوف شغل اخر تكسب من مهارة و خبرة حقيقية الا لو كنت ناوى تشتغل فى التجارة مثلا لو حا تشتغل فى التجارة مش فى وظيفة يبقى انت فى مرحلة اعداد و المرتب مش مشكلة كأنك بتاخد كورسات مجابا و كمان بدل أنتقال لو مجرد مرحلة و مش حا تكمل فى الاعمال الحرة شوف حاجة تانية خصوصا ان كدة سنك لسة شباب و صغير و شكرا لك

ده تفكير واخد نصف العملة الاخر و عامل لى وسواس , هل انا كده صح و لا غلط ؟ هى دى النقطة اللى مش فاهمها , و لكن بصراحة حاسس انى صح بنسبة كبيرة بالرغم من التعب , ممكن الشغل ده يكون له فائدة فى المستقبل ! الله اعلم :) .

المشاركة الأصلية كتبت بواسطة mody_benz

ربنا يوفقك وشوف اللى فى مصلحتك واللى هيفيدك وهيزودك علم وخبرة بالحياة اكتر

امين يا رب , متشكر جدا .

المشاركة الأصلية كتبت بواسطة hema_lancer

ممكن تدور علي شغل وانت معاه
وبأذن الله هتلاقي :)
بس خليك يعني انت بتعمل ايه في الأجازه
اتعلم حاجه جديده
اتعلم الاختلاط بالناس
كل ده بيديلك ثقه في النفس :)

انا بدور على غيره بالرغم من ان هيزعلوا منى جدا و لكن ده مش بمزاجى !

المشاركة الأصلية كتبت بواسطة mexmarine

لازم تدرب من دلوقتى لأن الزمن اللى احنا فيه فيه حاجتين . الاولى تبقى موظف حكومه من 9 الى 2 و تاخد ملاليم الا لو فتحت الدُرج لا قدر الله و الثانى انك تشتغل اكثر من 12ساعات و ممكن تكون مسافر و مرمى فى نصف البحر و مفيش غير طياره تقدر توصل لك و تنزل اجازه كل اسبوعين هههههههههه زى حالاتى كده

انا بحاول اكتسب خبرة على قد ما احاول بس حاسس انى تايه شوية فى " بكره " !

المشاركة الأصلية كتبت بواسطة zalpany2000

درش

جميل انك تحس انك طاقة فعالة ومنتج و بتتحرك وتشتغل ... وتحس انك راجل .. وانا مع رأي الزملا ... ماشي طبعا تشتغل و تطحن وتنشف
لكن ماتنساش نفسك ... انت لحد دلوقتي لسه طالب... يعني تشتغل ... وتخرج ... وتنبسط وتعمل كل اللي انت عايزة
رأيي جرب كمان اسبوع
و بعدين دور علي شغل طبيعي يعني 6 - 8 ساعات
و اشتغل فيه وفي نفس الوقت اخرج و انبسط مع اصحابك
لان ببساطة الشاب الطموح اللي زيك بعد ما يتخرج علي خير ان شاء الله الشغل هايطحنك و تلقائي هاتلاقي نفسك بتشتغل 24 ساعة .. حتي برة الشغل .. دماغك شغال
ربنا يوفقك و يكرمك

كلام معقول و الله يا دوك و ده اللى ناوى عليه باذن الله من اول يوم نزلت فيه , ربنا يقدم اللى فيه الخير ان شاء الله .

المشاركة الأصلية كتبت بواسطة misoalex

الكلام ده صح

وحيجى يوم تفتكر الشغل ال 13 و15 ساعه وتفتخر بنفسك انك عملت حاجه

انت لسه فى بدايه حياتك مش حتقعد على مكتب وتشتغل 7 ساعات وتقول تعبت
انت طول منت شغال حتكسب خبرات جامده حتفيدك فى حياتك كلها
ده ممكن الخبرات دى تغير مصير حياتك صدقنى

انا مش بدور على الراحة و الله يا ميسو و لكن الشيء لما يزيد عن حده بقي انت عارف ! و الخبرة بتفيد فعلا و اتمنى انها تفيدنى مستقبلا ان شاء الله .

المشاركة الأصلية كتبت بواسطة omaroof

الشغل اللى انته فيه ده عادى لانك بتشتغل شغل حر
وماتبصش للفلوس بص انته حاتكسب ايه( خبره-قوة تحمل اكبر- احتكاك فى سوق العمل-تمرين يفيدك فى المستقبل-حايشغلك عن حاجات كتير وحشه اهمها اصحاب السوء ربنا يبعدهم عنا جميعا)
وربنا معاك ويقدرك على التعب اللى انته فيه

و الله كمان مش بدور على الفلوس خااااااالص , لا انا بس عايز احس ان المحهود على قد المكافأة , مش عايز احس انى بتعب على الفاضي الخبرة اه مفيدة جدا لكن برده اكثر من 13 ساعة عمل لازم احس ان فى مكافأة قصاد كده .

المشاركة الأصلية كتبت بواسطة a.saad

درش
مين قالك ان احنا بعد ما اتخرجنا ماشتغلناش 12 ساعة برده

احمد بيك , انا عارف ان الشغل كله تعب و ما شبه ذلك , و لكن بس انا نازل فى الاجازة استفاد , فصعب انك تجيب حد من الدار للنار , يعنى محتار اعيش حياتى عادى و لا انزل اشوف خبرات الشغل ! فخايف اصتدم بخيبة امل ربنا ما يجيبها ان شاء الله .