حد بيلاحظ الموضوع دة ؟؟

**fiatmomo** · 26-02-2008 12:37 AM

كل مادخل محل علاشان اشترى حاجة ........... الاقى الشخص الى بيحط الحاجة فى الكيس البلاستك .... وهو بيجيب الكيس البلاستك وبيفتحة الاقية ( لازم يحط صباعة فى بقه ) قال اية يعنى علاشان الكيس يمسك فى ايدة ؟؟؟؟؟؟؟بسهولة ويعرف يفتحه ؟؟؟؟؟

الموضوع دة انا لاحظته فى السوبر ماركت ومحلات الفاكهة والخضار , وحتى بتاع العيش ؟؟؟؟

والموضوع الغرييييييييييييب اكتر محلات الاكل التيك اواى .. ودة حصل معايا فى محل مشهور تيك اواى فى وسط البلد تخيلو الغبى ده عمل كدة فى رغيف العيش ؟؟؟؟؟؟؟؟؟ مش حقول كيس بلاستك.... بأمانة خدت الاكل وطلعت روحت رميه فى الزبالة . لانى عارف لو كلمتة مش حيفهم انا قصدى اية ...

ايه القرف دة ؟؟؟؟؟؟؟؟؟؟؟؟؟ غير موضوع القرف دة بينقل الامراض بكل سهولة ؟ يعنى لو حد عندة كبد وبائى كدة خلاص بالسلامة اتنقلنا ؟

وربنا يستر على الاطفال بالاخص من الموضوع دة ... لانهم فئة مش بتاخد بالها من الموضوع دة

ياريت كلنا ناخد بالنا من الموضوع دة علاشان خطير جدا جدا

حالو تقللو من الاكل من محلات التيك اواى , او على الاقل الاكل فى الاماكن الموثوق فيها .

**Noha.M** · 26-02-2008 01:19 AM

كماااان في حركة انيل بأة
اصل انا كاييييفة لب و سودانى و كدة فلما بروح اشترى الراجل الاول ينفخلك في القرطاس دة بجد حاجة تقرف
بعدين مرة قلت لواحد ممكن متنفخش لو سمحت في الكيس عشان دة بينقل امراض قام بصلى بصة احتقار :( مع انى والله قلتل بذوق اوى و انا مبتسمة و بعد اذنك و من فضلك و لو مكنش يضايقك بس فعلا هم مش بيبقو فاهمين

**emadkamel** · 26-02-2008 10:00 AM

انا حصل معايانفس الموقف بتاع اللب ده ... بس الراجل بعد مابص باحتقار رمىالكيس الى فى ايده وجاب كيس تانى ...... ونفخ فيه برضه !!!

**analyzer** · 26-02-2008 10:05 AM

تفتكرو اية السبب

تعود منهم على كده

ولا دى طيبة منهم

ولا هى دى ثقافتهم وفكرهم

**Ghamrawy** · 26-02-2008 10:05 AM

تعلم فى المتبلم يصبح ناسى،الحركات دى كلها حركات تلقائية و علشان الناس تبطلها لازم شوية تركيز و فهم لخطورتها

**وائل عطية** · 26-02-2008 10:20 AM

هى طبيعة وبقت موجودة وفعلاً حاجة تقرف
في مرة رحت أشتري لحمة مفرومة من محل كبير ومشهور ..لقيت البياع بيحط اللحمة بإيده من غير مايلبس جوانتي ولا كيس بلاستيك ..وطبعاً ماسكتش وماتكلمتش بذوق ..بالعكس اتكلمت برخامة وقلتله إيه اللي بتعمله دا ..إزاي هاتديني اللحمة بإيدك كده ..وقعد يعتذر هو وزملاؤه ولبس الجوانتي ووزن اللحمة ..بس للأسف دا قدامك والله يعلم وهم بيعبوا اللحمة دي أصلاً في سرافيس العرض بيعبوها ازاي ..ربنا يحفظنا

**TaoTao** · 26-02-2008 10:33 AM

وتذكرة الأوتوبيس اللي لازم تتغرق من لعاب السيد المحصل !!
أنا بامسكها بطراطيف صوابعي، أو بالفها في الفلوس الباقي اللي بخدها، ومابامسكش أي حاجة ولا اسلم على اي حد لغاية ماغسل ايدي مرتين تلاتة :s:s
مع إن فيه كمسارية محترمين بيبقى معاهم سفنجة مبلولة بتؤدي الغرض وبابقى عاوز أحييهم بحرارة على موقفهم الحضاري.
بالنسبة للعيش، أنا أي عيش لازم يتقمر قبل ماكله حتى لو لسة جايبه وطري، بس باحس (وممكن يكون إحساس زائف) إني كدة باعقمه
وماننساش "بسم الله الذي لا يضر مع اسمه شيء في الأرض ولا في السماء وهو السميع البصير" وربنا يسترها

**Karim_Monir** · 26-02-2008 11:31 AM

موضوع اللب ده اكتر سبب خلاني ابطل اكل لب
بقيت حاسس انه بينقل نص لتر لعاب للكيس يعععععععع
بقيت ماشتريش غير بالربع كيلو عشان الكيس كبير ومش محتاج ينفخة ولازم انبهه
بس مرة عجبني موقف ايجابي
كنت السنة اللي فاتت في زيارة مكوكية لمطروح من 15 سنة واكتر
المهم نزلت مع اصحابي نتغدي في مطعم (كمنه) وده اشهر كبابجي في مطروح
واحنا قاعدين وبعد ما جيه الطلب الولد اللي شايل الطلبات وقعت منه حتت كباب على الترابيزة من طبقي
لقيتة خدها وحطها في طبقي وبايده
انا استنيت لحد مانزل الطلبات على الترابيزة ولسه هاقولة اللي انت عملته ده واديلة الطريحة التمام
لقيت الجرسون جاي جري وشال الطبق وقالة غير الطلب وبسرعة وهات غيرة من على النار
وزيادة في الامانة حط الطبق على ترابيزة جنبي لغاية ما الطبق التاني جه وبسرعة
ورغم اني كنت طالب نيفة ودي مش اي حد بيطلبها لكن جت في 7 دقايق
بس كانت المدة كافية اني اقوم بالواجب مع اصحابي قبل ما يجي طبقي
نييييييههههههههه