الموضوع: تقرير مبدئي عن Skoda Roomster

بسم الله الرحمن الرحيم

في البدايه و بدون مقدمات احنا بقالنا فتره بندور على عربيه تكون واسعه و مريحه في السفر و تستحمل شغل و سفر ,

بقالنا فتره كبيره جدا بنفكر في الكارينز لدرجة اننا في مره خدنا العربون و رحنا معرض بس ملقيناش الكماليات الي عايزينها فـ ربنا ما اردش اننا نشتريها,

و في يوم واحد صديق والدي عرض عليه الروومستر و عجبته جدا,
فالحمد لله توكلنا على الله و اشتريناها ,

المقارنه المبدئيه بينها و بين الكارينز على الواقف كده في المعرض دي ليها مزايا و دي ليها مزايا,

اولا الوسع لصالح الكارنز ( مش فرق كبير قوي لكن ملحوظ طبعا ),

ثانيا جودة التقفيل و الخامات لصالح الرومستر (فرق ملحوظ ),

ثالثا فرق الكماليات لصالح الرومستر,

رابعا فرق السعر مش كبير حوالي 6 الاف جنيه مصري فقط لا غير,

خامسا اسعار الصيانات تعتبر لصالح الرومستر لان بحسبه بسيطه الكارنز كل 20000 بتغير زيوت و فلاتر و بوجيهات في حين الرومستر البوجيهات كل 60 و فلاتر على ال40 و ال60 مش كل 20 و ده لصالح الرومستر,

سادسا اسعار قطع الغيار تقريبا متقاربه جدا,

سابعا مراكز الصيانه و سهولة الصيانه لصالح الكارنز ( فرق ملحوظ )

ثامنا العمر الافتراضي و قدرة التحمل : على الورق و المعطيات نقول الرومستر - انما على الواقع الله اعلم محدش عارف بكره هيحصل ايه

و دي كانت مقارنه سريعه على الواقف بين الرومستر و الكارينز,

نيجي للتقييم نفسه بالنسبه للرومستر ( ننسى الكارنز دلوقتي و منحاولش نقارن بينها و بين الي هقوله ):

الكلام ده عن فئة الكومفورت اعلى فئه,,

مبدئيا السياره الحمدلله واسعه و مريحه في الجلوس ( كرسي طري مريح )

تمكّن السائق من كل الوظائف و الاوبشنز مريح لان كل حاجه التحكم بتاعها من ذراع خلف المقود,

شاشة البيانات واضحه ومبينه كل المعلومات لان السياره كلها مداره بالكمبيوتر ( بقلّق انا من الحاجات الجديده دي ) يعيب التابلوه اللون الاخضر كان نفسي الاضاءه تكون لونها احمر بحيث تدي شياكه و خصوصا ان التابلوه و الفرش اسود ( مش مشكله قاتله بالنسبالي لان اصلا عندي السوبارو اخضر برضه )

الكاسيت CD\Mp3 و في وصلة AUX مكانها خلف فرامل اليد ( مستغرب من المكان ده خصوصا ان لو وصلته بـI-Pod مثلا مفيش مكان احطه فيه ),

المرايات الجانبيه سيئه و مش كاشفه الجوانب كويس و طبعا بما ان العربيه عاليه و طويله نسبيا فدي مشكله خطيره,

التكييف لذيذ مش ثلاجه و مش ضعيف,

لون الفرش البيج على العربيه فخم جدا و شكله تحفه و حقيقي مديها فخامه عاليه جدا بس طبعا مينفعش معانا بسبب صعوبة تنظيفه و الحفاظ عليه , فاضطرينا نتنازل عن اللون الي عاجبنا الي هو الشامبين بسبب لون الفرش عشان يكون أسود,

من الحاجات الي مكيفاني وجود ثلاجه في التابلوه ( بصراحه حاسس ان كفائتها مش قد كده لكن اهو عملوا الي عليهم ) موضوع الثلاجه ده بيفكرني بالكريسيدا الي كانت عندنا زمان,

من الحاجات الي عاجباني برضه اماكن التخزين لانها كتيره و مخدومه صح,

اما منطقة التحميل فهي كويسه و ميزتها انهم عاملين شبك بحيث يحافظ على الامتعه عشان متقعدش تتدحرج و تتكسر او توجع دماغ الي سايق,

نيجي بقه للتقييم العملي ( السواقه لا مؤاخذه ):

اولا العربيه و هي دايره ناعمه جدا متحسش بيها ابدا,
بداية الطلوع بتكون بطيئه جدا بس لغاية 20-30 كم\س بعدين العربيه تبدأ تجمع صح,
صوتها خشن شويه و جهوري كده,
اول ما تدوس بنزين تحس ان العربيه قطعت بوجيهات بس فجأه تلاقيها راحت مزعقه و قامت تجري,
العفشه مش ناعمه قوي ولا ناشفه بتهبّد في الي راكب,
على الملفات مناورتها معقوله بالنسبه لعربيه عاليه عن الارض,
تجميعها كويس و خصوصا على الtip-tronic ,
صوتها مسموع لو قرصت شويه لكن عزل الصالون كويس,
ثباتها حتى الان الحمدلله كويس بس لسه مجربتهاش في طرق ينفع احكم فيها لان اعلى سرعه وصلتلها حتى الان كانت 100 و مش لفتره طويله ( لكن طبعا فرق الثبات ملحوظ بالمقارنه بالسوبارو )
العربيه فيها ESP بس لسه محستش بيه او مش عارف هو بيستخدم ازاي,
بالنسبه لاستهلاك البنزين لسه مجربتوش لكن العربيه لما اتفولت على الاخر قاللي قدامك 450 كم و العربيه التانك بتاعها 55 لتر يعني تقريبا 8,1 كم\لتر و ده معدل ضعيف بس يمكن عشان لسه في الاول,

نيجي للكماليات:
مثبت السرعه ده اختراع وهمي و خصوصا في السفر و احلى حاجه انك لو دست فرامل و قللت السرعه تدوس على زرار RES الي في الدراع تلاقيها راحت دايسه بنزين مع نفسها لغاية ما تجيب السرعه تاني و تثبت نفسها عليها ,
العربيه طبها فيها بلوتوث,
كمبيوتر الرحلات بتاعها ظريف,
جنط 16 بس بروفايل الكاوتش قليل فخايف من البقاليل,
سقف بانوراما ( مش شايفله ميزه قوي سواء صباحا او مساء الوقت الوحيد الي ممكن يكون حلو فيه هو ساعة المغربيه كده ),
زجاج خلفي ملون,

بالنسبه لعوامل الامان:
العربيه فيها 2 ايرباج,
ESP او نظام الثبات الالكتروني,
مدعمه بقفص صلب عشان الصدمات لا قدّر الله,
مصفحه من تحت الموتور,
فرامل ABS
فرامل ديسكات امامي و خلفي,
سمك الصاج 0.8
غلق صمام البنزين عند الحوادث لا قدّر الله ,
السياره حائزه على 5 نجوم في اختبارات التصادم و 4 في حماية الاطفال و 2 في حماية المشاه,

عادات الشعب الصري:
كما هو متعارف عليه في مصر,
اي واحد ربنا بيكرمه بعربيه جديده لازم طفل او حد مريض نفسيا يمتلك مسمار انه ياخد جنب العربيه في ايده و هو ماشي ( الحمد لله على كل شيء )

ده تقريبا تقرير مبدئي للعربيه و ادعولي ان ان شاء الله نكون موفقين فيها و ربنا يبارك فيها و يكفينا شرها,
و الحمدلله على كل شئ,,

و دي بعض الصور للعربيه ( الصور من على النت ),