منقول : تهشم سيارة مواطن حاول تجاوز موكب السفيرة الأمريكية!

**kimo-nubira** · 25-07-2010 05:01 PM

انا حصلي موقف شبيه لده بس مع الفارق ان الشخصيه مصريه ومحترمه

كنت مره ماشي في شارع شهاب في المهندسين وفي الصيف والشارع ده للي ميعرفوش

زحمه جدا واخره عربيتين جمب بعض وسعات اللي راكنتين صف تاني بيخلي الطيرق حاره واحده فقط

معايا سعتها عربيه فيات 131 وكان راكب واحد صاحبي جمبي المهم الطريق كان واقف اصلا وكان فيه عربيه

شيروكي وريا راكب فيها اتنين ( مش متفيمه ولا عليها اي اعلام ) لاقيته علق ايده علي الكلاكس والايد التانيه

علي النور والطريق اصلا واقف بيتحرك متر ويقف تاني وهاكذا وهو فضل علي الوضع ده شويه كتير في اول فرصه

اخدت يمين الطريق وقولتله عدي وريني هاتعمل ايه المهم راح الاخ المحترم اللي راكب جمب السواق شتمني

لاحظو اني كنت في اليمين عايز ارجع بقي ورا الشيروكي علشان اجيبه واضربه وانا باخد الشمال تاني لاقيت عربيه

مرسيدس سوده عايزه تلزق ورا الشيروكي وانا كمان عايز اجيبه قعدت ازنق علي المرسيدس اووووي علشان ادخل قبله

لحد مكان الراجل هايلبس في الرصيف وفجأه لاقيت الاخ اللي شتمني طلع بنص جسمه من ازاز الشيروكي وموجه ناحيتي

ســــــلاح في نفس الوقت ده كان لاقيت صاحبي اللي جمبي قالي بص علي المرسيدس بسرعه ببص لاقيت الازاز اللي ورا

اتفتح ولاقيت عمرو موسي بيبصلي ومبتسم اه والله الراجل ده انا بحبه جدا قولتله اتفضل حضرتك يافندم طريق السلامه

وسابني ومشي ولا اي حاجه حصلت علشان ده راجل محترم وبجد كان نفسي يمسك مصر في يوم من الايام

**Kazzaz** · 25-07-2010 05:10 PM

ما طبيعي ده اللي يحصلوا يعني ... امال الامن موجود لييه ؟ ما ممكن كانوا فاكرين ان العربيه مفخخه مثلا

**damasry** · 25-07-2010 05:27 PM

ياااااااه

انا حصلى نفس الموقف ده كذا مرة

مرة فيهم مع موكب الريس ومرة تانية مع موكب حرم الرئيس.

اول مرة كنت رايح انا ووالدىاستقبل اختى اللى جايا من السفر وماشى فى صلاح سالم ومرة واحدة لقيت الطريق فاضى من حواليا وانا مش عارف ليه ومرة واحدة عند بوابة مطار الماظة اللى بعد مستشفى الجلاء (اللى بيمشى من هناك عارف ان البوابة دى مش بتتفتح خاااالص) لقيت موكب الريس طالع وماشى جنبى.

طبعا طلعوا وداسوا بنزين وطلعو ا كوبرى المطار عشان كان رايح يستقبل رئيس اجنبى واحنا كملنا عادى خالص ولما رحنا المطار واستقبلنا اختى لقيتهم قافلين مخارج المطار ومحدش يخرج غير لما الريس يمشى وفضلنا كده بتاع ساعة والعربيات ازدحمت جدا.

تفسيرى اننا عدينا من اخر نقطة بتقفل الطريق قبل الرئيس (مش عارف ازاى) ولو كنا معدناش كان زمانا مقفول علينا الطريق ورا زى الناس اللى اكيد الطريق كان مقفول عليهم، يعنى لما كنا ماشيين فى الطريق كان فاضى جدا عشان محدش يتوقع ان عربية تمشى جنب الموكب ولما رحنا المطار وانضمينا لبقية الشب اتطبق علينا نفس الاجراءات اللى بتتطبق يوميا فى حالة مرور المواكبالرسمية.

الظريف بقى ان محدش علق خالص او رخم لما الموكب عدى من جنبنا بس اكيد اكيد الناس اللى مسئولة عن قفل الطريق اتجازت اوووى.

**Dr.Mostafa Anwar** · 25-07-2010 05:28 PM

طبعا الناس كلها هتدخل تلعن سلسفين الجكومه وامريكا لكن انا عندى رأى مختلف شويه
وهو ان المواطن هو اللى غلطان

**تامر.محمد** · 25-07-2010 06:08 PM

فعلا
عسل اسود

**brown-eyes** · 25-07-2010 06:28 PM

بصراحة الردود مخيبة للامال احنا وصلنا لدرجة اننا بقينا نقول علي الغلط صح

**Hossam_Hassan** · 25-07-2010 06:39 PM

كان هيحصلى نفس الموقف بس مع موكب باشا فى المرور ممشى مع عربيته اللى الحكومة شارياها من الضرائب اللى بادفعها موتوسيكل لزوم الوجاهة و علشان يفتحولوا الطريق، اساسا مكنتش واخد بالى علشان شكله مش موكب اساسا، العربية كانت بيجو تقريبا، المهم الطريق واسع، جيت اتخطى من الشمال لقيت اللى راكب الموتسيكل بيحدف عليا و بيشاور علشان اهدى، مش عارف ايه خلانى اخد الموضوع بضحك، ساعتها كان فعلا منظر مضحك و محزن، بجد صعب عليا البتاع المريض اللى مستعجل انه يعيش الدور، المهم طلعت فى دماغى و رحت هديت و فضلت ماشى وراه و شغلت الانتظار و بيب بيب زى ما اكون بازف عروسة و فجأة لقيت شاب روش فى عربية ملاكى جنبى تقريبا شاف الموقف و اشتغل هو كمان بيب بيب و شغل الانتظار و فضلنا زافين الباشا من اول وزارة الزراعة لغاية مرور الدقى بالرغم من ان امين الشرطة اللى على الموتوسيكل و سعلنا علشان نغور، بس بجد كأننا مخططين ليها و فضلنا نغلس عليه، و لما ركن و عديت من جنبه بصيتله بقرف و مشيت، خلى نقصه ينقح عليه زيادة.

**Ahmed Samy** · 25-07-2010 06:55 PM

المشاركة الأصلية كتبت بواسطة brown-eyes

بصراحة الردود مخيبة للامال احنا وصلنا لدرجة اننا بقينا نقول علي الغلط صح

لا يا صاحبي

ده رد واقعي من شخص عرف انه ذليل في بلد بلا كرامه

و بيني و بينك تعبت من محاولة رفع راسي وسط الطين اللي عايشين فيه ده

خلاص بقى عرفت ان هنا لا قيمة و لا تمن

ان شاء الله ربنا يكرمنى و أعيش حر في بلد تانية مافيهاش مواكب

بس مدام أنا هنا .....يبقى لما تشوف موكب ماتتنحش علشان ماتطلعش على الرصيف أو تنضرب طلقة زي أي كلب .

اوعى تيجي

اوعى تفكر تيجي

الأمال اللي بتقول ان الردود مخيبة ليها دي أحلام

لا أنا و لا أنت و لا أولادنا هايشوفوا البلد دي زي ما نتا عايز يمكن بعدهم ...و يمكن أكتر من كده

بس احنا و هم ...لأ

يبقى نعيش بقى

-

-

الموضوع: منقول : تهشم سيارة مواطن حاول تجاوز موكب السفيرة الأمريكية!

LinkBack

أدوات الموضوع

عرض

-

-

-

-

-

-

-

-

المواضيع المتشابهه

موكب الرئيس يتحدي موكب الـ 30عام

قوائم مقاطعة المنتجات الأمريكية و الصهيونية ( منقول للإفادة )

شرح علمى مبسط جداً لأزمة المال الأمريكية (منقول)

الكلمات الدلالية لهذا الموضوع

المفضلات

المفضلات

ضوابط المشاركة