الموضوع: نفسي الرجالة في مصر يبطلوا حاجتين؛ التدخين والمعاكسة

هو في ايه!!!!! الرجالة في مصر يشتركون في عيبين اساسيين هما التدخين والمعاكسة (إلا من رحم ربي)
اما عن التدخين فحدث ولا حرج. الساعة 6 ونص الصبح تلاقي ناس قاعدة بتشد شيشة على القهاوي وناس ماسكة سجاير في العربيات والشوارع، والساعة 2 باليل برضه..حتى في السينيما، يادوبك الاستراحة (الخمس دقائق) تلاقي الرجالة جري على الطرقات وهاتك يا تدخين لدرجة إن رائحة الدخان تخش لك الصالة..قال يعني خلاص مش قادرين يمتنعوا عن التدخين لمدة ساعتين فقط.
تيجي تخرج مع اصحابك يقعدوك على قهوة بالساعات وهاتك يا شيشة لدرجة إنك تروح البيت بريحة على هدومك في منتهى القرف..الناس بتعزم على بسجاير بطريقة غريبة لدرجة إني احيانا باكدب عليهم واقولهم بادخن شيشة فقط لاحسن يقولوا على فرفور :-))))
الحل: أنا عملت بيتي وعربيتي زي المسجد..ممنوع فيهما التدخين. وكل اصحابي عارفين كدا لدرجة إن تقريبا ماحدش بقى يجي لي البيت..بس نفسي اخرج في مكان مافيهوش على الأقل شيشة!!!!

وأما عن المعاكسة فحدث بكل حرج...حاجة تكسف بجد. مافيش واحدة حلوة ولا وحشة، ستايل ولا بلدي، محجبة ولا سافرة، صغيرة ولا كبيرة، في الشارع ولا في العربية ولا في الشغل ولا في البيت حتى..مابتتعكسش ولو حتى بنظرة...في ايه يا جدعان مش كدا صحتكم بالدنيا. ماحدش يقول لي إن البنات بتحب تتعاكس او هن يلبسن الزاهي واللاهي للفت النظر..ربنا امر بغض النظر كما امر بالحجاب..المدهش او الفظيع التحرش بالعنف..تلاقي سواق التاكسي كل الناس بتكسر عليه ولما يلاقي واحدة سايقة هادي يقوم يتنرفز ويزمر ويكسر عليها علشان يسمعها كلمتنين..يعني هي لو كان راجل إللي سايق هادي ماكنش يستجري يبوق فيه..وياعيني على الست إللي بتركب تاكسي ويا عيني أكتر لو معاها عيال وشنط!!!! فين الرحمة؟ فين الأخلاق؟ فين الشهامة؟؟ فين الجدعنة؟؟ فين الرجولة؟؟ الرجولة بجد