عرض للطباعة
السلام عليكم جميعاً. يا شباب الخير انا نازل اجازة لمصر الشهر الجاي وعاوز اعرف اسهل الطرق لبعض الاماكن في مصر لاني مش حافظ الطرق جيدا في المحروسة. مكان بيتي علي الكورنيش بجوار كوبري الساحل. الاماكن اللي عاوز اروحها وبتوة في طريقها هي:-
1- كارفور المعادي
2- السندباد
3- دريم لاند
4-الستي ستارز
5- الاهرامات
وكمان لة تكرمتم عاوز اسامي وعناوين اماكن تكون ممتعة لي ولاسرتي عشان افسحهم فيها زي (مطاعم- حدائق عامة- منتزهات - كافتريات ...الخ)
شاكر لكم تعاونكم الكريم. اتمني ما كنش تقلت عليكم
للاسف انا اعرف كل الاماكن اللى انت عايز تروحها بس معرفش فين كوبرى الساحل :majd(4):
خلاص هانعتبر اني عالكورنيش امام مبني التليفزيون او من علي كوبري 6 اكتوبر
مرحبا بك في القاهرة
1- الطريق الي سيتي ستارز :
المول موجود في مدينة نصر حضرتك تطلع كوبري 6 اكتوبر في اتجاة رمسيس وتفضل ماشي مع الكوبري حتي نهايته يعني ما تنزلش اي نزله الا النزلة اللي في نهاية الكوبري وانت كده في طريق النصر هتكمل علي طول وهتعدي علي شريط مترو وبعده هتلاقي تقاطع هتعديه وتكمل علي طول سيب اول يوترن و التاني تلف منه اكنك راجع في طريق النصر سيب اول شارع و ادخل تاني شارع علي يمينك علي الناصية مبني ابيض ادخل الشارع ده وبعد حوالي 50 متر هتلاقي سيتي ستارز علي شمالك .
2- الطريق الي السندباد :
نفس الطريق اللي فات بس هتفضل ماشي في طريق النصر ( من غير ماتلف اليوترن)لحد ماتلاقي كوبري تطلعه وتفضل ماشي مع الطريق لحد نهايته وبعدين تدخل يمين وتمسك اقصي اليسار وتفضل ماشي علي طول الطريق هيلف يمين وانت معاه وتفضل ماشي وتسيب اول يوترن والتاني تلف منه اكنك راجع هتلاقي السندباد علي يمينك
النزله الشمال علشان تروح سيتى ستارز و السندباد زى ما الأخ الفاضل وضحاقتباس:
المشاركة الأصلية كتبت بواسطة faron525
3- كارفور المعادى:
نفس الطريق و تنزل النزله الشمال فى اول يمين و تفضل ماشى طوالى بتاع 10 كم هتوصل عند نفق القطاميه متنزلوش و تاخد يمين من فوقه .. كده انت فى الدائرى تمشى حوالى 3كم هتلاقى يافطه كارفور يمين (هوه على الشمال بس هتاخد لفه 180 درجه يمين و تنزل نفق تحت الدائرى) تبقى وصلت
اقتباس:
المشاركة الأصلية كتبت بواسطة Mido80
الف الف شكر لكم جميعاً
زي ما الاخوة الافاضل شرحوا و بينوا لك الطرق أن شاء الله أدلك علي الاماكن اللي ممكن تروحها :اقتباس:
وكمان لة تكرمتم عاوز اسامي وعناوين اماكن تكون ممتعة لي ولاسرتي عشان افسحهم فيها زي (مطاعم- حدائق عامة- منتزهات - كافتريات ...الخ)
أولا.. المطاعم :
1- نايل سيتي .. علي الكورنيش تعدي كوبري قصر النيل و تدخل يمين من امام نادي المعلمين هتلاقي نايل سيتي علي يمينك
2- لاكازيتا (مصر الجديدة) .. حضرتك و أنت جاي من الاوتوستراد بدل ماتطلع كوبري المطار اللي الاخوة وصفوه لحضرتك علشان تروح السندباد هتأخد يمين الكوبري بحيث الكوبري يبقي علي شمالك و بعدين تمشي مع الطريق يمين هتلاقي معهد المشاة علي يمينك و تلف أول يوتيرن شمال و تكمل علي طول من تحت الكوبري و بعد كده تدخل يمين مع سور مطار ألماظة لحد ماتلاقي مستشفي مصر للطيران قدامك
هاتلف مع الطريق و تكمل علي طول سيب أول يوتيرن شمال و أدخل من التاني قبل ماتحصل نادي الجلاء
بعد اليوتيرن ادخل أول شارع يمين امشي لنصفه هتلاقي لاكازيتا علي الشمال
كمان ممكن تروح الرحاب فيها منطقة المطاعم المفتوحة و المولات (1 و 2) و أماكن خضراء
الطريق للرحاب :
- الطريق الدائري و كارفور علي يمينك تكمل علي طول و تنزل نفق التجمع الخامس و بعد النفق هتلاقي توكيل تويوتا و هوندا علي يمينك تكمل علي طول
- هاتوصل الي أكاديمية مبارك للأمن أنزل النفق و كمل طوالي هاتطلع علي فندق جي دبليو ماريوت و بعديه محطة موبيل
- بعد المحطة مباشرة خد يمين و انزل من علي الدائري في اتجاه طريق السويس
- هتاخد طريق السويس و تعدي علي المدرسة الانجليزية الحديثة كمل علي طول و ماتدخلش من الفتحة اللي جنبها
- هتلاقي بعد كد لافتات الرحاب و طريق جانبي في اليمين و عريض و معظم العربيات اللي ماشية بتدخل منه أدخل معاهم و كمل علي طول هتلاقي مطب صناعي في أخره و بعده صينية كبيرة
- كمل علي طول هتلاقي الرحاب علي شمالك
- لف اليوتيرن زي العربيات مابتلف هتلاقي محطة موبيل علي يمينك و بوابة الرحاب بعدها مباشرة أدخل منها و اهلا بيك في الرحاب
مع خالص تحياتي
م/ سمير الشهاوي