أجمل ما قرأت في موضوع اختيار البايك المناسب للمبتدئين
الراجل مفند اسباب رغبة كتير من المبتدئين واستعجالهم في ركوب مكن عالي زي ال 600 وال 1000
وواخد نقطة نقطة وموضح ليه ده بيكون تفكير مش في محله
هو الموضوع بالانجليزي بس اهم نقط (حجج) هو فندها في هذا الموضوع:
الجديد اللي عاوز يركب بايك ريس دايما يجادل في واحده من دول:
1. انا ما اقدرش اجيب غير مكنة واحدة بس..فعايز من الاخر اجيب الحاجة اللي عجبتني وشدتني حتى لو عالية
وبعدين انا ما عنديش وقت ولا انا حمل اني اشتري وبعدين لما احب ابيع ادور على مشتري وبعدين ارجع بيع...الخ
2. المكن الصغير شكلة مش حلو ومعظمه موديلات قديمة اوي ومش استايل..وانا عايز حاجة من الاخر شكلها قوي وجامدة
3. انا طويل او ضخم والمكن الصغير ده ما ينفعنيش وهيبقى شكلي عليه نكته والناس هتتريء عليا..
4. انا راجل هادئ اصلا ومش بتاع جري ولا شد..وهاخد الموضوع واحدة واحده براحتي ..فحتى لو المكنه كبيرة..انا هاخد بالي لحد ما اتعلم وان شاء الله بالحرص مش هيبقى فيه مشكلة
5. ناس كتير بدأت على مكن 400 و600 وحتى 1000 وما حصلهمش حاجة..وانا شايف اني مش اقل منهم فهجرب وربك ستير.
طبعا الراجل صاحب الموضوع فند الحجج دي واحدة واحدة..ومقدرش اقول غير ان كلامه غاية في الاقناع لانه عقلاني ومنطقي
وفي الاخر هو بيلفت الانتباه لنقطتين مهمين:
1. البايك الريس مش هو المكنة المناسبة للمبتدئين (بشكل عام فان كان ولا بد يبقى 250)
2.لازم تسأل نفسك الاول انت عاوز تركب ليه (يا ترى علشان الشكل وبس ولا انت اصلا حابب تستمتع بالركوب)
انا شايف النقطة الاخيرة دي مهمة جدا..واللي بسببها ناس كتير بتركب يومين وعند اول مشكلة او تمل بعد فترة فتنهي الموضوع
بصراحة انا شخصيا فكرت في كذا حاجة من دول لما بدأ موضوع البايكس ده معايا
وبصراحة كمان الاخوة هنا حذروا كتير واتكلموا في كذا نقطة من دول
بس حبيت انقلكم الموضوع كله للافادة..وللاسف هو انجليزي بس اكيد ناس كتير هتستفيد
