عرض للطباعة
السلام عليكم
بعد اذنكوا كنت عاوز اعرف السوزوكى sx4 سيدان عاملة معاكو ايه؟؟؟؟و اخبار الثبات ايه؟؟؟و اخبار استهلاك البنزين ايه؟؟؟و كمان اخبار اعتمادية العربية و اخبار اعتمادية قطع غيارها؟؟؟هل بتحتاج تغير حاجات كتير ولا الحاجات بتاعتها معمرة ,و كنت عاوز اعف لو فيه عيوب فيها ايه هى؟؟؟ و المميزات طبعا؟؟؟و ياريت اصحاب العربية يقولوا العربية عاملة ايه معاهم
و شكرا
ياه يا جماعة محدش معاه سوزوكى sx4 ولا ايه؟؟؟؟
فينكو يا جماعة؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟فين الردود؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟
وعليكم السلام ورحمة الله وبركاتهاقتباس:
المشاركة الأصلية كتبت بواسطة basemsaeed
اولا اسف على التاخر في الرد النت عندي فاصل من اسبوع ولسه جاي
باختصار الsx4 عربيه محترمه بجد ... معايا 2009 سيدان من شهر 10 اللي فات وماشي 16000 كم
هرد على نقطه نقطه حضرتك عايزها
الثبات ... ممتاز ... العربيه عفشتها سبور وده مديها ثبات رائع ومن خلال تجربتي على طريق العين السخنه - اتنين ركاب ومشغل التكييف - وصلت لسرعة 195 كم/س واعتقد ان كان ممكن تجيب اكتر لو قفلت التكييف وقرصت عالتالت شويه ... فعلا فعلا وبكل أمانه ماكنتش حاسس بالسرعه اللي انا ماشي بيها دي وبالعكس كمان فوق ال 140 حسيت ان العربيه وطيت وكلبشت اكتر في الاسفلت
استهلاك البنزين ... بالمقارنه مع السيارات ال 1600 الاخرى يعتبر استهلاكها في المعقول ... جوه البلد يا دوب بتعمل 200 كيلو في الصفيحه والكمبيوتر بيحسب 10.2 كم / لتر ... لكن في الطوالي موفره جدا ...
الاعتماديه ... الياباني عموما والسوزوكي معروف باعتماديته العاليه قطع غيار معمره ... الحمدلله لغاية النهارده ماغيرتش فيها حاجه وزميلنا مهندس محمد مكاوي معاه العربيه موديل 2008 وعامل اكتر من 85 الف كيلو وماشاء الله ماغيرش اكتر من تيل الفرامل ... وبالمناسبه الكاتينه جنزير مش محتاجه تغيير في الصيانه بعد كده
عموما مميزات العربيه ... محرك قوي واقتصادي ... كماليات ممتازه ... وسائل امان abs + ebd + 2 airbags ... باور كهربا خفيف والعربيه واقفه وبيتقل مع السرعه ومش بيحمل عالموتور ... عفشه سبور وثبات عالي ... ياباني 100% ... تكييف رائع ... عزل ممتاز ... عاليه عن الارض ( اعلى عربيه سيدان في مصر ) ... شنطه واسعه ( 515 لتر اوسع شنطه عربية سيدان في فئتها ) ... التوكيل جيد وموفر كل قطع الغيار ... العربيه عموما تحس انها well built وتستاهل تمنها وساعات بحس ان فيها مزيج بين الياباني والاوروبي ( قريت في موقع سوزوكي ان العفشه والفرامل تصميمهم اوروبي )
عيوبها ... بسبب وجود الباور الكهربا في صوت خبطه بسيط من الناحية اليمين ... العفشه سبور وبالتالي ناشفه شويه ( هي رائعه على المطبات العاليه ومقرفه في المدقات ) ... الكراسي رياضيه وبالتالي متعبه شويه في المشاوير الطويله ( يمكن حل المشكله بكسوه طريه ) ... الفرش فاتح وبيلقط بقع بسرعه لكن خامته سهلة وسريعة التنظيف ... صوت الموتور عالي ... فيه نقطتين تانيين لكن انا هقولهم بتحفظ ... النقطه الاولى اعادة البيع ( قد تكون منخفضه نظرا لقلة انتشار العربيه لكن انا عن نفسي مش بشتري عربيه ياباني معمره عشان ابيعها السنه الجايه ولما اقول هبيع مش هبيع غير بالسعر اللي يرضيني ) ... النقطه التانيه قطع الغيار ( برضو لان العربيه مش منتشره ممكن تكون قطع غيارها مش منتشره لكن انا مانزلتش سالت بره التوكيل بنفسي وبالتالي مقدرش أؤكد ان قطع الغيار مش موجوده بره زي الحرفيين وشارع دمشق مثلا ) لكن التوكيل موفر قطع غيارها وباسعار معقوله في رينج بقيت العربيات الياباني
ان شاء الله قريب هعمل تقرير مصور بالتفاصيل الممله وهكتب اسعار قطع الغيار في التوكيل
اتمنى اكون افدتك وربنا يوفقك
أحب بس أنبه على اي حد ناوي يشتري العربيه دي انه يفحص الرفارف الخلفيه ... لأن للأسف عربيتي اكتشفت فيها ( بروز ) في الرفرفين الخلفيين عالناحيتين زي بعض بالظبط ولغاية دلوقتي مش عارف سببهم ايه ... كنت فاكر في الاول انها طبيعيه لغاية لما خدت بالي من اخواتها في الشارع مافيهمش العيب ده ... هبقى اصورها ان شاء الله عشان تشوفوها
احتمال بقى ادخل في نزاع مع التوكيل لحل المشكله دي بس بعد ما اجرب معاهم بالذوق الاول وربنا يقدم اللي فيه الخير ... هو نصيبي جه كده الحمدلله على كل حال لكن العربيه فعلا ممتازه والموضوع ده اعتقد انه فردي بسبب سوء التخزين غالبا
اقتباس:
المشاركة الأصلية كتبت بواسطة Dr_Smart
اولا اشكر رد حضرتك عليا و على الحيادية فى الكلام
ثانيا انا حناقش معاك العيوب عشان فيه حاجات مفهمتهاش
بالنسبة لموضوع ان عشان الباور كهرباء يبقى فيه خبطة فى اليمين,معلش ايه علاقة الباور الكهرباء بالخبطة؟؟؟هل مثلا قصدك بيأثر على حاجة؟؟؟
بالنسبة للكراسى الرياضية بش المفروض دى بتبقى مريحة ولا ايه؟؟؟
بالنسبة لصوت الماتور,حضرتك قولت فوق ان العزل ممتاز,هل ده بالنسبة لصوت الماتور جوه العربية ولا قصد حضرتك الازعاج اللى بيبقى فى الشارع؟؟؟؟
اما بالنسبة للنقطتين اللى حضرتك قولتهم فى الاخر انا معاك فيهم بش مهمين بقدر ان العربية تكون كويسة و مريحانى
و ان شاء الله فى انتظار تقرير حضرتك:S_thum1[1]:
و طبعا متشكر ليك جدا,لان حضرتك افدنى جدااا و مستنى رد حضرتك على باقى استفسراتى
اقتباس:
المشاركة الأصلية كتبت بواسطة dr_smart
متشكر ليك جدا يا استاذ احمد لتنبهيه اى حد يشترى العربية من الحتة دى
بس انت روح للتوكيل و ان شاء الله حيحللك المشكلة على خير من غير مشاكل ولا حاجة من دى
و ربنا يكفيك شرها
العفو يا فندم يا رب بس اقدر افيدكاقتباس:
المشاركة الأصلية كتبت بواسطة basemsaeed
موضوع صوت الخبطه ده ... انا كنت فاكر ان فيه عيب في علبة الدريكسيون او عايزه تربيط عفشه لكن لما سالت في الصيانه في التوكيل قالولي الصوت ده طبيعي عشان تصميم الباور الكهربا بتاعها بيكون أجزاؤه اقل من الباور الهيدروليك وبالتالي بينقل الصوت ده بوضوح ... ده كان تفسيرهم والله اعلم بمدى مصداقيتهم بس انا لسه حاطط الموضوع في دماغي وهسال فيه تاني ... لكن هو مش مأثر على حاجه .. الباور زي الفل ودقة توجيه ممتازه .
هي الكراسي مش رياضيه زي الريكارو يعني ... مش عارف أوصف بالظبط ... لكن هي ناشفه شويه
انا بقول العزل عن الشارع ممتاز ... لكن الموتور صوته عالي جوه الكابينه على الرغم من وجود عازل بينه وبين التابلوه لكن متهيالي انه عازل حراري مش عازل صوت ... طبعا هو مش واصل لدرجة الازعاج لكن لو مش بتحب تسمع صوت الموتور خالص يبقى ده ممكن يضايقك ... لكن انا عن نفسي بفضل يكون الموتور مسموع بيدي متعه اكتر في السواقه .
لو فيه اي حاجه مش واضحه انا تحت امرك .
لو نويت ان شاء الله حاول تعملها test drive في التوكيل وركز على العيوب اللي قلتلك عليها وشوف تقييمك انت ايه ... انا جربتها قبل ما اشتري لكن ماخدتش بالي من الحاجات دي عشان مميزاتها كانت اوضح ... لو عايز مساعده في الموضوع ده او الشراء عموما قوللي وان شاء الله اقدر اساعدك في التوكيل .
اقتباس:
المشاركة الأصلية كتبت بواسطة dr_smart
اولا شكر يا استاذ احمد على تعبك بجد معايا و بجد بستفيد منك
انا بصراحة حوار الخبطة ده انا مصدقك فيه بس بش مصدق كلام الصيانة فيه
حضرتك لو بتعمل فى ابو رواش,جرب تروح للسبع موتورز بيقولوا المهندسين هناك ما شاء الله كويسة جدا و طبعا الكلام ده من خلال قراتى لموضوعات المنتدى و انهم اكتشفوا هناك فى السبع الحل لسبب زيادة استهلاك البنزين فى الصنى
طب بالنسبة للكراسى,هل الكراسى اللى قدام بس هما اللى نشفين ولا الكنبة كمان؟؟و هل لما حضرتك عملت فرش ليها بقت اريح ولا لا؟؟؟؟
بالنسبة لصوت الماتور هل هو عالى بدرجة كبيرة ولا عادى؟؟؟يعنى مثلا مع المشى العادى من غير جرى,هل صوته عالى؟؟؟ولا مع الشد و القرص بس؟؟؟
بجد انا تعبتك معايا يا استاذ احمد كتير و لسه بتعبك,معلش اعذرنى الواحد لما يعوز يشترى عربية لازم يقعد يدور على الاحسن
انا كنت بفاضل بينها و بين التيدا الفول اوبشن بش البلس,و لقيت كماليات السوزوكى اكتر منها و سعر اقل و الاتنين يابانى,عشان كده حاطط السوزوكى اكتر فى دماغى شوية
بس هو التوكيل فعلا بيعمل تيست دريف؟؟؟و يا ترى الاجراءات ايه عشان التيست ده؟؟و مدته قد ايه؟؟؟
معلش يا استاذ احمد تعبتك
عندنا في ديهاتسوا نفس المشكله و نزلوا علبه معدله المفروض انها محشوة من جوة علشان متنقلشي الصوت يعني نقل الصوت دة شيء طبيعي في الباور الكهربا لكن يمكن علاجهاقتباس:
المشاركة الأصلية كتبت بواسطة dr_smart
مفيش تعب ولا حاجه انا تحت امركاقتباس:
المشاركة الأصلية كتبت بواسطة basemsaeed
اعتقد ان السبع مش شغال في السوزوكي ... مودرن موتورز بس
الكنبه مريحه جدا بس التيدا أوسع
صوت الماتور مش عالي مع المشي العادي ولكنه مسموع
انا كنت بفكر نفس تفكيرك و كنت بفكر في التيدا برضو واخترت السوزوكي عشان نفس الاسباب لكن نصيحتي ليك انك تجرب العربيتين ... طبعا الواحد مش بيغير عربيته كل يوم عشان كده حاول تجرب الاتنين ...
التيست درايف للsx4 انا حجزت في مودرن موتورز فرع مدينة نصر شارع عبد الرازق السنهوري من عباس العقاد ولما عربية التيست درايف وصلت كلموني عشان اروح اجربها ... مشيت بيها في مكرم عبيد وطريق النصر ورجعت تاني من مكرم عبيد
بالتوفيق ان شاء الله
شكرا يا احمد جدااقتباس:
المشاركة الأصلية كتبت بواسطة Dr_Smart
انا الحقيقة بش عارف السبع شغال فى سوزوكى ولا لا,بس انا قولت مدام واخد صيانة نيسان ,يبقى ممكن ماسك سوزوكى معاهم برده و الله اعلم
عندك حق فعلا الواحد بش بيغير عربيته كل يوم,عشان كده انا بتناقش معاك عشان اوصل للقرار السليم ان شاء اللهو ان شاء الله حشوف حكاية الحجز دى فى المكان اللى قولتيلى عليه
بس عاوز اسالك سؤال هل حيرضو اعمل تيست للسوزوكى و النيسان ولا لا؟؟؟
ولا حيقولك كتير عليك كده:mahf(5):
شكرا يا جميل على الرد و ربنا يباركلك فيها و يكفيك شرها و بعد اذنك انا لو عوزت حاجة حبقى اسالك تانى و انت يا احمد لو عوزت حاجة انا تحت امرك
السلام عليكم
انا الحمد لله ربنا كرمني وجبت sx4 من شهرين احسن ما فيها انك مميز وانت ماشي بيها من يوم ما اشترتها شفت اثنين بس وده الي مخوفني منها وربنا يستر
الحمد لله ما فيش اي تخبيط حاسس بيه
استهلاك البنزين من 10.6 الي 11 وعلي الطرق المفتوح بعد 140كيلو استهلكها ممتاز فوق 14
كانت نقصها باركينج سنسور عشان عاليه من الخلف وما بشفش اي حاجه
صوت الماتور مسموع لما بتقرص عليها وغير مسموع وانت واقف
العربيه عامله حوالي 9000 كيلو ومن وجهة نظري هي عربيه ممتازه
اولا شكرا لرد حضرتكاقتباس:
المشاركة الأصلية كتبت بواسطة mohamedshalaan
ثانيا ربنا يباركلك فيها و يكفيك شرها
انا عارف ان حضرتك خايف من قطع الغيار,بس متقلقش,اكيد موجودة فى اماكن غير التوكيل
و اهم حاجة ان العربية عاجبة حضرتك و مريحاك
بس حكاية اخر حاجة فى حكاية البنزين دى بش فاهمة,ياريت حضرتك توضح شوية الجزئية دى
و شكرا