اول حاجة سالت الناس الجامدة هنا فى بروتون ازاى احجز وادونى رقم الموبيل اللى حجزت بيه
حجزت فى فرع ابو رواش لان الصراحة طلع فعلا احسن عشان هنا فى امكانيات وورش كتير بيكشفوا على كل كبيرة وصغيرة
اهم حاجة فعلا تحجز لان بيكون زحمة جدا .. والاهم لما تحجز خد ميعاد بدرى وروح بدرى لان لو عديت الساعه عشرة هتلاقى ناس كتير واقفة وعربيات كتير وهاتطول فى الدور
انا وصلت الساعه 9 الصبح لاقيت نفسى تانى عربية ... قبلنى المهندس شرحلى كده فى السريع ايه هى صيانة الالف .. وهى بيغير زيت وفلتر وبيعمل اتشيك على حاجة فى العربية من موتور وعفشة وكهرباه والذى منه ... وبعد كده بيسألك لو كان فى حاجة بتشتكى منها .. انا كان عندى فى عضة فى الفتيس .. راح مسجلها وقالى هانبص عليها .. وقالى ان صيانة الالف والخمسة والعشرة اجبارى وبعد كده ليك حق الاختيار بعد العشرة تمشى عشرات ولا خمسات ..
صيانة الاف من غير مصنعية .. بعد كده يضاف المصنيعه يعنى صيانه الخمسة قالى ب 320 .
تكلفة الصيانة 170 جنيه .. ومتساش تاخد معاك كتاب الضمان عشان يسجل فيه ويتختم .. بعد كده بيتديله مفتاح العربية وبيقولك تقعد فى الصيانة وقالى هاتستلم العربية على الساعه 11 ونص
بس بتستنى فى الاستراحة .. لو معاك لاب توب خده وفى هناك نت .. عيش الحياة .. جت الساعه 11 ونص استلمت العربية .... الغريب بقى انهم اكتشفوا انها عايزة تغير صندوق دريكسون ... قالى انه بيسرب زيت .. انا الصراحة مش فاهم البتاع ده بيعمل ايه ولا ايه وظفته وازاى عرفه معرفش وانا الصراحة مش بشتكى من حاجة فى الدريكسون ..
المهم قولتله يعنى امشى بيها عادى قالى اه عادى وادانى رقم مدير قطع الغيار وقالى هاتتصل بيه وتقوله عشان يحجزلك واحد وتيجى تركبه هنا تبع الضمان.
ياريت لو حد فاهم البتاع ده بيعمل ايه ولا ايه وظفته وايه خطورته على العربية يفهمنى..
انا عندى الباور كويس ومفهوش مشكله ..
بس بعد اما استلمت العربية .. الصراحة .. بدأت فعلا تروح نسبيا العضة فى الفتيس دى هى بتظهر اكتر شوية فى النقلة التالتة
العربية حسيت انها فاقت اكتر وصوت الموتور مبقاش بيعلى بسرعه..
متهايلى والله اعلم لسة مش متأكد ان بدأ سنة نسبة استهلاك البنزين تقل شوية بس لسة برضه استهلاكها انا مقتنع ان استهلاكها كتير على عربية 1300 سى سى
التكيف جميل ومش بيأثر عل السحب ..
لحد دلوقتى الحمد لله مش عندى اى اصوات غريبة..