العفشجي خبطلي العربيه

**M.Zaher** · 22-07-2010 07:36 PM

السلام عليكم ورحمة الله وبركاته

للمره التالته العربيه تتخبط وانا مش جواها
انا خلاص اتخنقت و مش عارف اعمل ايه

روحت لبتاع العفشه عشان يبصلي على كاوتشه الميزان
فالمهم قاللى هاجرب العربيه طلع و رجع عشان يدخل الورشه و هوه داخل حك الرفرف الخلفي شمال في الجدار و اضطرينا نرفع العربيه من ورا بايدينا عشان ماتحكش اكتر

هوه قاللى لما تجيب العربيه هاوديهالك تترش

انا مش عارف اعمل ايه اوديهاله يعملي شغل العفشه ويرشلي الحته دي ولا بلاش انا مخنوق منه و عايز ادوسه بالعربيه

ونفسي الاقي حل لخبطات العربيه دي
كده عندي الجنب الشمال كله مجكوك
الرفرف الشمال تاكسي دخل فيه وهيا راكنه
البابين عربيه نص نقل ريحت عليهم
و اخيرا الرفرف الشمال الخلفي العفشجي خبطه

خايف ارش الجنب كله الاقيه اتبهدل تاني
ومش عايز اسيبها كده عشان مش كل شويه واحد يقولي هوه انت مابتعرفش تسوق ولا ايه

ياريت تشوروا عليا اعمل ايه

**Mzeid** · 22-07-2010 07:39 PM

لا
انا رأيي تخليها شوية و ربنا يحميك من الحسد

و بعد مدة ابقى رشها براحتك

**M.Zaher** · 22-07-2010 07:55 PM

المشاركة الأصلية كتبت بواسطة Mzeid

لا
انا رأيي تخليها شوية و ربنا يحميك من الحسد

و بعد مدة ابقى رشها براحتك

لااااااااااااء
ماتقوليش كده
عشان كل مره يقولولي خليها عشان الحسد و اهو الجنب كله دلوقتي بقى مخبطوط

**windofchange** · 23-07-2010 03:26 AM

الحمدلله اولا واخيرا قدر الله وماشاء فعل بس من راييء انك اي حته في جسم العربية مفيهاش بويه وعرضه للصدأ ثم البارومة اعملها الأول واعزلها عند بتاع الدوكو وبعدين ابقي فكر هدخلها سمكرة ودوكو ولا لأ اذا كانت مستاهلة في شوارعنا الجميلة دي وربنا يهدي جميع الصنايعيه ويرزقهم العمل بحديثه صلي الله عليه وسلم "لن يؤمن احدكم حتي يحب لأخيه مايحب لنفسه"

**omaroof** · 23-07-2010 02:18 PM

الحل بسيط اخى زاهر
1- تعمل توديها للعفشجى يظبتهالك ويرش كمان الحكه او تعملها انته عند حد تانى
2- تطلع صدقة عن العربيه وتكون فى الخفاء
3- علق عليها اذكر الله او لا اله الا الله من الخلف وطول مانته ماشى حاتاخد حسنات
وربنا يبعد عنك الحسد ويعطيك خيرها ويبعد عنك شرها
( والحمد لله انها بتتخبط وانته بره العربيه سلامتك بالدنيا)

**w-m-a** · 23-07-2010 10:01 PM

انا بتاع الفرامل دخل بيها فى اتوبيس نقل عام
بس الحمد لله الرفرف بس

**amro1965** · 24-07-2010 08:51 AM

قدر الله وماشاء فعل
لكن لى ملحوظه انا مقتنع بيها تمام الا وهى من اتلف شىء فعلية اصلاحة
من هذا المنطلق نعطى لانفسنا وغيرنا ان نكون حريصين عن استخدام أى شىء لا نملكة
بعكس انا لا اقبل العوض لو لم تقبل العوض سوف تعطى للمستهتر التمادى فى استهتارة
ولكم هذه القصة
انا ماشى فى امان الله فى طريق طوالى وماشى على سرعه 40 كيلو نظرا لان الشارع الطوالى يتخلله شوارع جانبية
اجد سيارة خارجة بسرعه من الشوارع الجانبية وتخبطنى مباشرة فى الباب الايسر الامامى واجد زجاج الباب اتنثر فى وجهى الباب ااطبق 0
خرجت من السيارة اجد سيدة خارجه بدون مقدمات تقول انا مش غلطانه ورغم ان المنطقة هادئه خرج ولاد الحلال يقنعونى ان اسامحها وان هى ممكن تكون زى اختى او زوجتى فى هذا الموقف وانى طبعا مش هقبل العوض
لكنى اصريت ان اجعلها تتحمل ولو جزء من الخسائر اللتى لحقت بى حتى تنتبه لحالها فى المرات القادمه

**Akram** · 24-07-2010 12:43 PM

كده كده لازم تعمل العربية كلها ,
فإذا ما كنتش خلصت شغل العفشة يبقى روحله و خليه يكمل شغله و متحسبوش , و ده بدل الخبطة ,

و اعمل العربية كلها و يا ريت تخرج حاجة لله ,
و حاجة مهمة جداً فيه أذكار ممكن تقولها صباحاً و مساءً و ربنا هيحفظ عليك مالك و أهلك .