الموضوع: واكتملت الدائرة

المشاركة الأصلية كتبت بواسطة د.أحمد سمير

إذا كنت من رفقاء الكفاح على أسفلت المحروسة القاهرة ، وفجأة وبدون أي سبب ظاهر أو كامن ..
وجدت نفسك تقطع المسافة من محور 26 يوليو إلى زهراء مدينة نصر وأنت تسير على الغيار الأول في مدة تبلغ أربع ساعات ونصف .
أو وجدت نفسك فجأة وللأسف تقطع المسافة من حدائق الأهرام إلى مطلع الدائري عند المنصورية في ثلاث ساعات تقريباً .
أو إذا وجدت نفسك فجأة تقطع المسافة من مدينة العبور إلى صلاح سالم في ثلاث ساعات متصلة
وإذا كان الزمن الذي يتم فيه هذا الأمر يتراوح بين الواحدة ظهراً والسابعة مساء
فاعلم أن الدائرة قد اكتملت تماما ، وأن السيارات قد غطت جميع منافذ الدخول والخروج ، والشوارع والتقاطعات ، والشوارع الداخلية كمان ...
ويا ويلك يا سواد ليلك لو كان الماكن الذي تقصده ليس له إلا طريق واحد فقط ، حيث إن تغيير الطريق دائماً يفيدك تماما في متلازمة الأمل والفشل ، الأمل في أن يكون الطريق البديل أقل ازدحاما ، والفشل في أن يتحقق ذلك فلا تجد له أي فائدة مذكورة سوى أنه يريحك من الملل المستمر في السير الطويل دون تغيير السيارات والوجوه والأشخاص ورفقاء الإشارات .

تقبلوا خالص يأسي وإحباطي ونقطتي

كل يوم بتأكد أن السيارة الأتوماتيك أفضل اختيار

كأن الحياة وردية ولا بنقصها الا هذه المنغصات

شكرا لقيامك بزيادة جرعة السعادة اليومية

و بالمناسبة

في هذه التوقيتات كله بيبقى معجنة و مفيش حتة سالكة لا دائري و لا مربعي ولا متوازي مستطيلات حتى
ولكن لكل شيء حكمة
و ارجع و اقول ان الوقت الضائع ده فرصة رائعة للتفكر في باقي المشاكل الحياتية و منها الغلاء على سبيل المثال,فأول ما تعرق و تجيب زيت على طول تفتكر ازازة الزيت ام 11جنبه
ولما العرق ينقط منك تفتكر ان المية مقطوعة في البيت لأجل غير مسمى حتى يلم البواب باقي حق الموتور البايظ من السكان اللبط
و لما دخان شكمان الميكروباص يدخلك من الازاز و تكح للصبح,تعرف ان تبطيل السجاير ده ترف لأنه لا هيقدم ولا يأخر
ولما لمبة البنزين تنور من كتر الوقفة في مكانك...تفتكر على طول الليتر ابو 1.4ج و انه في اشاعات بتقول انه ممكن يوصل ل 2 جنيه
و لما ميكروباص يريح هليك و يجيبلك الاكصدام نصين.....تفتكر على طول انك نسيت تدفع قسط التامين
كما انه فرصة لأنك تسمع القناة الشهيرة ''اعلانات اف ام'' و تتهري اعلانات عن المنتجع الفلاني و الريزورت العلاني و طبعا الموضة و الاستايل....و المول...و الفول,,,,,اي ان فيها جانب ثقافي

و جانب اجتماعي (على رأي الاستاذ سبعاوي صاحب نظرية الجوانب) انك بتتعرف على الناس المحيطين بيك في العربيات المجاورة
يعني تاكسي بيناضل مع عربيته اللي بتقطع منه لما يقف
و عربية متفيمة و بتسمع منها ضحكات خليعة من العينة اياها و ممكن دخان ازرق كمان لزوم القعدة

و اهو كلها خبرة

ياصباح اليأس والأحباط اللى موش عاوز يسيبنا طول ماالبلد دى كابسه على نفسنا أبقوا أقروا " أنا مبسوط جدا هذا الصباح" من أجمل ماكتب سبعاوى

يااا راجل انا امبارح من المعادى لحد الاستاد واصل فى ساعتين و نصف اللى غايظنى انى كنت عايز اعرف ايه سبب الزحمة المفاجئة امبارح فى الاتوستراد - و للاسف هربت من الاتوستراد قبل ما اعرف السر
بس كان فيه جملة واحدة بترن فى ودانى طول الطريق - البلد بتتحرك
نفسى اقابل المسطول اللى اخترع الجملة دى
قال البلد بتتحرك قال !!!!!!!