حاجة بتغيظني أوي

**abo_lamar** · 23-07-2010 09:18 AM

السلام عليكم يا شباب
فب حاجة بجد بتغظني أوي وانا سايق .....
أكون مثلاً ماشي في الحارة الأولى وعايز اتخطي العربية اللي قدامي واروح الحارة التانية السريعة , طبعاً ببوص في المرايا عشان اتأكد ان الحارة الشمال فاضية أو على الأقل فيها عربية بيعدة عني وممكن اعدي من قدامها ... اللي بيضايقني اني اول ما ادي اشارة شمال ... الاقي العربية اللي في الحارة الشمال حتى لو بيعدة عني صاحبها بيزود السرعة اوي عشان مايدنيش الفرصة اني امشي قدامه ... بجد مش فاهم هما بيعتبروها اهانه ان عربية تانية مشيت قدامهم ولا ايه بالضبط ... والموضوع ده بيتكرر كتيييييييير حتى مع أصحابي للدرجة دي سلوكيات الناس بقت تعبانه اوي وعايزة صيانة زي عربياتهم بالضبط .

**w-m-a** · 23-07-2010 12:13 PM

عالم تنرفز
فعلا ده بيحصل كتير

**ibrahimsaad** · 23-07-2010 12:32 PM

انا لاحظت ده فعلا واعتقد انهم بيعتبروها اهانه او ازاى يعنى تعديه وللاسف بتدخل فى حوار سباق وسرعات وكثير بيكون سببه حوادث

**ganash** · 23-07-2010 12:58 PM

وممكن بيكون خايف انك متلحقش تعدى

**darehawk** · 23-07-2010 01:07 PM

فعلا والله كلام مظبوط وممكن يحرق على التاني او التالت عشان محدش يدخل قدامه

**Eng.Geo** · 23-07-2010 01:39 PM

فاهمك وحركة وحشة قوي
بس عايز أقولك
انا عملتها قبل كدة
وحد ورايا وكان هيعديني من شمالي قمت قافل عليه
بس مش رخامة
انا كنت شايف واحد علي اليمين ناوي علي غرزة شر
ولو كان الي ورايا عدي كان هتبقي في مجزرة قطع غيار لا قدر الله
وبعد كدة وسعتله تاني
راح باصصلي زي مايقول أنت بتهبب أيه
شاورتلة اني بتأسف وخلصت علي كدة
مش لازم اللي بيقفل عليك يبقي بيدايقك

**Ralliart** · 23-07-2010 02:13 PM

الحركه دي كانت هتلبسني في ميني باص في طلعة كوبري الدقي من اللي بيقفو على اليمين اول الكوبري وانا كنت وراه وفي اوكتافيا على الشمال ورا خالص فانا اديت اشاره ولسه بزود بنزين لقيت بتاع الاوكتافيا عمل كيك داون مش دوسه عاديه ونطلي جنب المرايه فانا رديت الدركسيون يمين لقيت الميني باص واقف في وشي وكبست فرامل جامد جداً ووقفت الحمد لله وبتاع الاوكتافيا اخد قاموس شتايم

ومرره واحد ضيع عليا شارع محي الدين ابو العز وانا مدي اشاره من قبله ب100 متر ودا رشأ يميني وكل ما ازود يزود معايا واهدي يهدي معايا
والمشكله ان اللي بيعمل كده مش فاهم ان دا حقي هومقتنع ان دي الحاره بتاعت ابوه وعيب ان حد يخش فيها من غير اذن

**=ISLAM=** · 23-07-2010 02:19 PM

المشاركة الأصلية كتبت بواسطة elakawy

السلام عليكم يا شباب
فب حاجة بجد بتغظني أوي وانا سايق .....
أكون مثلاً ماشي في الحارة الأولى وعايز اتخطي العربية اللي قدامي واروح الحارة التانية السريعة , طبعاً ببوص في المرايا عشان اتأكد ان الحارة الشمال فاضية أو على الأقل فيها عربية بيعدة عني وممكن اعدي من قدامها ... اللي بيضايقني اني اول ما ادي اشارة شمال ... الاقي العربية اللي في الحارة الشمال حتى لو بيعدة عني صاحبها بيزود السرعة اوي عشان مايدنيش الفرصة اني امشي قدامه ... بجد مش فاهم هما بيعتبروها اهانه ان عربية تانية مشيت قدامهم ولا ايه بالضبط ... والموضوع ده بيتكرر كتيييييييير حتى مع أصحابي للدرجة دي سلوكيات الناس بقت تعبانه اوي وعايزة صيانة زي عربياتهم بالضبط .

ده حتي لو العربيه التانيه بعيده عنك ممكن تلاقيه كبس كلاكس للصبح علشان يحسسك انك عملت جريمه في حق الوطن ويسلام لو عداك بعدها يقعد يبصلك بمنتهي القرف