كيف تشترى جين 2 فى سبع خطوات ( الحلقةالسابعة و الاخيرة - الاستلام)
السلام عليكم ورحمة الله وبركاته
اولا قبل كل شىء احب اشكر كل اعضاء قسم بروتون بشكل عام على كل المعلومات والاضافات والنصائح والخبرات اللى اكتسبتها عن طريقهم من يوم ما اشتركت معاهم فى هذا المنتدى المحترم منذ سنة وثلاث اشهر تقريبا واللى ساعدتنى على اختيار سيارة انا شايفها من افضل واجمل السيارات فى فئتها واللى انا بعتبرها فعلا الصفقة الرابحة للى يقدر يفهم قيمتها و ويعرف اد ايه السيارة دى بامكانياتها وقدراتها مقابل سعرها صفقة اكتر من رابحة .
واحب طبعا اشكر حبيبى واخويا الصغير ايمن على مساعدته ليا و وقوفه جنبى من اول الحجز لغاية الاستلام بشكل انا مستحيل كنت اتخيل ان فيه حد ممكن يساعدنى فى موضوع شراء السيارة واستلامها بالشكل ده . ايمن ده يا جماعة بجد شخص استثنائى صعب جدا ان يتكرر لدرجة انى بحس ان فعلا اكتر حاجة بتسعده ان يكون سبب فى اسعاد الناس اللى يعرفها .
ربنا يوفقه ان شاء الله فى نتيجته وفى حياته القادمة ان شاء الله . شكرا يا ايمن
الحمد لله انا استلمت امس السيارة جين 2 2010 اوتو حمراء وعلى الرغم ان الاحمر مكنش هو رقم واحد بالنسبة لى وانا رايح استلم والحقيقة انا مش عاوز احكى اللى حصل فى موضوع اللون ده عشان كان الموقف الوحيد اللى ضايقنى شوية ومش عاوز افتكره بس انا الحمد لله الاحمر مبسوط منه جدا وخايف منه جدا لان العربية الجين بأى لون لافتة للنظر فما بالكم بالاحمر ؟ ما شاء الله ربنا يحفظها لنا ويكفينا شرها ان شاء الله .
سبحان الله اول ما وصلت لقيت الغندورة اللى بقت بعد كده جنجونتى واقفة قدام المعرض وانا داخل من الباب ومستنى الجين السوداء اللى كنت رايح اجيبها وبعد ما موضوع اللون تازم مش عارف كل ما ابص بره الاقى العربية والله زى ما تكون بتبص لى واقول فى نفسى يا بنتى انا جاى لواحدة تانية مش ليكى اخرج وادخل وابص بره الاقى عينى بتروح لها وكانها قدرى اللى كنت مفكر نفسى ههرب منه ولكن هيهات ان يفر المرء من قدره .
المهم موضوع اللون الاسود فشل واتخنقت جدا وخرجت وانا وايمن قابلنا هناك واحد من زمايلنا فى المنتدى وهو المهندس طارق والحقيقة شخصية جميلة جدا جدا وكان جاى يعمل صيانة الالف للجين بتاعته والمفاجاة باه معاه لون ايه ( احمر ) واعد يقول لى اد ايه اللون فعلا جميل والاسود له مشاكل فحسيت ان دى اشارة ما , المهم قررت انى هشوف العربية الحمرا .
رحت انا وايمن والمهندس طارق وراجعنا العربية من ورا لقدام ومن جوه لبرة و كان فيه مشكلة فى قفل الشنطة والمهندس مصطفى حلها لنا الحمد لله و الحقيقة ايمن وطارق لما شفتهم وهما بيراجعوا على العربية ولا احسن خبراء جايين من ماليزيا الموضوع كان عبارة عن واحد اتنين تلاتة اربعة وعلى سبيل المثال تم مراجعة الاتى على طريقة محمد عبد العال اللى كتبت موضوعه عن الاستلام معايا وانا رايح استلم :
1- بودى العربية والدهان
2- الجنوط والكاوتش
3- الفوانيس الامامية والخلفية والفوجات والاشارات
4- المساحات
5-التكييف
6- مكن الازاز
7- الفتيس وصوت الماتور
8- عدد الكيلو مترات
9-التنك والشنطة والكبوت
10- الباركنج سينسور
11- السى دى والمالتى فنكشن والمرايات الجانبية
12-الكتيبات وملحقات السيارة ( استبن وكوريك وعدة )
13- الكنبة الخلفية والكراسى
الحمد لله تم عمل المراجعة وخلصت باقى الاجراءات وانطلقنا على الطريق والحمد لله العربية جميلة جدا على الطريق الفرامل بس عاوزة تعود بس الموضوع بسيط وانا من الناس اللى متعودة على السيارات بتاعة المواقع اللى فى قلب الصحراء فطبعا عفشة الجين بالنسبة لها ملبن والموضوع مش مؤثر بالنسبة لى والحمد لله بالنسبة لزوجتى على الرغم من تعودها على سيارة والدها اللى اكيد انعم من الجين 2
الحمد لله وصلنا البيت بسلام والمشكلة الوحيدة حاليا الباركنج سينسور اللى اعتقد انه هييس بعد ما العربية اتغسلت بس انا مش هتفرق معايا اى حاجة مهما حصل او ظهر فى العربية انا بجد بحب العربية جدا جدا جدا وعندى استعداد ابلع لها الزلط واكتر .
الحمد لله على كل شىء وربنا يهدينا خيرها ويكفينا شرها وشر العين ان شاء الله.
وهنا احب انهى سلسلة المواضبع السبعة اللى كنت قررت انى اعملها وكان الهدف منها مساعدة كل عشاق بروتون والراغبين فى شرائها فى انهم يلاقوا كل المواضيع اللى ممكن تساعدهم فى الاختيار والمقارنات و اماكن قطع الغيار واخيرا الاستلام .
يارب اكون وفقت انى اكون فعلا ساعدت الشريحة العريضة دى فى مرحلة ما قبل الشراء فى اتخاذ قرار بناءا على اساس واضح وخبرات البروتوناوية القدامى.
شكرا لبروتون اللى خلتنى اتعرف على كل الناس المحترمة دى وشكرا لكل البروتوناوية
