ياجماعة أنا آسف جدا والله ما قصدت أضايق حد
أنا بعتذر عن كل كلمة قلتها ضايقت أي أخ لينا في المنتدى
إحنا هنا كلنا هدفنا مساعدة بعضنا مش إن إحنا نضايق بعض
المشكلة بس إن تكرار المواضيع بيعمل مشكلة مع الوقت، يعني إنت بعد كده لما تحب تدور على موضوع زي ده تاني حتلاقي في مواضيع كتير جدا. وتبقى تايه من موضوع للتاني. وده اللي بيحصل معانا كلنا وممكن في الآخر نقول ده منتدى تعبان وبيتوه اللي بيدور على معلومة فيه ومافيهوش معلومة مفيدة. ده فعلا اللي حيصل.....
أنا والله ماقصدتش أستهزئ بأي عضو جديد عندنا (وحقك عليا لو كنت فهمت كده) بس إنت كده حاول تدور على موضوع زي موضوعك كده أو تعمل عليه بحث حتلاقي مواضيع كتير جدا ومش حتعرف تخرج منها بمعلومة مفيدة بسبب التكرار اللي زاد عن حده.
وبعدين ياسيدي، إنت لو بصيت على عدد مشاركاتي حتلاقيه لا يتعدى 50 مشاركة في أكتر من سنتين، يبقى فين الخبرة اللي عندي في المنتديات اللي بتقول إن هي مش عندك. ومع ذلك أنا فعلا آسف إني ضايقتك.
وعشان كده أنا معاك خطوة خطوة إن شاء الله لحد ما تشتري عربية تكون نفس المواصفات اللي إنت بتحلم بيها.
وعشان تعرف إني صادق معاك. حقولك نبدأ إزاي البحث:
أولا: إنت عندك كام سنة؟ وده سؤال مهم جدا عشان نعرف إحنا بنتكلم في أي فئة.
ثانيا: بتشتغل إيه وفين وعلى بعد قد إيه من مكان سكنك؟ وده عشان نعرف نلاقي حاجة تتناسب واحتياجات وظيفتك اليومية.
ثالثا: دي أول عربية حتشريها ولا لأ؟
رابعا: متعلم السواقة جديد ولا عندك خبرة كافية؟
خامسا: أخبار الأوبشنر اللي نفسك فيها إيه؟
ده مبدئيا، وعلى أساس الإجابات اللي حتقولي عليها حنقرر إحنا حنتكلم في كام عربية.
المفروض إن الحاجات دي كلها كانت تنكتب مع سؤالك في الأول عشان الإجابات ما تبقاش بحر ما نقدرشي نعوم فيه :)
وحقك عليا تاني وتالت ورابع وخامس ومارشدير كمان لو حبيت، والله ما قصدت حاجة :)
والسلام ختام
المفضلات