الموضوع: كيف تحول لانسر إلى ايفو

أولا أحب أوضح إن الايفو ينفع تروح بيها الشغل وتتمشى بيها وتستخدمها Daily use car ولها برستيج تاني لان شكلها غير الانسر العادية نهائي

تاني حاجة مفيش عربية ايفو جاية متقطعة استيراد ينفع تتلحم في بعضها لانها بتكون جاية 5 قطع مش نصين علشان كده لازم HOST أو لانسر تانية يا اما نلحم عليها أو ننقل فيها


و الصح اللي بيتعمل بيكون نقل قطع مش أكتر مع تغيرات بسيطه في شاسيه الانسر علشان نركب الات الجر


يعني مفيش نصين للي عايز يطلع عربية صح ويصرف عليها شوية زيادة



علشان تعمل ايفو في حلين واحد سريع ومش مكلف و محدش بيرجحه وهو لحم الربع الخلفي كامل في الانسر العادية بالت الجار بالتنك زي ماهوا كده


وواحد مكلف شوية وهو تفكيك النسر على الشاسيه وشرحه في الايفو و النقل


أنا هاتكلم في الصح وهوا نقل ايفو في لانسر عادية بدون تقطيع الشاسيه أو لحام نص أو ربع


الموضوع ماديا بيعتمد على نوع الانسر أو الايفو اللي هتعملها


خلينا نتكلم هنا على ايفو 7
واللي يقابلها في الانسر '' المكواه


يفضل إن الانسر اللي هيتعمل عليها المشروع متكونش حالتها كويسة يعني لو عربيتك نضيفة وحالتها كويسة بيعها وهات عربية طلعان عينها وكل حاجة فيها بايظة من متور وعفشه و صالون ودي تمنها بيكون في حدود 25 ألف ل 35 ألف جنيه على حسب الحالة وده طبعا للمكواه لو كريستاله السعر ممكن يقل


هنجيب الايفو طبعا نصين وبتكون عربيه كاملة شاملة كل شي لو مش متقطعه المفروض تمشي بدون مشاكل


وإنت بتشتريها حاول تحرص على إن كل مسمار فيها راكب وسليم والصالون سليم لان كرسيها غالية جدا وإن عدادها مش عامل كتير يعني 60 أو 70 ألف اقصى تقدير


تأكد إن كل الات الجر مابتجبش زيت العربية فيها 3كرونه و LSD و AYC وتأكد إن عمود الكردان والكبالن سليمة


تأكد إن الموتور سليم وإن التربو نضيف ومفيش تبخر زيت حواليه و إن الانتركولر مش مخبوط


يفضل تجيب عربية بدون تعديلات نهائي يعني حتى الفلتر مش راكب فيها علشان تضمن إنها مكنتش بتتهان وإن صاحبها جايبها FOR EVO OWNING مش علشان يسابق أو يدريفت بيها وغالبا العربيات اللي بتيجي من اليابان بتكون نضيفة جدا جدا واطمن ليها بنسبة كبييرة


تمن الايفو 7 في السوق دلوقتي من 55 لحد 70 ألف على حسب الحالة والكيلو متر والتعديلات


تمن الايفو 4,5,6 من 25-40 ألف جنيه بردو على حسب


الايفو البطه 1,2,3 تمنها من 18-25 ألف برده على حسب


هتحط النصين بتوع الايفو عند الميكانيكي علشان يفضيهم من كل حاجة هيطلع الموتور ويفك العفشة ويفك الات الجر قدام ووره وفي النص وطبعا الكردان بيكون مفكوك لوحده , هيفك التانك ويغسله وينضفه


هيجيب كهربائي يفك الضفيرة كاملة وضفره الات الجار . العربية دي فيها 3 كمبيوتر مش واحد ECU الاساسي واتنيه علشان ال AYC وال ESP


هيفك مواسير ال ABS بعناية مع الجهاز بتاعها


طبعا هيفك التابلوه والعدادات ونلاحظ هنا إن الدركسيون يمين وهيتنقل شمال في الانسر


المهم هيفضي العربية تماما


تاخد النص والوراني '' أو الشنطة كاملة ومعاك الانسر المكواه على السمكري لتنفيذ المرحلة التانية


هيفك الزنب بتاع أرضية الشنطة اللي في نص الايفو


وهيعمل نفس الكلام في الانسر ويركب أرضية الشنطة بتاع الايفو على الانسر لان فيها أماكن تثبيت الات الجر
الخلفية وبكده تكون تغلبت على 70 % من الاختلاف مابين شاسيه الانسر وشاسيه الايفو


يشيل أماكن تثبيت الكردان أو كرسي النص تحديدا من الايفو ويركبها في الانسر من تحت وبتكون تقريبا في نص العربية


كده الانسر بقت ايفو بنسبة 80 كشاسيه الباقي تقوية خفيفه ودي بنستعوض عنها بـ strut bars بتركب 2 قدام و 2
وره وانتهينا


السمكري خلال شغله هيجيب سروجي يفك كل فرش العربية من جوه ويخليها على الصاج ونفس السروجي هو اللي هيركب كل حاجة تاني من فرش وصالون وسقف وفرش ابواب وخلافه في العربية تاني لكن هتكون حاجة الايفو مش
حاجة الانسر



الحلقة اللي جاية هنكمل عند الميكانيكي
هانكتب لستة أسعار وتكاليف
هنرجع تاني للسمكري
هنحاول نعمل جدول زمني للعملية

انتظرواااااا

المشاركة الأصلية كتبت بواسطة evo

متشكر يا جماعة على الردود وبالنسبة للصور في الحقيقة أنا معنديش صور لان أنا معملتش الموضوع علشان عربـيتي original أنا كنت بتابع عربية صاحبي وهي بتتعمل وماصورتش إلا صور بسيطة ومش عايز انزلها علشان ممكن يضايق

يا جماعة عاوزين تفاعل أكتر من كده علشان الحماس يزيد وتشجعوني أكتب باقي الحلقات بالتفصيل الممل

طيب لو مفيهاش تطفل ممكن تكملنا عن عربيتك يعني وتعرفنا اكتر بالايفو على الطبيعه