مساعدة من الاخوة الاعضاء

**Mido80** · 20-07-2010 10:34 AM

السلام عليكم جميعاً. يا شباب الخير انا نازل اجازة لمصر الشهر الجاي وعاوز اعرف اسهل الطرق لبعض الاماكن في مصر لاني مش حافظ الطرق جيدا في المحروسة. مكان بيتي علي الكورنيش بجوار كوبري الساحل. الاماكن اللي عاوز اروحها وبتوة في طريقها هي:-
1- كارفور المعادي
2- السندباد
3- دريم لاند
4-الستي ستارز
5- الاهرامات

وكمان لة تكرمتم عاوز اسامي وعناوين اماكن تكون ممتعة لي ولاسرتي عشان افسحهم فيها زي (مطاعم- حدائق عامة- منتزهات - كافتريات ...الخ)

شاكر لكم تعاونكم الكريم. اتمني ما كنش تقلت عليكم

**Omar.Shawki** · 20-07-2010 11:40 AM

للاسف انا اعرف كل الاماكن اللى انت عايز تروحها بس معرفش فين كوبرى الساحل

**Mido80** · 20-07-2010 12:28 PM

خلاص هانعتبر اني عالكورنيش امام مبني التليفزيون او من علي كوبري 6 اكتوبر

**faron525** · 20-07-2010 01:34 PM

مرحبا بك في القاهرة
1- الطريق الي سيتي ستارز :
المول موجود في مدينة نصر حضرتك تطلع كوبري 6 اكتوبر في اتجاة رمسيس وتفضل ماشي مع الكوبري حتي نهايته يعني ما تنزلش اي نزله الا النزلة اللي في نهاية الكوبري وانت كده في طريق النصر هتكمل علي طول وهتعدي علي شريط مترو وبعده هتلاقي تقاطع هتعديه وتكمل علي طول سيب اول يوترن و التاني تلف منه اكنك راجع في طريق النصر سيب اول شارع و ادخل تاني شارع علي يمينك علي الناصية مبني ابيض ادخل الشارع ده وبعد حوالي 50 متر هتلاقي سيتي ستارز علي شمالك .

2- الطريق الي السندباد :

نفس الطريق اللي فات بس هتفضل ماشي في طريق النصر ( من غير ماتلف اليوترن)لحد ماتلاقي كوبري تطلعه وتفضل ماشي مع الطريق لحد نهايته وبعدين تدخل يمين وتمسك اقصي اليسار وتفضل ماشي علي طول الطريق هيلف يمين وانت معاه وتفضل ماشي وتسيب اول يوترن والتاني تلف منه اكنك راجع هتلاقي السندباد علي يمينك

**mohamed_selim** · 20-07-2010 01:45 PM

المشاركة الأصلية كتبت بواسطة faron525

يعني ما تنزلش اي نزله الا النزلة اللي في نهاية الكوبري

النزله الشمال علشان تروح سيتى ستارز و السندباد زى ما الأخ الفاضل وضح

3- كارفور المعادى:
نفس الطريق و تنزل النزله الشمال فى اول يمين و تفضل ماشى طوالى بتاع 10 كم هتوصل عند نفق القطاميه متنزلوش و تاخد يمين من فوقه .. كده انت فى الدائرى تمشى حوالى 3كم هتلاقى يافطه كارفور يمين (هوه على الشمال بس هتاخد لفه 180 درجه يمين و تنزل نفق تحت الدائرى) تبقى وصلت

**ابو ليلى** · 20-07-2010 02:04 PM

المشاركة الأصلية كتبت بواسطة Mido80

السلام عليكم جميعاً. يا شباب الخير انا نازل اجازة لمصر الشهر الجاي وعاوز اعرف اسهل الطرق لبعض الاماكن في مصر لاني مش حافظ الطرق جيدا في المحروسة. مكان بيتي علي الكورنيش بجوار كوبري الساحل. الاماكن اللي عاوز اروحها وبتوة في طريقها هي:-
1- كارفور المعادي
هتفضل ماشى على الكورنيش زى ما انت الكورنيش على يمينك هتقابل ع المنعم رياض تكمل هتقابل مطلع ك قصر النيل كمل من تحت الكوبرى كمل على طول الكورنيش على يمينك كمل هتدخل على القصر العينى كمل دخلت على مجرى العيون على شمالك كمل هتلاقى كوبرى اطلعه هتنزل منه على مدخل المعادى كمل هتلاقى مطلع الدائرى اللى رايح اتجاة الهرم عديه وامشى من تحت كوبرى الدائرى اول ملف شمال تلف منه وتطلع على الدائرى اتجاه القطامية او م نصر هتمشى فيه حوالى 10 دقائق هتلاقى كارفور على يمينك
3- دريم لاند
نفس الشى اللى فات اول ما تنزل نازلة المعادى هتطلع اول طلعه للدائرى (الهرم)هتمشى فيه هتلاقى يفط كتير تقلك الطريق فى نازلة المريوطية خش فيها وعلى شمالك هتلاقى كوبرى اطلعه (ده جديد) هيوصلك على طريق الواحات (هتلاقى يفط عليه )
انزل هناك الطريق هيلف بيك وانت معه بعد ما تنزل هتلاقى دريم بارك على يمينك مافيش 5 دقائق
5- الاهرامات
نفس اللى فات وبدل ما تنزل نازلة المريوطية من على الدائرى عديها وكمل وانزل نازلة الهرم امشى فيها ترعة المنصورية هتكون على شمالك كمل لحد ما تلاقى المدخل الخاص ابو الهول على شمالك ممكن تخش من هنا لو مش عاوز تكمل الطريق زى ما انت وهتخرج على شارع الهرم وخش شمال شمال شمال هتلاقى مطلع الهرم فى وشك على طول .

دى الاماكن اللى واثق منها والباقى ممكن تلاقى حد تانى يشرحها . واجازة سعيده بأذن الله

شاكر لكم تعاونكم الكريم. اتمني ما كنش تقلت عليكم

**Samir Elshahawy** · 22-07-2010 11:38 AM

وكمان لة تكرمتم عاوز اسامي وعناوين اماكن تكون ممتعة لي ولاسرتي عشان افسحهم فيها زي (مطاعم- حدائق عامة- منتزهات - كافتريات ...الخ)

زي ما الاخوة الافاضل شرحوا و بينوا لك الطرق أن شاء الله أدلك علي الاماكن اللي ممكن تروحها :

أولا.. المطاعم :
1- نايل سيتي .. علي الكورنيش تعدي كوبري قصر النيل و تدخل يمين من امام نادي المعلمين هتلاقي نايل سيتي علي يمينك
2- لاكازيتا (مصر الجديدة) .. حضرتك و أنت جاي من الاوتوستراد بدل ماتطلع كوبري المطار اللي الاخوة وصفوه لحضرتك علشان تروح السندباد هتأخد يمين الكوبري بحيث الكوبري يبقي علي شمالك و بعدين تمشي مع الطريق يمين هتلاقي معهد المشاة علي يمينك و تلف أول يوتيرن شمال و تكمل علي طول من تحت الكوبري و بعد كده تدخل يمين مع سور مطار ألماظة لحد ماتلاقي مستشفي مصر للطيران قدامك
هاتلف مع الطريق و تكمل علي طول سيب أول يوتيرن شمال و أدخل من التاني قبل ماتحصل نادي الجلاء
بعد اليوتيرن ادخل أول شارع يمين امشي لنصفه هتلاقي لاكازيتا علي الشمال

**Samir Elshahawy** · 22-07-2010 11:49 AM

كمان ممكن تروح الرحاب فيها منطقة المطاعم المفتوحة و المولات (1 و 2) و أماكن خضراء
الطريق للرحاب :
- الطريق الدائري و كارفور علي يمينك تكمل علي طول و تنزل نفق التجمع الخامس و بعد النفق هتلاقي توكيل تويوتا و هوندا علي يمينك تكمل علي طول
- هاتوصل الي أكاديمية مبارك للأمن أنزل النفق و كمل طوالي هاتطلع علي فندق جي دبليو ماريوت و بعديه محطة موبيل
- بعد المحطة مباشرة خد يمين و انزل من علي الدائري في اتجاه طريق السويس
- هتاخد طريق السويس و تعدي علي المدرسة الانجليزية الحديثة كمل علي طول و ماتدخلش من الفتحة اللي جنبها
- هتلاقي بعد كد لافتات الرحاب و طريق جانبي في اليمين و عريض و معظم العربيات اللي ماشية بتدخل منه أدخل معاهم و كمل علي طول هتلاقي مطب صناعي في أخره و بعده صينية كبيرة
- كمل علي طول هتلاقي الرحاب علي شمالك
- لف اليوتيرن زي العربيات مابتلف هتلاقي محطة موبيل علي يمينك و بوابة الرحاب بعدها مباشرة أدخل منها و اهلا بيك في الرحاب

مع خالص تحياتي
م/ سمير الشهاوي

-

الموضوع: مساعدة من الاخوة الاعضاء

LinkBack

أدوات الموضوع

عرض

مساعدة من الاخوة الاعضاء - انشر الموضوع فى :

-

-

-

-

-

المواضيع المتشابهه

الاخوة الاعضاء فى الكويت مساعدة

طلب هام من الاخوة الاعضاء

عاوز مساعدة من الاخوة الاعضاء

طلب مساعدة من الاخوة الاعضاء

طلب من الاخوة الاعضاء

الكلمات الدلالية لهذا الموضوع

المفضلات

المفضلات

ضوابط المشاركة