بفكر اشترى فليشيا بس محتاج رأيكم ضرورى جدا...

لو سمحتم انا حاليا عايز اشترى أول عربيه ليا فى حياتى وأنا قدامى عربيه سكودا فليشيا موديل 95 بس لسه ما جربتها و أنا قرأت كلام على النت عن الفليشيا ان عفشتها ناشفه بس انا الصراحه زى ما وضحت لكم جديد فى حكاية شراء العربيات دى فمش عارف حكاية ان العفشة ناشفه دى تعتبر ميزه و لا عيب فى العربيه و كمان سمعت انه فيه عيوب فى العربيه زى ان الدريكسيون تقيل أوى عن الموجود فى العربيات الكورى من نفس فئتها و مشكلة سخونة العربية فهل فعلا الكلام ده صحيح عن العربيه و لا لأ و اذا كانت المشاكل دى موجوده فهل هى فى كل موديلات الفليشيا .. و أسف جدا جدا على الأطاله

انا لسه مشتريها من اقل من شهر وهحاول اساعدك مع اني مش خبير فى السيارات
بس هحكيلك على العربية والي شايفه
اولا العربية واسعة من الداخل وديه ميزة اظن اوسع هاتشباك موجود
ثانيا العربية مش ناشفة بالشكل الى الناس بتتكلم عليه فروق مش حاسس بيها ويمكن عشان انا جديد ومش بحس بالفروق البسيطة ديه
ثالثاُ : قطع الغيار يقال انها غالية بس هيه متوفرة ومش غالية لو حطيت فى اعتبارك وجود بدائل كتير فيه الصينى والتركي والاصلي والاستيراد فقطع الغيار متوفرة ومش غالية
رابعاً : بتمشي ببنزين 80 كويس والحمد لله
خامسأ : مشكلة الحرارة موجودة طبعاً فى الصيف وممكن ما تحسش بيها ابدأ طول ما الزيت كويس والميه كويسة ومتابعها 0مش بتنقص ) وكل فترة معقولة تكشف على الرداتير وعينك على الحرارة وخلصت
سادساً : انا اول ما جبتها بأمانه دفعت 2000 جنيه في شويه صيانة مع انها كانت ماشية كويس بس عشان كنت بغير الحاجات الاستهلاكية الموجودة وكمان غيرت حاجات عشان اقدر امشي بيها وانا جديد ومش تعمل حركة نقص معايا (وربنا يستر )
لو احتجت اي حاجة ممكن تسألنى واحاول اساعدك

شكرا جزيلا على ردك يا غالى هل انت شريها مستعمله و لا فيه منها زيرو و هل تعرف لو انا غيرت لها الرداتير علشان مشكلة السخونه دى هيتكلف كام ؟

العربية معايا من 3 سنوات ...
هتبخل عليها في الصيانة هتقرفك

هتحط ايدك فيها بمزاج هتريحك تماماً

وكفاية انها بتوفرلك في البنزين 80 .

اقتباس:

---

المشاركة الأصلية كتبت بواسطة prince_25025

شكرا جزيلا على ردك يا غالى هل انت شريها مستعمله و لا فيه منها زيرو و هل تعرف لو انا غيرت لها الرداتير علشان مشكلة السخونه دى هيتكلف كام ؟

---

عفواً يأخي بس ياريت اكون افدتك
اولاً : انا مشتريها مستعملة فليشيا موديل 95 وهيه ما فيش منها زيرو
ثانياً : تغير الرداتير مش ضروري بالمرة الا لو بايظ وده الى بيحكم عليه الفني كل الحكاية انك هتحتاج تظبطه وتتأكد انه تمام ومش هيكلفك كتير في الصيانة بتاعته على حسب الى فيه يعنى ممكن يتنضف بس ويبقى تمام التمام

اتمنالك التوفيق وربنا يكرمك بعربية حالتها تكون كويسة وممتازة ويكفيك شرها
ايمن

نصيحه من واحد معاه فليشيا لا تشتري العربيه دي بسبب
1 - مشكله الحراره صعبه فيها و غالبا محدش بيحلها
2- السحب مقارنه بالعربيات الاخري ضعيف
3- بنزيين 80 مع الوقت الطويل هيقضي علي الكربراتير
4- بعض قطع الغيار لازم عند تغيرها تكون اصلي و الا مش هتشتغل كويس و دي مش هتلاقيها بس في التوكيل و بيرفض بيعها يجب تركيبها عندهم و ممكن يرفضوا لان لو العربيه معمول فيها شغل بره بيرفض التوكيل الشغل فيه نصيحه من اخ

جزاكم الله كل الخير أخوانى على هذا الأهتمام و انا بعد تفكير قررت أنى هأستنى شويه لحد ما أجمع مبلغ كويس و أشترى دايو لانوس لأنى الصراحه مش عايز أجيب عربيه وتتعبنى معاها.

ربنا يوفقك باذن الله

انا لسه جايب عربية فليشيا نفس الموديل من 3 شهور
بصرحة هي عربية مش وحشة كبداية العربية عملية جدا في استهلاك البنزين
العربية حجمها من الداخل بالنسبة للعربيات الهتشبك من نفس الفئة تعتبر واسعة
الشنطة حجمها مش كبير (( معقولة بالنسبة لأسرة صغبرة )) العربية غير مجهزة لتركيب تكيف
العربية تستعملها مياة خضراء للتبريد و زيت توتال للماتور وقطع غيارها معقولة و متوفرة و الاصلي منها بتركبة و بتنساه
صاج العربية قوي و العربية سرعتها كويسه بتوصل الي 130 كيلو العربية سبته علي الارض مش زي العربيات الالي هاي 100 تلقيها بتعوم لو العربية حاتها كويسة انصحك بها كبداية (( لأنها أحسن من العربيات الصيني الموجودة في السوق من نفس الفئة )).
علي فكرة الدريكسون مش تقيل امال دريكسيون العربية اللادا يبقي اية اهم حاجة تشوف العربية كويس و يكون بالنهار في نور ربنا و توديها لواحد عفشجي يبص عليها و تشوف حال الصاج و اكيد حتلقيها رشه نظافة بص علي البرومات كويس و حالة الماتور عشان تعرف تقدر ثمن العربية صح (( و ربنا يوفقك و يكفيك شرها ))

السلام عكم و رحمة الله و بركاته

بص سا باشا انا كنت فى موقفك ده من تلات شهور و الحمد لله ربنا و فقنى و اشتريت فيليشيا 97 بعد مقارنة بالأكسيل و التويوتا ستارليت و الفورد اسكورت
و رايي كالتالى:
العربية مش ناشفة أوى زى ما بنتخيل لما بنسمع من الناس بالعكس لكن برضه مش هتحس انك راكب لانسر
العربيه واسعة من جوة و شنطتها كويسة جدا و كمان فيها امكانية توسع اكتر لما بتنيم الكنبة من الآخر بتبقى ربع نقل
الصاج بتاعها تقيل و جامدة فى الحوادث لا قدر الله
بجيب بيها 130 و ثابتة جدا
مشكلة السخونة سمعت انها موجودة فى موديلات 95 و 96 و بصراحة الحمد لله مش بعانى منها بس فعلا لازم تاخد بالك من النيه لأنها بتخلص بسرعة
قطع الغيار معقوله جدا فى منها صينى و تركى و المانى و كمان فى اتنين ورا اركاديا مول بيبيعوا استيراد زى الفل
بعض اسعار قطع الغيار

وش فانوس شبورة زجاج 10
فانوس شبورة كامل 75
وش فانوس خلفى 25
وش فانوس اشارة امامى 20
علامة خلفى 15
حلة فتيس استيراد 130
مكنة ازاز يدوى استيراد 175
أكرة ازاز 15
علبة دريكسيون اصلى 800
علبة دريكسيون صينى 250
علبة دركسيون اصلى استيراد 250
غطاء زيت موتور 20
كونسول استيراد 250
عيب العربية الوحيد بالنسبة ليا انها بدون تكييف و لو ركبلها تكييف غير بتاعها هتعمل مشاكل فى السخونة
كمان لازم تشترى عربية تكون نضيفة جدا و الا هتفتح بقها

فى ناس بتحطلها 80 لكن الكتالوج بيوصى ببنزين 91
و ربنا يوفقك

جزاك الله خيرا اخى الكريم على المعلومات الجميله وانا الحمد لله جبتها من حوالى 3 اسابيع والحمد لله ماشية كويس معى
و صاحب الموضوع ربنا يوفقك واتوكل على الله وقبل الشراء صلى ركعتين استخاره وربنا يسهله لك ان شاء الله