الموضوع: ايه رأيك في سواقه السيدات في مصر ؟؟؟

والله فى ستات بتعمل كوارث بالعربيات و بتكون سايقه و نايمه كده زى ما تكون ماشيه فى شقتها..
فى ستات عشره على عشره حريفه و سواقتهم حلوه جدا بس ده للستات اللى بتسوق من زمان..
البنات الصغيرين و الشابات بيسوقو حلو برضه
المشكله فى الستات اللى بيتعلموها و هما عندهم 40 سنه و 45 سنه..
وبرضه فى رجاله معلش يعنى سواقتهم سيءه جدا جدا جدا زى مايكونو سايقين فى الفضاء و الشارع مفهوش غيره....

يا جماعة انتو نسيين الهم اللي الناس عايشة فيه
الست بتبقى سايقة وبتفكر هاتطبخ ايه انهاردة والأوطة غليت ولا لأ وهدوم المدرسة بتاعة العيال عاوزة تتغسل هاغسلها امتى ووووووو...................
الراجل بيبقى سايق وبيفكر مراته طالبة منه طلبات اد كدة يجيبها معاه وياترى الطلبات ديه سعرها غلي عن امبارح ولا لسة. طب وفلوس الدروس الخصوصية لازم تدفع قبل اخر الشهر يانهار مش فايت دا النهاردة 27 في الشهر والاقساط لازم تدفع. العربية عاوزة تتصلح. المدير بتاعي في الشغل منكد على اللي خلفوني والشغل اخر قرف ووووووووووووووو................
طبيعي انه يدي اشارة شمال وينساها ويدخل يمين دا لو ادى اشارة اصلاً وطبيعي انه يسرح ويحك اللي جانبه او يلبس في اللي قدامه.

انا متأكد ان اي واحد سواء راجل او ست في خلالسنة هايكون بيعرف يسوق كويس بس المسألة اكبر من مجرد تعلم المشكلة في الحالة اللي الناس عايشة فيها وضيف على كدة كل الكلام اللي اتقال قبل كدة من انعدام الاخلاق والبجاحة وعدم الاعتراف بالخطأ وقانون (البلطجة السواقية في الشوارع المصرية) اللي ممكن يكون عنوان كتاب والصبر اللي مبقاش مجود عند الناس. محدش مستحمل حد من القرف اللي الناس عايشاه.

المشاركة الأصلية كتبت بواسطة Hossam_Hassan

يا كيمو بلاش السيرة اللى تحرق الدم دى

فعلا سيره تحرق الدم يا حسام :)

المشاركة الأصلية كتبت بواسطة OlaOsman

طيب كويس ان السيرة دي اتفتحت عشان عندي كلمتين واقفين في زوري بقالهم فترة و هايحصل لي حاجة لو ما قلتهمش

شوفوا يا جماعة.. واضح ان الآراء اجتمعت على ان سواقة النساء حاجة آخر هبل و أرف و بيعملوا أخطاء كتيرة.. و في اكتر من مرة سمعت فيها من اكتر من حد من أعضاء المنتدى ان بعض الأخطاء دي ناتجة عن حقائق علمية زي مثلا ان رد فعل المرأة بيبقى أبطأ من الرجل و تقدير الأبعاد عن المرأة أقل منه عند الرجل.. يعني لو سلمنا بإن ده حاجة في طبيعة المرأة يبقى كده متهيألي الوضع هايختلف.

نيجي بأه لنقطة تانية هامة جدا و هي اني ما أظنش ان الستات مستمتعين اوي بسواقتهم في القاهرة العامرة.. و لا بتزنيق سواقين الميكروباصات عليهم و لا بضغط الأعصاب في الشوارع و لا زحمتها و لا بنظرة الرجال ليهم من سائقي السيارات على نفس الطريق.. فتعالوا نتفق ان السواقة في مصر حاجة مش ممتعة خالص.. و ده للجميع، ستات و رجالة.. صح؟

حيث كده بأه فياريت نستحمل بعض و بلاش نناطح الصخر، عشان كما تبين ان سواقة الستات بأت حاجة ضرورة و امر واقع المفروض اننا نحاول نتعلم ازاي نتوائم معاه.. ده غير ان كتر الكلام بصورة سلبية عن سواقة الستات و أخطائهم بيدي انطباع عام و حكم مسبق عليهم كلهم بإنهم فاشلين في السواقة و ده بيخلي الناس في الشارع متحفزة ضد اي ست بتسوق و لو حصل خبطة بين عربيتين احداهما قائدة السياة سيدة هتلاقي الناس على طول مغلطاها مع ان فيه احتمال و لو 1% انها ما تكونش هي اللي غلطانة.

تاني بارجوكوا.. بلاش نستمر في نغمة الستات فاشلين في السواقة دي عشان ده مش هايحل حاجة.. ده يمكن يعقد المشكلة اكتر.

عادي ياعلا قولي اللي نفسك تقوليه بس ماتنكريش ان ده بحصل فعلا

المشاركة الأصلية كتبت بواسطة losfer

لا عند الناس كلها سيرة تحرق الدم
انا ممكنة اعدى وسط مقطورتين ومعديش بين واحدة ورصيف حتى لو فرق 20 متر
:dتحركاتهم مش مضمونه
ابسط حاجاه حصلت معايا قبل كدة
واحدة مديه اشارة شمال وماشيه اساسا شمال
افتكرت انه الشارع اللى الناحيه التانيه يمين يعنى وجابت الشارع من شماله ليمينه وهى مديه فلاشر شمال برضه
عادى جدا ولا اكنها عملت حاجه

:d:d:dانه بلاء على الطريق

ده الطبيعي ياباشا مش حاجه جديده :)

المشاركة الأصلية كتبت بواسطة emadkamel

انا شخصيا مابحبش التعميم المطلق فى اى حاجه .... ماقدرش اقول كل الستات او حتى اغلبهم سواقتهم وحشه .... يعنى كل الرجاله اللى راكبين ميكروباصات وتوك توك وموتسيكلات الدليفرى والنقل العام وكتير قوى من الملاكى ... كل دول سواقتهم كويسه؟ هل يعتبروا عينه ممثله لجنس الذكوره وبالتالى الحكمم ان الرجاله مابتعرفش تسوق؟

انا شخصياً مراتى بتسوق والحمدلله سواقتها ممتازه وعاقله وملتزمه بالاشارات وكل حاجه ... ومعتمد عليها تماما فى كل مشاوير البيت وابننا لأنى خارج مصر معظم السنه

انا من رأيى بمنتهى البساطه فى "ناس" بتسوق كويس و"ناس" بتسوق وحش

انا ماقولتش كل البنات وانا معممتش ياباشا انا بقول منهم ؟؟ ومنهم ؟ بس اغلبيتهم بيعملو مصايب :)

المشاركة الأصلية كتبت بواسطة novocaine

المصريين مابيعرفوش يسوقوا ستات و رجالة
هتقوللي ليه
هأقولك عشان اللي علموهم برضه مابيعرفوش يسوقوا!

انت علشان تمشي في مصر بعربيه تبقي انت احسن واحد بتسوق

المشاركة الأصلية كتبت بواسطة onna

بس بأة والنبي عشان انا لسة راجعة من مدينة نصر اهو للمعادى و بجد اتحرق دمي مييييييية مرة في الطريق لحد ما وصلت على الاوتوستراد دة

لا ستاااااااات ولا رجاااااااااالة

هتقلي الست مبتشف المراية لسه حااالاااااااااا واحد بيسوق من غير مرايات اصلا !!! و التانى قفلهم !!!!!!

الست بطيئة و خايفة على عربيتها ..لسة حالا كنت هلبس في راجل ماشي على 10 في طريق النصر و ماشي على الشمال فجأة الباشا دخل u turn و لقيته في وشي و مبيشمشيييش اصلاااا !!!!!! و بجد كنت هلبس لبسة وحشة

الست ماشية تخبط في اللى حوليها لسة حالاااا عربية ميجان قدامى رمت علي الجيتز و يظهر الراجل سرح و جرحله عربيته و مشي..

الست مبتركنش كويس و تقعد 3 ساعات .. و انا طالعة البيت بعد حرقة الدم دى الاقي الراجل اللى عنده مكتب في الارضى عندنا راكن المرسيدس بتاعته نصها جوه و النص التانى بره و سايبهاا و انا اصلا ساكنة على شارع رئيسى

يعني من الاخر كدة لا تعايرني ولا اعايرك الهم طايلنى و طيلك

كل ده حصلك في مشوار واحد الله يكون في عونك

المشاركة الأصلية كتبت بواسطة OlaOsman

انا ما بانكرش انه بيحصل.. و مين يقدر ينكر؟ و عشان بيحصل و هايحصل فمتهيألي ندور لهم على حل.. و لو ما قدرناش او الحل مش في إيدنا، يبقى نتوائم مع الوضع القائم زي بالظبط ما بنتوائم مع زحمة الطرق و خلاص قربنا نتعود عليها.

و أظن انت لاحظت من ردود الناس في موضوعك ان الأخطاء بتحصل من الجنسين، و يمكن من الرجالة اكتر عشان همه لا يزالوا الأغلبية و عشان همه سواقين الميكروباصات و التاكسيات و اللوريات و التريللات، و زي ما قتل لك، مافيش حد مبسوط من السواقة في مصر، و كل ست بتسوق تتمنى ان جوزها يجيب لها سواق يوديها المشاوير بتاعتها - و اللي معظمها بيكون للبيت و الأولاد. انما امكانيات الرجالة المادية ما تسمحش بإنهم يجيبوا سواق لزوجاتهم و للأسف همه برضه الرجالة اللي مش مستحملين سواقة الست في الشوارع. يا ريت حد يحل لنا المعضلة دي بدل الشكوى المستمرة من سواقة الستات من غير محاولة إيجاد حل.

والله يا علا فعلا الاخطاء بتحصل من الجنسين انا معاكي في ديه بس نسبه الخطأ اكبر من عند البنات والستات
وانا عندي الحل ان الستات تقعد في بيتها وماتسوقش وتسيب السواقه للرجاله يخبطو في بعض :)

المشاركة الأصلية كتبت بواسطة OlaOsman

بلاش حد يجيب لمراته سواق لعربيتها.. البديل هنا هو المواصلات العامة او التكاسي طبعا مش هانتكلم عن البهدلة اللي بتحصل فيها.. و المتسبب فيها برضه بعض الرجالة بقلة أدبهم و تحرشاتهم و استقواهم على الستات في دفع الأجرة و الى آخره.. فتلاقي ان الرجالة همه اللي اضطروا الستات يسوقوا في الشوارع و برضه الرجالة همه اللي جايين يشتكوا.

طبعا انا مش باقول ان كل راجل ملزم انه يجيب لمراته سواق.. بس طالما جابت عربية و بتسوق.. يبقى نستحمل بعض.. و كلنا في مركب واحدة اصلا.

فعلا ده بيحصل يا علا وفعلا ماينفعش ان الستات ماتسوقش بس علي الاقل تبقي سوقاتهم مظبوطه والله ممكن يتعملو من اول وجديد :)