الموضوع: تحذير من شراء او استخدام Mobinil USB Modem

السلام عليكم ورحمة الله وبركاته

انا بقالى فتره عايز اكتب الموضوع دا بس كنت مأجله يمكن مشكلتى تتحل لكن الظاهر انها مش هاتتحل

فقلت لازم انبهكم عشان تاخدوا حذركم

الموضوع باختصار انى عندى Mobinil USB Modem بقالها فتره طويله وكانت شغاله معايا تمام وكنت باستعملها كل فتره وباشحنها بكروت شحن

اللى حصل ان يوم 8/5 اللى فات يعنى من شهرين و 10 ايام سمعت عن العرض بتاع اشحن على الهوا وتاخد 50% رصيد اضافى

فكنت فى هايبر ودخلت فرع موبينيل وشحنت ال يو اس بى ب 50 جنيه وبعد ما شحنت اكتشفت ان العرض انتهى :)

ما علينا مش مشكله مش هى دى القضيه

روحت البيت وفتحت لقيت الرصيد وصل وكله تمام وماستعملتوش انا بس فتحت اشوف الرصيد وصل ولا لا وكان 63 جنيه تقريبا

تانى يوم بافتح لقيته مش عايز يفتح اى سايت ولا ماسنجر ولا حاجه

ابص على الرصيد الاقيه صفر !!!!!

ازاى طيب راحوا فين ال 63 جنيه وانا مستعملتوش نهائى

المهم اتصلت بخدمة العملاء وكان الرد كالتالى :

ان فعلا انا معملتش اى استهلاك ودا خطأ فنى من عندهم , وان دا محصليش انا بس دا حصل لخطوط تانيه كتير , وجارى حل المشكله من القسم الفنى المختص

وهانتابع مع حضرتك لما الشكوى تتحل .

بقالى 70 يوم كا ما اتصل بيهم اسمع نفس الكلام , الشكوى مفتوحه ولسه مفيش فيها رد , ومحدش بيتابع معايا ولا حاجه

اخر مكالمه كانت النهارده

باقول للموظفه انا صابر بقالى 70 يوم عايز فلوسى باى طريقه او صيغه انتوا تشوفوها سواء خصم من فاتوره او يتبعتلى رصيد او اخد كارت شحن

تقولى ماحنا لازم نحل المشكله ونصلح الخلل اللى موجود الاول عشان المشكله ماترجعش لحضرتك تانى

قولتلها مليش دعوى بحل المشكله انا اصلا مش هاستعمل الخط تانى , انا عايز فلوسى وبالصوره اللى انتوا عايزينها

قدميلى طلب او شكوى بالكلام دا

قالتلى ماينفعش يافندم اقدم شكوى تانيه غير اللى انت مقدمها

اخر المكالمه قولتلها انا عايز اعرف انتوا ازاى عاملين اعلانات وعروض على المودم وانتوا عندكوا مشاكل ؟

تقولى لا يافندم ماهو مش كل الخطوط فيها مشاكل

قولتلها بس وارد اللى يشترى يحصله مشكله

قالتلى اه ممكن , يعنى المفروض مانعملش اعلانات ؟؟؟!!!

المهم قولتلها يعنى من الاخر انا مفيش حاجه قدامى غير انى افضل قاعد مستنى الفرج والشكوى تتحل وفلوسى ترجع

قالتلى ايوه ان شاء الله وهانبقى نتابع مع حضرتك ( قال يعنى كان حد تابع من 70 يوم )

هى دى الحكايه انا حاولت اختصر على اد ما اقدر واسف على الاطاله