الموضوع: مين يدي للحكومة مخالفة !؟

زي ما انا و انا محشور في زنقة ميدان التحرير و هموت في العربية من الملل .. و ظابط ييجي يقولي الحزام فين !؟
من باب الاسترزاق و ليس من باب الخوف علي المواطنين ..

و زي ما الرادار شغال عالمحور الله ينور ..
و الحكومة واخدة حقها و مش متأخرين عنها في حاجة .. و جميع انواع المخالفات بناخدها و بنتعامل مع جميع انواع البشر ..

مين يدي الحكومة مخالفة علي :

الطرق اللي زي الزفت
الزحام اللي اصاب القاهرة بالشلل
بلطجة الناس في الشوارع بدون وجود رادع
بلطجة الحكومة نفسها !
المخالفات اللي مبيتعملش فيها حاجة مع ان هيا فعلا المهمة "واحد ماشي ياخد غرز في جامعة الدول ولا في الهرم الساعة 7 بالليل مثلا!" و دي اللي فعلا بتودي بحياة الناس .. مش الحزام و الدنيا واقفة
بل ان انا ملاحظ ان اللي بيسوقوا عربيات الشرطة نفسها مبيعرفوش يسوقوا ولا بيستعملوا اشارات ولا نيلة.. و ببص في مراياتهم الشمال اقول اكيد هيبص دلوقت الافيه سرحان في ملكوت الله !
و ضباط الشرطة هما اول ناس و قبل اي حد بيخالفوا السرعة علي الطريق بعربياتهم (الملاكي) اللي حاطة اغمق درجة من الفيميه و لوح الارقام المخالفة (سودة مثلا) .. و طبعا لو قابل لجنة رادار بياخد احلي تحية و بيبقي ناقص يضربولوا السلام الجمهوري

هل فيه اي جهاز في الدولة مهمته ان اي نقطة من النقاط دي حتي مش كلها .. تكون مش موجودة ؟
و لو مفيش .. مفيش ليه !!؟ و ازاي يبقي فيه خطوة ان حاجة زي دي تبقي موجودة !

ما اصل اما امين شرطة ولا ظابط يتنطط علي واحد عشان الحزام و هو عارف ان الموضوع هيخلص بفلوس
و صاحب العربية يديله فعلا لأن مشورة الرخصة ما يعلم بيها الا ربنا
طبيعي يتعمل كدة في كل الناس
ازاي بيتم المراقبة علي مثل هذه الجرائم !؟