محتار أشتري جين 2 ولا لأ أرجو الإفاده ضروري

السلام عليكم ورحمة الله وبركاته
أنا عايز أشتري عربيه في حدود 90 ألف، في ناس قالولي علي بروتون جين 2، ولما شوفت إمكانيتها عاجبتني أوي بس بعد كده سمعت عن كذا عيب فيها بصراحه مخاوفيني أوي منها، والعيوب اللي سمعتها هي:
1- التوكيل بتاعها سئ للغايه وأحيانا بيبع العربيه فيها عيوب.
2- بتستهلك بنزين كتير.
3- قطع غيارها غاليه وغير كده كمان في قطع غيار مش موجوده في التوكيل بتاعها (واحد قالي كده عن قصه شافها فعلا!!).
4- سعرها بينزل جامد لما تحب تبيعها لأن الإقبال عليها مش كبير.

بصراحه هي عاجباني أوي وبجد إمكانيتها عاليه جدا علي سعرها -بس مش عارف- العيوب دي متعبه أوي بالنسبه ليا
يا ريت لو حد عنده العربيه دي يفيدني في المشاكل دي.

http://www.nilemotors.net/Nile/165511-a.html

ردى على استقسارتك مش هاتندم بدليل انها معايا من اول مانزلت 2006 :M_yes[1]:
استخير ربنا :shyy:
ربنا يوفق

http://www.nilemotors.net/Nile/166084-2-1-a.html
اتوكل علي الله واستخير ربنا
وربنا يبارك لك في الي فية الخير

باختصار دى احسن عربية فى الدنيا (بالنسبالى انا حر :) )
البنزين عادى لما بتقرص عليها بتاكل بنزين زيها زى اى عربية 1600
التوكيل مش سىء للدرجة يعنى عندك مثلا غبور ومنصور عز ارحم منهم كتير
قطع الغيار موجودة دلوقتى ومتقلقش منها وموجودة برة التوكيل اسعارها فعلا غالية
من الاخر احسن عربية قيمة سعرية مقابل امكانيات واداء واتحدى
تحياتى

توكل على الله .... من العربيات القليله الى نادر اما تلاقى حد يذكرلك ولو عيب واحد فيها

غير كده هتديلك كل ما تحتاجه .... سحب عالى وثبات وعفشه مرضيه جدا وتوكيل متوسط المستوى وشكل ممتاز .... هتحتاح ايه تانى

واستخير ربنا

بجد شكرا علي ردودكوا يا جماعه بجد إنتو متعاونين أوي، جزاكم الله كل خير
بس كنت عايز أعرف هي فعلا سعرها بيقل أوي لما تبقي مستعمله ولا عادي زي العربيات التانيه ، أصل أنا عايز أجيبها زيرو موديل 2010.
وهل قطع الغيار بره التوكيل أرخص من التوكيل بكتير ولا الفرق بسيط.

زيها زي اي عربيه تانيه في اعادة البيع بعد 5 سنين مثلا بس عربيات بروتون هايله فعلا

اقتباس:

---

المشاركة الأصلية كتبت بواسطة ams_5000

بجد شكرا علي ردودكوا يا جماعه بجد إنتو متعاونين أوي، جزاكم الله كل خير
بس كنت عايز أعرف هي فعلا سعرها بيقل أوي لما تبقي مستعمله ولا عادي زي العربيات التانيه ، أصل أنا عايز أجيبها زيرو موديل 2010.
وهل قطع الغيار بره التوكيل أرخص من التوكيل بكتير ولا الفرق بسيط.

---

بص طبعا هى سعرها بيقل شوية عن موديلات تانية كتيرة بسبب إنها جديدة على السوق بقالها 5 سنين بس فطبيعى إن اسمها مش زى الموديلات اللى بقالها حوالى 15 أو 20 سنة و لكن الحمد لله سعر البيع بيتحسن جدا و بمعدل كويس و بعدين قلقان من إيه انت معندكش حاجة بتمسك نفسها فى البيع صح غير هيونداى و شيفروليه و دايو سابقا و اللانسر طبعا و بعض عربيات قليلة بشكل فردى و عدد لا يذكر. غير كدة كله إعادة بيعه وحشة حتى الكيا مش قوية أوى و لو إن السيراتو حاليا عملة طفرة فى الموضوع ده.
و بالنسبة لقطع الغيار بره طبعا أرخص من التوكيل بمعدل يستاهل الفرق فى أكتر من حاجة و عموما كتر انتشار و المنافسة هتقلل أسعارها أكتر قدام و عموما أسعار قطع غيارها مش عالى أوى زى مانت فاهم قريبة جدا من الكيا يعنى أعلى من الكورى المنتشر زى هيونداى و شيفروليه و اليابانى المرطرط زى اللانسر و النيسان و أقل من اليابانى العالى و أكيد الأروربى كمان يعنى متوسطة بشكل عام.
ربنا يوفقك إن شاء الله و تختار صح

http://www.nilemotors.net/Nile/165882-a.html

شكرا يا جماعه، أنا بدأت أستريح بجد للعربيه دي وإن شاء الله هشتريها أو يمكن أستني موديل 2011 بيقولوا نازل في شهر 9 ربنا يسهل، وربنا يكرمكوا يا رب ومرسي بجد علي إهتمامكم ومجهودكم (: