الموضوع: رحلة في قطر الصعيد .... وابور الساعة 12

فكرتني برحلة اسوان الي الاسكندرية القطار واخد وقت 15 ساعة وكان اسباني درجة تانية... والرحلة دي كانت مليئة بجميع انواع العذاب ( ماهي رحلة 15 ساعة بقي )... يعني بالليل عادي انك تلاقي الفئران عمالة تجري ورا بعضها علي الرفوف بتاعة الشنط وساعة ما اي فار يظهر تلاقي الصريخ بتاع الاطفال ابتدي يشتغل .... وطول الطريق بالليل والناس نايمة تلاقي مناظر بني ادمين غريبة راكبة القطار وممكن بالليل يتعمل علي الركاب شغل ازاي يعني ؟؟ اقولكم .... يركب ثلاثة مع بعض واحد يقف في اول عربية القطار والثاني في اخر عربية القطار و الثالث يعمل انه بياع سريح ويقعد ينادي رايح جاي مع ان معظم الركاب نايمين وهوب تلاقيه يحط عينه علي موبايل او شنطة حريمي وياخدها و ينطوا كلهم من القطار .. والكلام ده اتحكالي قبل كده وكان حيحصل معانا لولا ان راكبة في عربية القطار حست بالموضوع ده وصحت بقية الركاب النايمين وقالتلهم خلي بالكم بيتعمل عليكم شغل وانتم نايمين !! كل ده غير انك طول ال15 ساعة عمال تبص علي شنطك اللي علي الرف لان كل محطة قطار بيركب فيها ناس بتلاقي اللي طالع عمال يزيح في الشنط وممكن ببساطة يحط حاجته بين شنطك وممكن تحصل لخبطة او سرقة للشنط ....
كل ده بخلاف ان دورات المياه معظمها ما فيهاش مياه اصلا و ممكن تلاقي التكييف بتاع القطار بايظ .... ده غير البني ادمين اللي راكبين القطار تطويق بدون حجز من محطة القطار ودول حتلاقيهم غالبا قاعدين جنب باب الحمام وده طبعا بيخليك قلقان لو انت او حد مرافق ليك رايح الحمام.... بجد كانت رحلة عذاب ده غير طول مسافة الطريق .... ويجعله عامر !!

المشاركة الأصلية كتبت بواسطة MaZaGAngeE

من أحلى أغاني فريد الأطرش يا وابور الساعة 12 يا مقبل ع الصعيد .
و فيه أغاني تانية كتيره كلها بتغني لقطر الصعيد
كمان فيه أغاني فلكلورية لحد دلوقتي عن القطر
ياريت كل اللي عارف أغنية يحطها هنا

طبعا عمرنا ما سمعنا عن قطر اسكندريه و لا طنطا و لا أي بلد بحري و لا حتى الاوتوبيسات بتاعتهم
دي ميزه خاصة جدا بينا احنا أبناء الصعيد

كل ده كنت بفكر فيه و انا راكب قطر الصعيد مبحر على مصر في رحلة مفاجأة و مفيش مواصلات خالص قلت اركب قطر الصعيد و اهه يفكرني باغاني جميلة ( هند رستم كانت بترقص في القشاش )
و لكن زي أي حاجة حلوة في مصر القطر قذر بصورد لا يمكن وصفها , ريحة الحمام اللي في آخر العربية ( ارضيته نصها مفتوح على الأرض ) واصلة نص العربية
الناس اللي راكبة عنيفة بشكل غير مبرر و لا معقول , الكمساري بلطجي و قليل الأدب بدون أسباب , القطر وقف تخزين نص ساعة و كان واضح ان ده طبيعي لأن الناش كانت قاعده عادي جدا و أغلبهم نزل من القطر قعد في الأرض لحد ما القطر زمر ركبوا,
الباعة الجائلين شكلهم هربانين من السجن و أشكالهم مريبة جدا , و بضاعتهم رخيصة لدرجة اني أظن انها مسروقة , طبعا همه كتير بشكل مبالغ فيه ,

الله يرحم قطر الصعيد اللي غناله فريد و رقصتله هند رستم
و أنا غلطان و مش هعمل كده تاني

هاهاها والله انت كده كارمه جداااا
انا فى جامعة فى الصعيد فى اسيوط والحمد لله مش بركبو ابدا بس الظروف مرتين اتزنقت و ركبتو وكل مره بقول كام ساعه ويعدوا لكن اللى بيحصل غير كده خصوصا الريحه دى بتبقى تموت
بس الحمد لله انا قلت لو هاموت مش راكبو تانى بس الحيوانات مبقوش بيعملو مواعيد من الساعه 5 لحد الساعه 11 باليل مفيش قطر مكيف مبحر وبجد الواحد بيبقى هايموت ويرو ح بس الحمد
لل المهم انك عرفت تعيش هاهاهاها