الموضوع: هل توافق على تعريف الناس لأماكن الحوادث المميتة ؟؟!!

استكمالا لموضوعي (أفكار ومقترحات وملاحظات للحد من الحوادث في مصر)

http://www.nilemotors.net/Nile/showthread.php?t=16517

فيه فكرة عندي من زمان بافكر فيها وتستحق فتح موضوع خاص لها علشان أعرف رأيكم فيها :

- الفكرة اني عايز الناس تعرف بشكل دائم في كل شارع وطريق ان في المكان ده حصلت حادثة مميتة (يعني سواء حادث سيارتين او اكثر مع بعض ومات فيها حد من الركاب ، أو حادث سيارة خبطت مشاه) والغرض من الفكرة ان الناس تعرف ان المكان ده خطر وبالتالي اللي سايق يهدي سرعته والماشي يركز في تعدية الشارع نظرا لخطورته


- طيب ايه العلامة التي تعرف الناس كده. ممكن تكون اي حاجه وابسطها ان يتم دهان حجر واحد من الرصيف بلون مميز (أحمر مثلا) في نفس مكان الحادث


- ممكن حد يقول ده هيكون تشويه للشوارع يعني كل كام متر نلاقي حجر أحمر ، أرد عليه ان لو الموضوع ده هيردع شوية اللي سايق ويخليه يخفف سرعته لما يشوف اللون الأحمر أو ينبه الماشي لما يعدي الشارع انه ينتبه يعني بنمنع حصول حادث جديد فده اهم ألف مرة من تشويه منظر الشارع


- طبعا الكلام ده لو حصل هنفاجأ بشوارع فيها حجارة حمرا كتير ، مثلا طريق الكورنيش في اسكندرية وشارع الهرم وفيصل وشوارع تانية كتير وكوبري السيدة عائشة بالكامل


- كمان الفكرة دي هتوضح أكثر الأماكن اللي بيحصل فيها حوادث مميته وممكن محدش يكون منتبه لها ، يعني تخيل لو الفكرة دي اتطبقت ولقينا ان في منطقة معينة من احد الشوارع فيها خمس حجارة جنب بعض يعني حصل هنا خمس حوادث مميتة في أوقات مختلفة اكيد كده الناس هتهتم شوية


- انما انا عايز كل واحد يتخيل لو هو ماشي في طريقه العادي اليومي للشغل ولقى الحجر الأحمر ده من حجارة الرصيف اعتقد ده هيخليه ينتبه زيادة ويهدي سرعته

ايه رأيكم ؟؟

المشاركة الأصلية كتبت بواسطة MMamdouh

على كدة مصر كلها حتبقى حمرا

المشكلة مش فى العربيات... المشكلة فى المشاه اللى 99% من الوقت ماشيين فى نهر الطريق و بيعدوا من اى حته بدون اى اعتبار لاشارات او اماكن عبور المشاه

MMamdouh

المشاه غلابه جدا في بلدنا يعني تخيل ان واحدة ست معاها طفلين او ثلاثة وعاوزة تعدي طريق النصر او صلاح سالم اوشارع الحجاز او جسر السويس او اي شارع رئيسي في القاهرة تعمل اية ؟؟تلعب اكروبات في الطريق ولا تمشي 2 كيلو لغاية ما توصل لمكان فية كوبري او اشارة :(
انا عن نفسي لو حصلت معايا .. ح اوقف تاكسي واقوله يوصلني الناحية التانيه من اي u turn
والله باتكلم بجد مش هزار