لو إنت مكانى تعمل ايه ؟

**محمد ابراهيم 1** · 27-02-2008 01:26 AM

ماشى بعربيتى فى أمان الله فى منطقه شعبيه على أقل من مهلى و فاتح قزاز العربيه نص فتحه ولابس البدله وفجأه يجيلى من فوق كيس بلاستك مليان ميه يدخل العربيه ويغرق العربيه والبدله والناس اللى تحت البيت بمنتهى اللامبالاه يقولولى معلش
بصراحه أنا نزلت من العربيه وشتمت بألفاظ صعبه معرفش طلعت منى اذاى لدرجه انى نادم جدا عليها بس بصراحه معرفتش أمسك نفسى

**ahmedateya** · 27-02-2008 01:35 AM

المشاركة الأصلية كتبت بواسطة محمد ابراهيم 1

ماشى بعربيتى فى أمان الله فى منطقه شعبيه على أقل من مهلى و فاتح قزاز العربيه نص فتحه ولابس البدله وفجأه يجيلى من فوق كيس بلاستك مليان ميه يدخل العربيه ويغرق العربيه والبدله والناس اللى تحت البيت بمنتهى اللامبالاه يقولولى معلش
بصراحه أنا نزلت من العربيه وشتمت بألفاظ صعبه معرفش طلعت منى اذاى لدرجه انى نادم جدا عليها بس بصراحه معرفتش أمسك نفسى

غلطان طبعا جداجدا جدا
ايه الل يندمك على حاجة زي دي اصلا
بالعكس ده اقل واجب انك شتمت
و انا عمري ما بفتح الازاز اكتر من ربعه

بس اشتم واجري على طول لتلاقي اكياس المية اتحولت لطوب:D

**Chicco** · 27-02-2008 02:33 AM

لو مكانك حاعمل كده برضه ....... لكن لو فكرت شوية و عرفت اسيطر على إنفعالي (صعب إن ما كانش مستحيل :o ) حامشي بعربيتي و أقول حسبي الله و نعم الوكيل و أتعلم مافتحش الشباك

**Noha.M** · 27-02-2008 02:36 AM

لا اله الا الله :( معلش برضه انا عارفة اكيد فقدت اعصابك بس برضه متسيبش نفسك اعصابك هي اللى تتسيطر عليك انت اللى تسيطر عليها .. و " الكاظمين الغيظ " بس مقدرش اقول معندكشر حق .الناس كل مادا بتزداد غبااء!!!!!!!

**Ahmed Anwer** · 27-02-2008 02:44 AM

اعذر اخاك فإن لم تجد له عذر فقل ربما له عذر

يا اخي ممكن يكون بالصدفة ملا كيس بلاستيك ،، مياه

و بالصدفة راح بيه البلكونة ،،

و بالصدفة وقع منه ،،

و بالصدفة دخل من ازاز عربيتك ،،

**Chicco** · 27-02-2008 03:06 AM

\/ \/ \/
صدفة طبعا يا باشا :)

**Ahmed Anwer** · 27-02-2008 03:10 AM

المشاركة الأصلية كتبت بواسطة Chicco

\/ \/ \/
صدفة طبعا يا باشا :)

ههههه ،،

أصل انتا عارف يا دكتور ،،

لو كان وقع عليه غسيل يبقي ماشي ،

كوباية شاي احتمال ،،

عيل صغير بتحصل ،،،،،،،

لكن كيس مليان مياة ،،،، هههههه

بالذمة ليه الواحد يملا كيس مياه ؟؟؟

معلهش لصاحب الموضوع ،، إحنا بنهزر بس ،،

**Chicco** · 27-02-2008 03:23 AM

عيل صغير بتحصل ،،،،،،،

موافق حضرتك يا باشا على نظرية الصدف ما عدا ديه :D
محمد باشا "اللي يعيش ياما يشوف بس اللي قاعد في مصر حيشوف أكتر";)

**hazem_khidr** · 27-02-2008 05:18 AM

لو مكانك و في منطقه شعبيه او غيره و محدش عارفني حاخد بعضي و امشي من سكات و اقول حسبي الله و نعم الوكيل.
لانك لو وقفت ممكن تتكسر انت و عربيتك و مالكش ديه عندهم .
كويس انك طلعت سليم يا محمد باشا :)

**sab3aawy** · 27-02-2008 09:04 AM

فكرتنى يا محمد بموقف عجيب من نفس النوعية حصل لى، طالع بيتنا فى امان الله ، وانا على السلم الاقى شلال مية غرق كل هدومى، ابص ياعم الاقى قناص كوماندوز عنده بتاع 6-7 سنين كدة ورابط على دماغة ايشارب كوموفلاج وماسك مسدس مية ومتحصن بدرابزين السلم جنب شقتهم ومشتنى الضحية القادمة التى تصادف ان تكون العبد لله، طبعا انا مسكتتش وصرخت فيه"ايه قلت الذوق دى " رد على بكل براءة-وسفالة الأوغاد فى عينيه- قائلا: معلش يا عمو مكانش قصدى ، انا بصراحة اتنقطت من منطقه العجيب ، يعنى هو لبس الإيشارب الكوموفلاج و ملأ المسدس ميع وجلس متحصنا بالدرابزين فى صبر منتظرا الضحية القادمة، وداس على الزناد وغرقنى مية ، وكل ده بدون قصد ، كدة يعنى بالصدفة، يعنى مش بس قله ادب، لأ استعباط كمان ، فطبعا عليت صوتى لحد ما امه خرجت ، رحت مسمعها اللى فيه القسمة عن اهمال العيال تركهم للشارع ليربيهم ورحت طالع بيتنا،

حاجة تقرف