استفسار من اهل الخبره

**fido377** · 18-07-2010 12:10 PM

فيه عربيه اوبترا 2007 قدامي للبيع واحتمال اخلص فيها بس فيها مشكله انها كانت عامله حادثه ومغيره فرده شاسيه وطبعا رفرفر وكبوت وكله في الوكاله وفيه ناس كتير كشفوا عليها وما اكتشفوش العيب ده بس لما صاحبها يقولهم عليه الناس تخاف طبعا.. وعلى حسب كلام صاحبها الجزء الامامي من الشاسيه ده بيجي تركيب يعني مش لحام او استعدال يعني مش مؤثر على اي حاجه في العربيه...
تنصحوني اشتري ولا ابعد عن الموضوع وبخصوص العربيه حالتها حلوه اوي وماشيه 35000 الف كيلو علشان صاحبها عايش بره مصر وما بيستخدمهاش غير في الاجازات..

**Bassem Raafat** · 18-07-2010 01:44 PM

أنا رأيي بلاش ........... خليك فى المضمون
وكمان مش معنى انه مغير رفرف وكبوت وفردة شاسية ان الموضوع بسيط بالعكس اكيد الموضوع وصل لحاجات كتير جوه الحوض كمان والعفشه والموتور ...... يعنى ح تلاقى حاجات كتير متغيرة وملعوب فيها.
بس كون انه بيقول على عيب العربيه مع ان فى ناس كتير ماكتشفوش العيب ده ، يدل إن الراجل ده أمين جداً ومحترم جدااااااااااااااااااااااا اااااااااااااااااا .
وربنا يديك حاجه أحسن إن شاء الله .

**fido377** · 18-07-2010 03:01 PM

شكرا اولا على اهتمامك بالموضوع يا اخ باسم بس المشكله انا عاوز اعرف اذا كان فعلا شاسيه الاوبترا بيجي قطعتين مش قطعه واحده.. اصل لو هوه قطعتين يبقه مفيش اي مشكله من تغير فرده شاسيه الي قدام وبالنسبه لاي اضرار في العربيه تانيه ما اظنش ولو فيه كان قال عليها..

**aymanmaly** · 18-07-2010 03:09 PM

طبعا صاحب العربية دة واحد من اخر الرجال المحترمين
واتمنى انى اتعرف على واحد امين فى زمن اصبحت فية الامانة نادرة
بس ابعد عن العربية احسن ماتضمنش اثار الحادث و هايبقى اعادة البيع فية مشكلة كبيرة
وعندى حكاية حصلت معاية
اشتريت عربية مستعملة جبهالى الميكانيكى بتاعى
وكشف عليها و لم اثق فية رغم انة عشرة طويلة و ذهبت بيها التوكيل وكشفو عليها وقالو كلة تمام العربية زى الفل
فاشتريت و بعد ستة اشهر قررت البيع لشراء عربية زيرو وكانت المفاجئة واحد تاجر شاف العربية و قال لى العريية دى عاملة حادثة فقلت يمكن بيقول كدة علشان يتزل فى السعر خدت العربية و مشيت و بعدها بيومين زرار الذجاج الكهرباء حصل فية مشكلة فرحت اعملة فالفنى الى بيصلحة قالى مش عايز تبيع قلت عايز قالى دة فية واحد عايز يشترى عربية زي بتاعتك فندة علية بص على العربية و قال العربية دى عاملة حادث و شاور على نفس الاماكن الى شاور عليها التاجر
فذهبت الى الميكانيكى فى حالة ثورة فقال سيب االعربية يومين و انا هاتصرف فقلت لة لازم الى هايشترى يعرف انها عاملة حادث فقال انا الى هاشتريها اعملى توكيل و هديك فلوسك خلال يومين وفعلا نزلنا على طول عملتلة لتوكيل و هو بعد يو مين اتصل بية و قال تعالى خذ فلوسك رحت و سألأتة على العربية هى فين قال اتباعت بمكسب ثلاث الاف جنية انت النص و انا النص
انا بحكيلك علشان تاخذ بالك و اسف للتطويل

**fido377** · 18-07-2010 05:25 PM

على فكره يا ايمن لسه في ناس كتير في مصر بخير بدليل موضوع العربيه الي فوق ده بس برده فيه ناس مش كويسه علشان انا شفت عربيات كتير اوي الفتره الي فاتت ومعظمها ملعوب في عداد المسافات بتاعها علشان يبان اقل...
بس فعلا العربيه الاوبترا دية فيه معارض كتير شافوها ومعرفوش موضوع الحادثه غير لما هوه الي قالهم عليه الراجل خايف من الي حصل معاك وواحد ياخدها ويكتشف الموضوع ده يقعد يدعي عليه..

**Bassem Raafat** · 18-07-2010 07:07 PM

أنا بجد معرفش قصة الشاسيه بيجى قطعتين مش قطعه واحده ولا لأ ........ بس كون الحادث إللى حصل وصل للشاسيه فأكيد يا fido377 باشا أخذ حاجات كتير فى سكته لغاية وصوله للشاسيه .

ومع إحترامى الشديد لصاحب العربيه علشان هو راجل أمين جداً ، بس صدقنى مع تجربتى مع الصناعيه عمر ما الحاجه بترجع زى الأول 100 % .

بس ممكن تقارن سعرها بسعر أى أوبترا تانيه مستعمله تكون فى نفس حالتها تقريباً " بس متكونش عامله حادثه " لو لاقيت الفرق بسيط يبقى خليك فى الفابريكة أحسن .

وإن شاء الله تتوفق فى أحسن أوبترا فى مصر .

**aymanmaly** · 18-07-2010 07:18 PM

المشاركة الأصلية كتبت بواسطة fido377

على فكره يا ايمن لسه في ناس كتير في مصر بخير بدليل موضوع العربيه الي فوق ده بس برده فيه ناس مش كويسه علشان انا شفت عربيات كتير اوي الفتره الي فاتت ومعظمها ملعوب في عداد المسافات بتاعها علشان يبان اقل...
بس فعلا العربيه الاوبترا دية فيه معارض كتير شافوها ومعرفوش موضوع الحادثه غير لما هوه الي قالهم عليه الراجل خايف من الي حصل معاك وواحد ياخدها ويكتشف الموضوع ده يقعد يدعي عليه..

واضح انك استريحت للعربية و صاحب العربية
بس انت مالكش زنب فى انك تشترى عربية و لو حبيت تبقى امين زي صاحبها و اظنك انك هاتعمل كدة و حبيت تبيعها المشكلة هاتبقى عندك واستنى لما تلاقى واحد طيب ذى حلاتك يرضى يشتريها
طب لية تدخل نفسك فى مخاطرة
على العموم نصيحتى ليك انس العربية دى و خليك صديق لصاحب العربية لان من الصعب تلاقى حد زى حلاتة فى الزمن دة و لما تلاقى هذا الشخص تمسك بية كصديق

**fawzyyyy** · 18-07-2010 10:09 PM

الاوبترا موجودة كتير..........اشمعني ديه اللي عاجباك....!!
موضوع ان الحادثة ديه واصلة للشاسية......ده معناه ان في حاجات كتير في الميكانيكا بتاعتها باظت و اتغيرت....و تأثيير الحاجات ديه بتظهر مع الوقت فبلاش احسن....و ربنا يوفقك في واحدة غيرها تكون احسن ان شاء الله

**fido377** · 19-07-2010 08:52 AM

المشاركة الأصلية كتبت بواسطة fawzyyyy

الاوبترا موجودة كتير..........اشمعني ديه اللي عاجباك....!!

ههههههه الموضوع كله ان لقيت واحد بيتعامل مع العربيات كأنها كائن حي وبيحافظ عليها جدا ولو فيها مسمار عاوز يتربط كويس بيروح الوكاله علشان كده كنت متأكد ان العربيه عموما حالتها كويسه جدا بعيد عن موضوع الحادثه ده كل الي في الموضوع

**arakysolom** · 19-07-2010 09:54 AM

السلام عليكم
بما ان حضرتك راكب 307 بيجو ابعد عن الاوبترا حتي و لو كان زيرو .............. مش عملة حادثة و كبيرة كمان

الموضوع: استفسار من اهل الخبره

LinkBack

أدوات الموضوع

عرض