اخر يوم فى القسط القرض ادفع النهاردة

**fady.bekatcho** · 19-07-2010 07:54 PM

النهاردة انا كملت تجربة انى اخد قرض بضمان شهادة علشان اشترى بية العربية

وابعد عن قرف التقسيط والمعارض والبنوك وكل دة

الى حصل ان فى يوم 15 ـ 9 2008

رحنا خدنا قرض من البنك بضمان شهادة

القرض بنسبة 80 فى المية من الشهادة

وفوائدة عبارة انة بياخد فوائد الشهادة و1% زيادة

اولا مش بيلزمك بمدة يعنى ممكن تخلصة فى سنة او اتنين برحتك خالص
ومش بيلزمك بقسط شهرى

يعنى ممكن تدفع الشهر دا 1000

الى بعدة 2000

حتى لو 200 جنية برحتك خالص

انا النهاردة والحمدلله خلصت القرض دة او بمعنى اصح الحاجة ربنا يخليها خلصت القرض لان هيا الى جايبة العربية والعربية باسمها

والصراحة استفدت كتير اوى انى عملت القرض وماجبتهاش تقسيط بنوك

اولا القرض اتسدد لو حسبتوها

فى سنة وحوالى 10 شهور

انا واخد القرض ب 64000 الف جنية

اتسدد اجمالى بحوالى 73200 جنية

يعنى واخدين فائدة 9200 جنية

لو حسبتوها بقى الشهادة فوائدها فى الفترة دى هتبقى حوالى 9600 فوائد سنة ونصف لان طبعا احنا ما كملناش السنة التانية والفوائد نصف سنوية باين

يبقى انا كدة مسدد القرض وليا فوائد 400 جنبة

يعنى يعتبر ما دفعتش ولا مليم فائدة وفلوسى موجودة زى ما هيا

هو اة انا مع الى هيقول ازاى انت دافع 9200 فوائد

هقولة محستش بيهم لان راس المال الاساسى ثابت مش نقص

وانا حبيت اعمل الموضوع دة علشان الى يحب يعمل الفكرة دى لو فلوسة موجودة ومش عايز يطلعها

بس طبعا الشهادة هيبقى عليها حظر وممنوع تتفك الا لما يتسدد القرض

**Omar.Shawki** · 19-07-2010 10:24 PM

طيب ممكن ياباشا معلومات عن الشهادة دى زى الحد الادنى كام والفوائد كام ؟
وبتتعمل فى البنك الاهلى ..والف شكر ليك

**Ahmed Sharaf** · 19-07-2010 10:59 PM

النظام دة إسمه ( سحب على المكشوف ) بمعنى انك بتاخد فلوس بضمان فلوسك فى حدود النسبة اللى بيحددها البنك ودلوقت بتوصل في بعض البنوك الي 95% من مبلغ الشهادة.
بمعنى ان لو ليك شهادة بـ 1000 جنية ممكن تسحب على المكشوف لغاية مبلغ 950 جنية مع الابقاء على اصل الشهادة كما هى وفوائدها كما هي.
حبست تسحب مثلا 800 جنية .. يبتدى يحسب عليك فوائد على 800 جنية .. جيت يعد شهر سددت 300 جنية يبتدي يحسب فوائد على مبلغ 500 جنية وهكذا .. لكن دايما يستحسن انك تعتبر ان المبلغ دة عبارة عن قرض وتلزم نفسك بمبلغ محدد تدفعة كل شهر, علشان ميحسبش عليك فوائد كتير

**hamdy** · 19-07-2010 11:41 PM

بس ياتري بنك ايه اللي بيعمل النظام دا ؟؟؟؟؟ البنك الاهلي ؟؟؟؟

**Donzi** · 19-07-2010 11:47 PM

اولا مبروك لحضرتك انك خلصت القسط سواء قرض شخصي او قرض سيارة كلها ديون و الواحد بيبقى شايل همها و عاوز يخلص منها

ثانيا الناظام انا سمعت عنو و هو نظام حلو فعلا بس في حالة انك ماتكنش هتحتاغ المبلغ اللي في الشهادة خالص لحد ما تخلص القلرض

و من البنوك اللي بتعمل النظاو دة البنك الوطني للتنمية ( مصرف ابو ظبي الاسلامي حاليا ) و دة بنك اسلامي جديد في مصر بس كويس جدا