بتدفع بقشيش في التوكيل؟؟؟
السلام عليكم.
يمكن يكون سؤالي غريب, بس أنا تعرضت فعلا للحيرة لما رحت للتوكيل لإجراء بعض أعمال الصيانة.
في الأول كنت قاعد في الاستراحة زي الباشا ( أو زي الزبون :) ) , بعدين حسيت اني مش مطمئن علي اللي بيحصل في العربية برة . قلت أطلع اتفرج من بعيد كدة و لو حد كلمني أبقي أرجع.
المهم اول ما طلعت برة و واقف أتفرج من بعيد, لقيت واحد شغال هناك بيقولي عربيتك دي حضرتك (مشيرا لسيارتي) , قلت له اه عربيتي ايه الأخبار. راح موطي صوته شوية كدة و جه جمبي قوي و قاللي انا عملتلك فحص شامل علي العفشة يا بيه و ربطهالك عشان كان فيه حاجات عايزه تربيط و تحت أمرك يا بيه :) (هو اللي بيبتسم ابتسامة ملونة).
أنا فهمت هو عايز ايه بس الصراحة استغربت. حتي في التوكيل نظام البقشيش و الكلام دة.
يا تري الناس دي بتاخذ بقشيش فعلا و دة حقهم الطبيعي ولا اللي حصل معايا دة كان حالة عارضة يا صابرين علي رأي محمد صبحي ؟ :)
علي فكرة أنا ما روحتش التوكيل الا المرة دي.
أحمد