زوجتي والسيارة

**shooter123** · 22-07-2010 12:57 AM

انا خلاص تعبت من زوجتي
عربيتي ماشية معايا بقالها ولله الحمد الله اكبر 8 شهور كل اللي احتجته صيناة ال 10000 كيلو خلال ثمانية اشهر فقط غير كدا ملهاش اي طلبات تانية
وبعد ما هي شايلة المدام لوالدتها مرة ولمرسي مطروح مرة وللدكتور مرة مش ممكن تصرف عليها اي فلوس ولا حتي تدفع تمن معطر علي رالرغم ان كل الفلوس اللي معاها بتاعتي وهي مش بتشتغل
بس موتها وسمها ان العربية تحتاج فلوس زي ما يكون ضرتها العربية دي
انا لسه جاي من عند بتاع العفشة العربية محتاج جلد مقصات وتيش يمين حيكلفوا 250 جنية يا خرابي علي اللي حصل
مع اني وبكررها تاني دي فلوسي بس انا اللي بشيلها معاها حتي لما اخد مكافأت برده بديهالها
قولولي اععمل اية وعربيتي دي عمرها ما دقت معايا النقص ابدا ابدا وانا لازم طبعا اراعيها

**MaZaGAngeE** · 22-07-2010 01:14 AM

همه الستات كده
عندهم تصرف على حشيش و لا تصرف على العربية
حاجة غريبة فعلا

**shooter123** · 22-07-2010 08:09 AM

شكرا عزيزي علي مرورك
بس انا عايز الاقي حل للمشكلة دي
مفيش ادامي غير حلين يا اطلقها يا ابيع العربية

**zoro007** · 22-07-2010 09:08 AM

ولايهمك ياباشا سايسها بكلام معسول لحد متصرف نظر عن اللى فى دماغها
هما الستات كدا
ونصيحه بعد كدا متقولهاش على اى حاجه تخص العربيه وخصوصا لو فيها مصاريف

**mramzy** · 22-07-2010 09:12 AM

فلوسك فى جيبك وعربيتك تحت رجلك
وانت حر
امال لو عرفت انك متجوز عليها كانت هتعمل ايه

**shaddadfalcon1** · 22-07-2010 09:23 AM

مش كل حاجه تقولها لمراتك
ريح دماغك

انا لسه الأسبوع اللي فات صارف حوالي 1000 جنيه علي الكوتش والفرامل ولما مراتي عرفت عملت موال
قلتلها مش احسن ماالكوتش يضرب والا الفرامل متمسكش اقوم لابس في حاجه واموت وتتشردي انتي والواد قامت ساكته منطفتش

**ahmed76** · 22-07-2010 09:28 AM

اقول لحضرتك فكره حلوه

قولها فعلا العربيه وحشه وخاربه بيتنا انتى اولى بالفلوس واديها الفلوس
وقولها هانركن العربيه اسبوع ونركب مواصلات ( مره تتشعبطوا فى الاتوبيس وطبعا هاتركبوا ومش هاتعرفوا تنزلوا و مره تاكسى ياخد منك 30 جنيه فى مشوار ما يسواش 4 جنيه وتتخانقوا وتروح القسم ومره تقفوا فى الشارع ساعة ونص علشان مستنى المينى باص الاخضر اللى كان جديد )

وابقى طمنى

**ZALABANY** · 22-07-2010 09:44 AM

ياعم الموضوع بسيط ما تديهاش كل الفلوس يعني تجيلك مكافأه او اوفر تايم خليهم على جنب للعربية

**Michael_Lanos** · 22-07-2010 09:50 AM

ريح دماغك وماتتكلمش غير لما تتسأل، كانك فى النيابه او رايح انترفيو .. تجاوب على قد السؤال فقط
وربنا معاك ومع كل المتجوزين

الله يصبحه بالخير نادر ابو الليف .. بيقول حكم

**husseinsalah** · 22-07-2010 09:51 AM

بص يا باشا بعد محاولات مضنية من زوجتىباءت كلها بالفشل انى اديها مرتبى وتصرف على البيت وتوفر اللى توفرة وكان دايما ردى واحدة اية اللى انتى عوزيتة وانا ما جبتوش فى حدود المعقول فالبتالى لوصرفت اى فلوس على العربية مش هتعرف وزى ما قالو الزملاء هم الستات كدة وعلى فكرة هى كانت من اشد المعارضين انى اشترى عربية لانها عارفة ان العربية هتكون ضرتها