استفسار عن رش جنوط السيراتو اسود

**Mshawky** · 13-08-2010 11:38 PM

المشاركة الأصلية كتبت بواسطة khaledtorky

بص ياباشا ..
انزل عند اى حد بيبيع بويات ( موان ) واشترى سبراى ماط لونة اسود ده لو عاوز اللون مطفى او لامع لو عاوز اللون يبقى اسود لامع وقولة كمان عاوز سبراى ورنيش شفاف ..
هترش الجنوط بتاعتك عادى جدآ بالآسبراى الأسود سواء كان ماط او لميع وتسيبة ينشف براحتة بس المهم الكاوتش بتاع الجمط يكون نضيف جدآ جدآ ومايكونش واقف فى الشارع او اى مكان فية تراب يكون تحتة كمان نضيف وتسيبة ينشف براحتة لمدة نصف ساعه للماط , و ساعه للامع , وبعد كدة تجيب سبراى الورنيش الشفاف وترش الجنوط بية تانى لآن ده بيكون عازل ضد التراب والتقشير واى اضرار ممكن تحصل للون الأسود . لآن خلى بالك لو انت رشيت سبراى اسود بس هيقشر وهيبقى شكلة بشع .. ده حل ..
عندك حل تانى .
انك تروح لآى فرن طلاء معادن
وتديلة الجنوط وتقولة عاوز ارشهم الكتروستاتيك وعاوز كمان اورنشهم شفاف والتكلفة هتبقى فى حدود من 50 الى 70 جنية

انت راجل زى الفل

انا كنت لسه هوديهم الاسبوع الجاى لواحد بتاع دوكو بس كان هيرشهم دوكو عادى اللى هو بيرشو بيه العربيات ده
فهل لو جبت العلبتين دول السبراى والورنيش يدونى نفس النتيجه ومش محتاج لبتاع دوكو ؟
لانى كده كده مكنتس هروح لفرن علشان مش عايز افك الكاوتش من على الجنط خالص هرشه وهو راكب عليه بس هفك العجله بس

ايه رايك ؟

**Mshawky** · 13-08-2010 11:39 PM

المشاركة الأصلية كتبت بواسطة mimohsen

انا عربيتي لانسر شارك نبيتي والجنوط فضي ... ايه رايكوا اعمل الجنوط اسود ؟ ... التوبيك ده طلعها في دماغي

لو هتعملو اسود خليه اسود فى نبيتى

**khaledtorky** · 17-08-2010 04:19 AM

اسف على التآخير ياباشا بس انت عارف رمضان بقى والشغل وكدة :d
>>>>>>>>>>>>>

بالنسبة للآفضلية هتكون طبعآ للفرن الألكتروستاتيك افضل من اليدوى , لآنة بيديلة درجة سخونة فبتخلى اللون والورنيش يطبع اكتر على الخامة ..
بس ده مايمنعش طبعآ ان اليدوى مش حلو , اليدوى نتايجة برضة حلوة بس اهم حاجة عندك سواء ده او ده الورنيش الشفاف لآنة بيعمل عازل :)
وحتى لو بتاع دوكو برضة لازم يدية ورنيش شفاف وبس كدة :D