أسافر بالسيراتو إن شاء الله و لا لأ ؟؟؟

يا رجالة السيراتو ، انا في حيرة من أمري و محتاج إن شاء الله أحسم الموضوع ده مع نفسي ، عشان إن شاء الله رب العالمين أرتب أموري ..

الحمد لله رب العالمين أنا معاية نيو سيراتو هاي لاين 2010 (خليجي طبعا) ، و زي ما البعض منكم عارف انا مقيم حاليا في دولة قطر و محتار هل إن شاء الله أنزل مصر بالعربية و لا لأ؟؟؟

و الحقيقة انا محتاج مساعدتكم بآراءكم السديدة اللي دايما بتعجبني و بستفيد منها في حاجات كتير تخص العربية ..

هي المسافة تقريبا من الدوحة لحد القاهرة إن شاء الله تقريبا 2500 كم رايح (غير التوهان) و زيهم إن شاء الله جاي ..

1. هل السفر هيكون مهلك للعربية ؟
2. و ايه النصائح اللي تنصحوهالي بخصوص الموضوع ده ؟
3. إن شاء الله ، انا عندي صيانة علي 14000 كم كنت ناوي بإذن الله أعملها قبل السفر (في حالة إن شاء الله ربنا سبحانه و تعالي أراد و سافرت بالعربية) علما بأني ماشي بالعربية لحد دلوقتي الحمد لله رب العالمين حوالي 12500 كم ، و اللهم ألف حمد وشكر ليك يا رب ما كانش في مشاكل ..

إن شاء الله في انتظار ردودكم يا رجالة و ربنا ما يحرمني منكم و إن شاء الله لو في نصيب كمان يكون في مقابلة لكيا بإذن الله خلال فترة الأجازة .. ألف شكر مقدما ..

توكل علي الله بس اكشف علي العربيه قبل الرحله الناس بتيجي بالبيجو 504 وتمام

طيب ليه تيجي بالعربيه؟؟
هو نظريا طول منت بتكشف عليها كل فتره فى الرحله وتكون جميع السوائل فى مناسيبها يبقى تمام وإن شاء الله مش هيحصل حاجه
طبعا عمرك مهتاخد المسافه دى طوالى ولازم هتريح كتير فى النص دا كويس ليك وللعربيه
معرفش الطرق عامله أيه لكن متوقع فى الفتره دى شمس حارقه وحر قاتل
يفضل تعكس حالك
تمشى من المغرب كدا لغايه النهار وتنام الصبح وتريح نفسك وعربيتك من الشمس والحر
دايما تكون جاهز لكل حاجه
أدوات العربيه تتأكد منها ويكون معاك جركن بنزين أحتياطى وميه للعربيه بالتأكيد
إن شاء الله مفيش حاجه هتحصل ومتنساش دعاء الركوب والسفر وتوكل على الله سبحانه وتعالى
ونشوفك بمصر على خير إن شاء الله

اعتقد ان مفيش حاجة تضر بالعربية بالنسبة لسفرية زي دي ... بس رأيي الشخصي انها هتكون متعبة جداً ليك و خصوصاً لو معاك اسرة

يعني تشحن العربية طيران او تأجر عربية في مصر فترة اجازتك افضل في رأيي
و تيجي بالسلامة ان شاء الله :)

أولا ألف شكر ليك يا نورمال علي الرد الجميل الذوق اللي مش غريب عليك ..
و ألف شكر برده للأستاذ سامح ، أول واحد يرد علي الموضوع ..

ثانيا سبب تفكيري في النزول بالعربية بإذن الله إذا ربنا سبحانه و تعالي أراد ، هو بهدلة المواصلات في مصر يا نورمال و انت اكيد عارف ، ده غير بقي رخامة التكسجية و زنقة المترو و قلة أدب بتوع الميكروباس و انتو فاهمين القصة دي ..

ولو حابب تسافر تروح اي مكان مثلا مش هتتبهدل برضه في المواصلات إن شاء الله لما توصل .. و في حاجة مهمة جدا جدا بقي هي اني نفسي إن شاء الله رب العالمين نتقابل و أحضر معاكم بإذن الله مقابلة من مقابلاتكم ، و الله انا حبيتكم في الله من قبل ما اشوفكم و ربنا يعلم .. إن شاء الله هجيلكم من قطر مخصوص شفتو بقي انا بحبكم اد ايه (-؛

أنا بس كنت محتاج إن شاء الله أعرف هل في قلق علي العربية من طول المسافة و لا كله في السلانكاتيه ..

يعني ، مثلا إن شاء الله أمشي كام كيلو و أريح أد ايه و خاصة إن دي إن شاء الله أول مرة أسافر فيها بالعربية لمسافة أكتر من 300 كم ..

معلش قلبت دماغكم بس اعذروني ..

اقتباس:

---

المشاركة الأصلية كتبت بواسطة m.osman

اعتقد ان مفيش حاجة تضر بالعربية بالنسبة لسفرية زي دي ... بس رأيي الشخصي انها هتكون متعبة جداً ليك و خصوصاً لو معاك اسرة

يعني تشحن العربية طيران او تأجر عربية في مصر فترة اجازتك افضل في رأيي
و تيجي بالسلامة ان شاء الله :)

---

الله يسلمك ، وشكرا علي اهتمامك و ردك علي الموضوع .. هو انا فكرت في الموضوع ده لكن شحن العربية طيران مكلف جدا ، أما موضوع تأجير العربية الحقيقة انا كنت مستبعده من تفكيري لأني بحس كده انه مش مريح و فيه قلق ، و بصراحة ما جربتوش قبل كده و مش عارف اتعامل مع مين يكون كويس يديني عربية كويسة ما تتعبنيش وممكن أسافر بيها مثلا لحد الغردقة أو اسكندرية مثلا و يا تري الايجار لمدة شهر هيكون في حدود كام ، أعتقد لوحسبتها هتلاقيها هي هي .. و أشكرك علي رأيك

فى رأيى الموضوع على حسب مدة الأجازة
يعنى لو شهر مثلا يبقى توكل على الله و تعالى بيها

توكل علي الله يا باشا و ان شاء الله هنشوفك علي خير
بس خد بالك من الحاجات الي نورمال قالك عليها و اعمل صيانتك قبل ما تتحرك
و خد معاك مياه خضراء و جركن بنزين و ازايز مياه كتير اوي و ايس بوكس و اكل و ظبط نفسك
و شماسه علشان لو جالك مزاج و ده اكيد تنام لك شويه تحطها علي الازاز من قدام و اديها نوم يا معلم و ربنا معاك ان شاء الله و تجلنا ب الف سلامه

طب ما نحسبها
شوف هتتكلف كام
بنزين وزيوت

اكل ليك فى الرحلة او مبيت فى مكان
مصاريف الجمارك

ونشوف عتقعد اد ايه هنا والعربية بتتأجر بكام

أنا بصراحة مستتقل المشوار أوي عليك :)

حاسس انك هتهلك العربية وهتهلك نفسك وهتصرف كتير على الفاضي

احسبها فعلاً كويس ولو مش جايبة همها يبقى أجر عربية في مصر أحسن

لو حتاخدها علي 3 4 ايام مثلا ماشي

لكن طوالي و رستات بسيطة صعبة جدا

لو الاجازه طويله تعال بيها .. لو قصيره أجر عربيه أرخص و أريح.
لو معاك حاجات كتير تعال بيها بدل ما تنقل شنطك من البيت للمطار لتاكسى و انت راجع نفس الكلام.
و تيجى بالسلامه ان شاء الله

اقتباس:

---

المشاركة الأصلية كتبت بواسطة a.saad

طب ما نحسبها
شوف هتتكلف كام
بنزين وزيوت

اكل ليك فى الرحلة او مبيت فى مكان
مصاريف الجمارك

ونشوف عتقعد اد ايه هنا والعربية بتتأجر بكام

---

+++1111111

شحن العربية بالمركب بيكلف تقريبا 8000 ج فما بالك بالطيران..
ولو فكرت تأجر عربية لمدة شهرين هنا هاتكلف نفس المبلغ تقريبا..
اما لو فكرت تنزل بالعربية..
هاتوفر سعر تذكرة الطيران الخاصة بك..
البنزين والزيوت عمرهم ما هيكلفوك 1000ج
غير ان السفر الطوالي مش هايبهدل العربية ولا يتعبها..
انت لو مش هاتتعب من السواقة توكل على الله وانزل بيها..

الصراحة السفر بالعربية اوفر من كل النواحي اولا تذاكر الطيران مولعة السفر بالعربيه هيوفر كتير جدا دا في حالة ان حضرتك عندك عائلة يعني زوجه واولاد الحاجة االتانية ان مصرنا الحبيبة مينفعش تنزلها وميكونش معاك عربية فا كده هتأجر عربية يعني لو عايز عربية محترمه مش هتدفع فيها اقل من 180 جندي يوميا اضربهم بقة في كام يوم حضرتك هتقعد هنا + تمن التذاكر وشوف حضرتك السفر بالعربية هيوفرلك قد اية

توكل علي الله و تعالي يا عم بس اعمل احتياطاتك لكل الظروف و خلاص

اشترى نفسك و راحتك، تعالى طيران و أجر عربية فى مصر، المشكلة مش فى المسافة بس، المشكلة فى العبارات و من بعدها الموانىء المصرية و جماركها و تراخيصها، يعنى القرف اللى ممكن تشوفوا مش سواقين الميكروباصات فى سنة، هتشوفه من موظفين الميناء فى يوم.

اقتباس:

---

المشاركة الأصلية كتبت بواسطة ehabnoor

أولا ألف شكر ليك يا نورمال علي الرد الجميل الذوق اللي مش غريب عليك ..
و ألف شكر برده للأستاذ سامح ، أول واحد يرد علي الموضوع ..

ثانيا سبب تفكيري في النزول بالعربية بإذن الله إذا ربنا سبحانه و تعالي أراد ، هو بهدلة المواصلات في مصر يا نورمال و انت اكيد عارف ، ده غير بقي رخامة التكسجية و زنقة المترو و قلة أدب بتوع الميكروباس و انتو فاهمين القصة دي ..

ولو حابب تسافر تروح اي مكان مثلا مش هتتبهدل برضه في المواصلات إن شاء الله لما توصل .. و في حاجة مهمة جدا جدا بقي هي اني نفسي إن شاء الله رب العالمين نتقابل و أحضر معاكم بإذن الله مقابلة من مقابلاتكم ، و الله انا حبيتكم في الله من قبل ما اشوفكم و ربنا يعلم .. إن شاء الله هجيلكم من قطر مخصوص شفتو بقي انا بحبكم اد ايه (-؛

أنا بس كنت محتاج إن شاء الله أعرف هل في قلق علي العربية من طول المسافة و لا كله في السلانكاتيه ..

يعني ، مثلا إن شاء الله أمشي كام كيلو و أريح أد ايه و خاصة إن دي إن شاء الله أول مرة أسافر فيها بالعربية لمسافة أكتر من 300 كم ..

معلش قلبت دماغكم بس اعذروني ..

---

يا باشا كتر خيرك وشكرا على كلامك
وإن شاء الله تجلنا بألف سلامه
بخصوص سؤالك عن كام كيلو وتريح
أنا عايز أقولك العربيه مش هتتعب قبلك :))
ريح جسمك مع عربيتك
كل متتعب ريح وريح العربيه
إنما هى مش هتتعب قبلك متقلقش :)
فكر جديا بس فى السفر من المغرب والاستراحه وقت الشمس الحارقه توفيرا لجهدك وحمايه لعربيتك
دائما يستحسن فى الرحالات دى يكون معاك حد
على الاقل واحد
كمان أحذر من الهيتشهيكرز ومتركبش حد معاك متعرفوش مطلقاً
أستمتع بالقياده لأن دا وقتها ومتجريش أوى وأمشى واحده واحده
وإن شاء الله توصل بالسلامه

بصراحة .. انا مستتقل المشوار اوي ...
انا حد من قرايبي عملها وجه بالعربية بتاعتو من السعودية ومن بعديها ندم وقال توبه ، مش بس علشان المشوار وطوله .. بيدبهدلو في الجمارك وطوابير وبهدلة وهما رايحيين ووهما جايين ... اصلها بتبقى زحمة اوي ي ي ي ي ي فوق ما تتخيل ...
عموما لو انت مقرر خلاص ومصر ... يبقى خد بالك من نفسك وتيجي بالف سلامة ومتنساش تجبلي معاك شوكولاته .. هههه

والله الموضوع محير فعلا

بس بصراحة أنا لو منك أشترى راحة بالى وكفاية قرف السواقة ودول مش 200 ولا 400 كيلو انت بتتكلم فى 2500 كيلو يامصيبتاه :36_1_8[1]:

فكر كويس وإحسبها وشوف مصاريف نزولك بالعربية ونزولك بشحن العربية ونزولك لوحدك وهتأجر عربية مثلا فى مصر

أهم حاجة راحة البال صدقنى وطز فى الفلوس :))

وربنا يوفقك وتيجى بالسلامة :)

انا لو منك الصراحة حفكر تفكير تاني
و هوا اني اشتريلي عربية 4 * 4 من هناك حاجة تكون موديل حديث وياسلام لو لاند كروزر و انزل بيها ولما ارجع ابيعها تاني
طبعا انا بقول كده لاني عندي فكرة عن سوق العربيات في قطر و لو عرفت توقع عربية لقطة ممكن كمان تكسب فيها لما تيجي تبيعها
بالطريقة دي ابقى حافظت على عربيتي و ووفرت كمان

أنا متشكر ليكم كلكم علي ردودكم و اهتمامكم بالموضوع ، أنا ميال أوي إن شاء الله إني أسافر بالعربية ، يعني تجربة جديدة ، أنا عارف و متأكد انها متعبة بس هو يعني إن شاء الله عشان أول مرة الواحد مش هياخدها قفش و يمشي واحدة واحدة ، و الناس بتقولي ان في استراحات علي طول الطريق يعني مثلا كل 300 كم و لا حاجة ، و إن شاء الله أنا هصلي استخارة لربنا سبحانه و تعالي و إن شاء الله ربنا يهديني للاختيار الصح .. ألف شكر ليكوا يا رجالة علي اهتمامكم ..

انا راى تاجر عربيه فى مصر حفاظا على راحتك انت اولا من بهدله سواقه 2500 كم غير التوهان
ثانيا من بهدله العربيه ماك و خصوصا انك كمان زمانك مش متعود على زحمه القاهره و مصر عموما

انت لو اجرت عربيه مش عاليه يعنى مثلا لانوس او فيرنا او ماتريكس حتقضى الغرض و مش حتكون غاليه يعنى لو لانوس او فيرنا حتعملها من 2000الى 2500 فى الشهر

تيجي بالسلامة ان شاء الله

توكل على الله و تعالى بالعربية لو تقدر تستحمل طول المسافات أنا سافرت بهوندا سيفيك من الرياض لجدة 1200 كلم و رجعت بعدها بيومين و مكنش فيه مشاكل بس المشكلة لما كنت راجع كنت مرهق جدا و كنت هأموت و انام فلازم تكون مرتاح و تقف تناملك ساعتين في اي استراحة و اكتر حاجة مقرفة العبارة و مواعيدها و التخليص في المينا و تعليق النمر.....

بس أهم نصيحة الفيري طبعا على وش العربية أو أي رش واقي من الرمل لأن الرمل في السعودية عند سلوى و عرعر و حفر الباطن و المنطقة الشرقية للالي جاي من قطر دايما بيقولوا بيجرح الدهان

و كمان أعمل فيميه عازل حراري تو ام او زيبارت او اي ماركة علشان الشمس الرهيبة في الطريق ده مصر نفسها بقت يوميا فوق الأربعين.......

و خد بالك ما تحملش العربية فوق طاقتها و شيك عالكاوتش كل فترة لن السرعة مع الحمولة مع الحر هيغير الضغط دايما...

في المينا لازم ترش و تجيب شاي للناس لأن ناس كتير هتقولك حمدالله عالسلامة و ما بتمشيش الا بالفلوس للأسف....

تيجي بالسلامة و ربنا يسترلك طريقك.......

انا سوقت العربية 550 كم شوت واحد

ما تخافش من العربية بس خلي بالك من الطريق و الجو

التجربة هاتكون جديدة طبعا ربنا يوفقك

تيجي بالسلامه ان شاء الله

انا اعرف واحد لسه جاي من قطر من شهر تقريبا نازل بتيوتا تقريبا 2004 وحاليا بقت عليها نمر مصر

وياريت تتابع المنتدى وتقولنا انت فين عشان نطمأن عليك ده في فترة الراحه على الطريق يعني ظبط موبايلك وجرب تدخل منه المنتدى الاول قبل التحرك سواء الواي فاي أو الثري جي

ومتنساش تجيب معاك شوية حاجات من الصيدليه للبرد مثلا والسخونيه وهكذا

في رعاية الله