معاناتنا اليومية فى شوارعنا البهية (فضفض معانا بدل ماتفرقع )
انا عامل الموضوع دة ... كبديل موفر عن الدكتور النفسى الى المفروض كلنا نروحله من وقت للتانى ... للتنفيس عن الكبت والغيظ والسخط الى جوانا ... من السواقة والمشى فى شوارع القاهره الكبرى وطبعا حاجات تانية كتييييييييييييييييييييييي ييييييييير .
وحبدأ بنفسى
انهاردة نازل ... من الصبح الساعة 9 ونصف صباحا بوصل والدى للدكتور لعمل بعض الاشعات والتحاليل .. مكان المركز الطبى( وسط البلد ) ....
لفيت وسط البلد وعابدين انى القى مكان اركن مافيش ... واتفرج على جراش البستان كان فى حوالى طابور 20 عربيه او اكتر عاوزين يدخلو .... المهم قولت حنزله قدام المركز .. وحركن العربية صف تانى وحستنى فيها وامرنا الى الله . وفعلا نزلتة وقعدت فى العربية المهم طلعا بعد 10 دقايق الباشا امين الشرطة لقيتة ظهر بطلته البهية ... قومت ماشى وقعدت الف ودخلت شارع شبمليون لقيتة فاضى خالص لان النهاردة الحد وكل المحلات قافلة .
لمهم ركنت صف تانى بردة لان مكانش فى مكان وقاعد فى امان الله القيلك واحد برشط عليا من السما بيقولى .. ( حتركن ولا قاعد فيها ) زى مايكون بيبيع حاشيش فى الافلام القديمة ... المهم قولتلة لا قاعد فيها بستغراب من طريقتة ؟
بعديها ب دقيقتين .. برشوت كبييييييير هبط ولا اتحدف معرفش اية القصة !!
الاقى واحد بدقن ( كبيرة وطالعلة زبيبة قد قعر الكوباية فى قورتة ) بيقولى بكل عجرفة ... قدامك كتيير !!!
انا كنت حاطط سماعات الموبايل فى ودانى وبسمع الراديو .... المهم انا قولت انا سمعت غلط ولا اية !!
شيلت السماعات وقولتلة نعم وانا ببرقلة ؟؟
قالى قدامك كتير !!!
قولتلة اة قدامى شوية فى مشكلة ؟
يرد يقول اية - اصل دة موقف والركنة هنا ب 3 جنية ( بكل قلة ادب ) !!!
قولتلة ازاى يعنى ... وطلعت من الشباك قولتلة انا واقف فى شارع والمحلات قافة .. موقف اية الى بتتكلم عليه ..دة حتى مافيش يفط بتقول موقف لا بتنجان
يزود فى البلطجة ويقولى لا احنا معندناش يفط عاوز تقف اطلعلك عربية ( من الى راكنين صف اول ) وتدخل تركن وتدفع ال3 جنية ) .
سكت وكنت بحضر نفسى انى افتح الباب وانزل اضربة او اقتلة واطلع فية غيظى من البلد واحوالها ... وفى اللحظة دية فكرت فى ابويا الى عند الدكتور والبهدلة الى حتحصل وبالاخص ان كان فى كذا واحد تبعة واقفين فى الشارع !!!
المهم مسكت اعصابى بأعجوبة احسد عليها بجد .. وقولتلة ب 3 جنية ... لا خليهالك وقمت مدور العربية ... وبحضر نفسى انى امشى
ورد علية الحقير الواطى وبيقولى انا مش مستنيك لما تخلهالى . ( قصدة على ال3 جنية )
وقفت على اساس انة حيزود فى الكلام وانزلة ... وسالتة انتا بتدخل الجامع وبتصلى ( على المشيخه الى عاملها فى وشة ) قالى الحمد لله وملكش دعوة
قولتلة وانا بغلىىىىىىىىىىىىىىىى ربناااااااااااااااااا يكتر ايماااااااااااانك .
وقعدت باقى اليوم وانا متغاااااااااااااااظ انى معملتش معاه حاجة وسيبتة يبلطج عليا الحقير دة الى مربى دقنة و عامل فيها متدين .....
قولولى انا غلطان انى سيبتة .. ولا كنت انزل اتخانق معاة ... ولا كنت اروح اعمل بلاغ فى القسم (( معلش بحلم شوية بالقانون والمساواه )) .
ولا اشيل معايا صاعق .. واى حد يحاول يبلطج اجر شكله واصعقة وارتاح ولا اية ... انا مباقتش عارف حاجة الصراحة ؟
* ملحوظة الى عاوز يشوف الراجل دة يجرب يقف صف تانى فى شارع شامبليون على صف الكيلانى بتاع قطع غيار فيات قبل الكيلانى بحوالى 50 متر
الى فاقعنىىىىىىى بقى ان الحيوان دة كان معاه حوالى 15 مفتاح عربية ... يعنى ازااااااااى الناس كمان بتسيب عربياتها كدة لناس حقيرة وسفلة زى دول ...
ياترى واحد زى دة يتعمل معااااااااه اية ؟؟؟؟؟؟؟؟؟؟؟؟؟؟؟؟؟؟؟؟؟؟ علاشان انا متغااااااااااااااظ:mad: