الموضوع: يعنى اية امين شرطة !!!

المشاركة الأصلية كتبت بواسطة أحمد كمال

الكلام ده في يوتوبيا مش في مصر سعادتك

مش شرط يوتوبيا .. هوه صح فى اى حته الا مصر

المشاركة الأصلية كتبت بواسطة kareemz

لو انت ماشى صح .. محدش له حاجه عندك حتى و لو كان لواء.

حتي دي بقي فيها شك لانه هو كلمته مصدقه دايما وبما ان مفيش كاميرات او حاجات تسجل اي محادثه بتحصل فبالتالي هو يقدر يلفق ويعمل اللي هو عايزه والف من هيخدمه

المشاركة الأصلية كتبت بواسطة fadod

طيب والله يا جماعة أنا من كلامكم بغلي علي البلطجة اللي متخفية في صوره شرطة ...هو الموضوع زاد قوي كدة ليه
أنا فاكر لما كنت في مصر 1998 وكنت سايق عربتي ال-128 التعبانة وكان فيه بوكس جاي من ورايا بسرعة مشفتوش فكسرت عليه من غير قصد ، وداه راح حدف علي اليمن والعجل صفر لما كان هيلبس في الرصيف. أنا بصراحة غلطتي والشارع كان فاضي كمان مش زحمه وكان سايق ظابط مش عسكري . أنا قلت أكيد أقلها هيشتم زي أي واحد سايق ملاكي بتكسر عليه . وإتخضيت لأني شفته تقريباً طلع علي الرصيف فنزلت وقلتله أنا أسف مشفتكش في المراية ..الرجل كان ملازم أول أو حاجة ولقيته بيقلي محصلش حاجة ابقى بص في المراية كويس وانا يعني ولا حاطت نسر ولا أي حاجة تخليه يخاف مني . أصحابي كانو سايقين ورايا قالولي احنا قلنا إنه أقلها يا مخالفة يا يسحبك علي القسم والرجل كان ذوق. من كلامكم البلد اتغيرت جامد أوي

سؤال دلوقتي لو أنا نزلت بالعربية الوحش بتاعتي و بالجنسية اللي باسبورها أزرق وبيجيب طراوة وبالدولية اللي لو فكر يسحبها يبلها ويشرب مايتها ،ترشحولي اشوط في رتبة لغاية فين وانا مطمن ممكن أبق مع مقدم أو عميد ولا تبقي جامدة مع العلم اني سوقت في أمريكا 12 سنة وسجل أنضف من النضافة
.أنا مابحبش أمشي غلط وباحترم القانون بس لما أكون صح ويجي حد يبلطج عليك ،بتحس انك متغاظ أوي وعايز تقل أدبك في أي حاجة بسيطة .
ربنا يشفي الناس المريضة ديه اللي خلت الواحد من عمايلهم هيبقي مريض زيهم ويفكر بنفس الطريقة

قوله انا مواطن امريكي وباسبوري حاميني وممكن اديكم كلكم بالجزمه
بس بلاش تقولها في مظاهرات زي ما احمد حلمي عمل

صدقوني يا جماعة إحساس صعب أوي لما الواحد ينزل بلده بعد غربة طويلة ويحس إن البلد والحكومة كارهينه،،إنت نازل تشوف أهلك وناسك وبتلقيهم فتحنلك درعاتهم واحضان ومستنيينك ،بس من البلد لأ
من أول مابتنزل المطار والحقد اللي في عنين ظابط الجوازات و اسئله غاية في الغلاسه زي مثلاً عجبتك بلاد برة و رايح تاخد جنسيتها ،مش كنت هنا أحسن..و إنت مالك يا إبن التيت .وهو بيبص ليك وبيقول في نفسه اشمعنى إنت وانا لأ
ورخامة الجمارك وشحاتتهم منك ولو اديته في ايده 5 ولا 10 دولار يبقو مش عاجبينه...ياااه علشان عارفين إنت جاي من برة وداه مش مقامك .
أصحابي اللي نزلو كانو بيحاولو يدارو موضوع انهم نازلين من برة بالذات مع الناس اللي بترفع الاجرة زي سواقين التاكسي بس معرفوش..يعني واحد كان بقى له فترة ولما نزل و ركب تاكسي سأل السواق ،تسمحلي أدخن ..الرجل ساب الطريق والدركسيون وقاله إيه تسمحلي ..هو حضرتك منين وفين وسافرت امتى وليه ،،وفتح المحضر وطبعاً مش هتدفع زي أي حد عادي ، د إنت جاي من برة وأدينا سليناك كمان طول المشوار وعرفنا تفاصيل حياتك الشخصيه .
ولا اللي ركب هو ومراتو وبنتهم تاكسي وإتفقو ميتكلموش في حاجة لغاية لما ينزلو لغاية البت لما تنكسر رقبتها فتحت بقها وقالت it is too hot here ..والسواق لقط الإشارة ..وانتو منين وجايين هنا ليه .....وساعه الحساب ، يابيه د انتو من برة والبلد عندك كلها خيرر

أو اللي راح فندق في القاهره هو ومراته وعيالة علشان يقضي يومين في غرفة علي النيل وعايزين يدفعوهم ضعف الثمن وبدولار علشان هما اجانب ، الرجل معاه الباسبور المصري هو ومراته بس منتهيين ،لأنه بيستخدم الاجنبي ..بس مينفعش باسبور خلصان ، وهو لو خلص مبقتش مصري ، وبعدين إنت مش ظابط جوازات .بس هي غلاسة وخلاص.
وزيد بقي وغطي موضوع البلطجة بتاع الشرطة اللي بنتكلم عليه. وبكده بدل متنزل تقضي اجازة وتشوف أهلك ،،بتكره نفسك ويمكن أهلك اللي حطوك في المواقف ديه