السلام عليكم
انا عضو جديد فى المنتدى الرائع ده و لسة ماليش مشاركات كتير. و حكايتى بأختصار انى راكب هوندا سيفيك 97 بقالى 13 سنة ماركبتش غيرها . و فى ظروف معينة كده هاتضطرنى ابيعها و عاوز اشترى عربية تانية تكون اتوماتيك و حالتها كويسة . الفلوس اللى معايا من 40000 جنيه لحد 60000 او 65000 جنيه بالكتير . انا عارف ان الفرق كبير بين الرقمين لكن فعلا هى دى الحقيقة انا معايا اربعين حاليا و ممكن اتصرف فوقهم فى 20 او 25 بالكتير.
انا بقالى فترة بدور و محتار حيرة الدنيا و اليكم عينة من العربيات اللى بفكر فيها:
لانسر كريستالة
لانسر مكوة
لانسر بومة
مازدا فاميلى 323 موديل 99
مازدا 2001
تويوتا ياريس
كيا سيفيا 99 -2000
كيا شوما
رينو كليو 2005 1400 سى سى
بروتون واجا 2005 - 2006 - 2008
بروتون جين تو
اوبل فيكترا 2000 : 2002
اوبل استرا 2004
نيسان صنى 2003
كرايسلر نيون 2000
شيفروليه افيو 2008 مثلا
شيفروليه اوبترا
بى ام دبليو 1993
طبعا انا لو طرحت الموضوع عامة فى المنتدى و قولتلكوا ها؟ ايه رأيكوا غالبا هاتشتم او عالأقل هاتلخبط اكتر و مش بعيد حد مايعجبوش كل ده و يقوللى طب و ليه مافكرتش فى الجولف :)
فانا قولت ابدأ معاكم انتوا تقولولى رأيكوا فى اللانسر بصفة عامة و هل هى افضل اختيار فى الرينج ده ولا لأ. و انهى موديل افضل و ليه؟ و المكوة تحديدا ايه اخبارها معاكوا لأن متهيألى انها اقل لانسر انتشارا فهل ده عشان عيب فيها ولا ايه ظروفها؟ و ايه ظروف اعادة البيع؟ و ايه ظروف ال 1300 سى سى خصوصا مع التكييف و بالذات انى كنت راكب هوندا 1500 سى سى و عمرى ما عرفت الفرق فى الموتور بين التكييف من عدمه ؟ و بردو تقولولى لو هاشترى واحدة اكشف عليها ازاى وز اهم الحاجات اللى اطمن عليها فيها ايه؟ و اخيرا سعرها كام لو واقفة و مشدودة صح ( مشدودة موتور و عفشة مش متروشة عتب و الحاجات دى)؟ و لو حاجة قدامكم نضيفة يا ريت تقولولى انا ساكن فى مدينة نصر.
مع العلم ان المهم عندى فى العربية (اتوماتيك - تكييف - باور - حالة ) و انى بسافر بيها كل اسبوع رايح جاى و معايا اسرتى و مش عاوز عربية مش امان او تعمللى مفاجئات كتير فى الطريق او ثباتها وحش.
و اخيرا شكرا جدا جدا جدا ليكوا و لكل القائمين على المنتدى الرائع ده
مهندس/ محمد توفيق