هل يوجد علاقة بين سير الكاتينة و تسريب الزيت؟

سلام عليكم,

أصدقائي في نايل موتورز, كل عام و أنتم بخير بمناسبة شهر رمضان الكريم أعاده الله عليكم بالخير و العافية.

من حوالي أسبوعين غيرت سير الكاتينة و بلية الشداد و سير الدينامو.
بعدها بدأت الاحظ انخفاض مستوي زيت الموتور مع وجود بقعة زيت تحت العربية بعد الركنة لفترة. علما بأن عندي ترشيح (كتير شوية) من الكارتيرة بس عمره ما وصل لمرحلة بقعة زيت تحت العربية أبدا و لا كنت بلاحظ انخفاض في مستوي الزيت حتي ميعاد تغييره.

أنا رحت فحصت طبة الكارتيرة و لقيتها محكمة الغلق. و ما زال بقعة الزيت بتتكون تحت العربية و اضطريت أزود زيت مرتين و بكمية ليست صغيرة.

مفيش جديد في العربية باستثناء تغيير السيور و البلية. هل يوجد علاقة بين تسريب الزيت و تغيير السيور و البلية؟
اذا كان لا يوجد علاقة, هل يزيد فجأه التسريب من الكارتيرة نتيجة الترشيح الموجود بها من فترة؟
هل يوجد مكان اخر ممكن يكون السبب في التسريب؟؟

العربية ابيزا 98 عاملة 140ألف كم. بستعمل زيت شل الاصفر (5000)

شكرا.
أحمد

مفيش علاقة بين السير و التسريب

MMamdouh

أفحص المنطقه أسفل حافظة سير الكاتينه وشوفها ملوثه بالزيت ولا لا

جايز علشان أنت غيرت الشداد وقت تغيير السير

يكون الميكانيكى شادد السير على الآخر

وبالتالى بوظلك سيل كرنك أو سيل كامه

اقتباس:

---

المشاركة الأصلية كتبت بواسطة mmamdouh

مفيش علاقة بين السير و التسريب

mmamdouh

---

شكرا جزيلا لردك. :)

اقتباس:

---

المشاركة الأصلية كتبت بواسطة samirayad

أفحص المنطقه أسفل حافظة سير الكاتينه وشوفها ملوثه بالزيت ولا لا

جايز علشان أنت غيرت الشداد وقت تغيير السير

يكون الميكانيكى شادد السير على الآخر

وبالتالى بوظلك سيل كرنك أو سيل كامه

---

معلش واحدة واحدة علشان أفهم. :)

دلوقتي حضرتك بتقول انه الميكانيكي شد السير علي الاخر و دة سبب ضرر لأويلسيل
الكرنك أو أويلسيل كامة و دول غير أويلسيل الكارتيرة علي ما أنا فاهم.

مبدئيا هو فعلا في زيت أسفل حافظة السير و دة جديد من بعد ما غيرت السيور.

أنا معرفش أويلسيل الكرنك دة فين. و كمان مش فاهم ايه علاقة الكامة بالمنطقة السفلي اللي بنتكلم عليها. أنا أعرف أن الكامة دي فوق البساتم. و كمان مش عارف فين أويلسيل الكامة دة. إلا لو كان قصد حضرتك أويلسيل غطاء المحرك (أو غطاء التاكيهات) زي ما بيقولوا.
و أخيرا هل كدة لازم أروح أقلل شد السير ولا هو دة الصح؟

شكرا لاهتمامك.
أحمد

اقتباس:

---

و دول غير أويلسيل الكارتيرة علي ما أنا فاهم

---

فيه فرق بين الأويل سيل والجوان

والكارتيره ملهاش أويل سيل

ليها جوان فقط

اقتباس:

---

مبدئيا هو فعلا في زيت أسفل حافظة السير و دة جديد من بعد ما غيرت السيور.

---

يبقى توقعى صح

وحدث المراد

والبيه بوظلك سيل الكرنك أو الكامه وممكن يكونوا الأثنين باظوا من كتر الشد

اقتباس:

---

أنا معرفش أويلسيل الكرنك دة فين. و كمان مش فاهم ايه علاقة الكامة بالمنطقة السفلي اللي بنتكلم عليها.

---

فيه على نهاية عمود الكرنك أويل سيل فى المنطقه دى

أسمه أويل سيل أمامى للكرنك

بيمنع خروج الزيت مع دوران الكرنك لبره المكنه

ونفس القصه على عمود الكامه من فوق مع تقسيمة السير

اقتباس:

---

إلا لو كان قصد حضرتك أويلسيل غطاء المحرك (أو غطاء التاكيهات) زي ما بيقولوا.

---

برضه أنت مش واخد بالك من الفرق بين الجوان والسيل

وغطاء التاكيهات بيركبله جوان مش أويل سيل

اقتباس:

---

و أخيرا هل كدة لازم أروح أقلل شد السير ولا هو دة الصح؟

---

طبعا لازم تعدل شد السير بالشداد

وتشوف شفة السيل باظت ولا لا

وغالبا باظت وحتحتاج سيل أو أكثر

للكرنك والكامه

يعنى فيلم تانى من جديد

جزاك الله كل خير يا استاذ سمير. أنا كدة بدأت أتخيل.
و غالبا كدة هو أويلسيل الكرنك اللي ضرب علشان الزيت موجود بكثرة أسفل علبة التقسيمة. و مفيش زيت في الجزء العلوي عند أويلسيل الكامة.

انا افتكرت حاجة كمان . وقت أما كان بيركب البلية, الميكانيكي معرفش يطلعها علشان كان فيه عمود طويل طالع من وسطها لحد جزء من جسم العربية داخل غرفة المحرك, و البلية ماكانتش عايزة تخرج علشان المكان ضيق, فهو جاب زرداية و قعد يلف العمود بيها لحد ما دخل جوه الموتور شوية و عرف يخرج البلية القديمة.
أنا مش عارف هل اللي عمله دة له علاقة بالأويلسيل ولا لأ بس انا ما كنتش مستريح و هو بيعمل كدة.

السؤال بقي هو هيفك ايه بالضبط علشان يغير الأويلسيلات دي؟
هل أروح لحد تاني أضمن و لا دي مش صعبة و ممكن يعملها بسهولة؟

شكرا جزيلا مرة تانية.

أحمد

اقتباس:

---

السؤال بقي هو هيفك ايه بالضبط علشان يغير الأويلسيلات دي؟

---

للأسف الشغل المره دى حيبقى أكتر من تغيير سير الكاتينه فى حد ذاته

لأنه حيضطر يطلع السيل التالف ويركب غيره بعد مايحل ترس التقسيمه

بتاع الكرنك أو بتاع الكاتينه ( حسب السيل التالف )

اقتباس:

---

هل أروح لحد تاني أضمن و لا دي مش صعبة و ممكن يعملها بسهولة؟

---

أفضل لك تروح لميكانيكى تانى وتشرحله الوضع

وتفهمه الخطأ اللى حصل من الميكانيكى الأولانى

ومفيش مانع تمر على الميكانيكى الأولانى ( اللى غير السير )

وتفهمه أنه ماينفعش يشتغل ميكانيكى بالزوق برضه

أنا رحت لميكانيكي كويس و فتح علبة السير و بص شوية و العربية دايرة, بس قاللي مش عارف أحدد التسريب منين علشان فيه زيت كتير جدا من تحت. و طلب مني أغسل الموتور كويس من تحت و بعدين أرجعله.

هبقي أغسلها و أرجعله ان شاء الله.

شكرا جزيلا مرة تانية لاهتمامك يا م. سمير.

يا ريت لو تفهمنا بعد ما تخلص حصل ايه

أنا غسلت العربية كويس من تحت علشان اثار الزيت المتراكم يروح و الميكانيكي يقدر بعد كده يحدد مكان التسريب.
ان شاء الله لما أروح للميكانيكي هبلغكوا بالتطورات.
ادعولي :)

أحمد

سير الكاتينة ملوش اى علاقة بسريب الزيت من الاويلسيل

MMamdouh

اقتباس:

---

المشاركة الأصلية كتبت بواسطة mmamdouh

سير الكاتينة ملوش اى علاقة بسريب الزيت من الاويلسيل

mmamdouh

---

أفهم من مشاركة حضرتك أن الميكانيكي ما عملش حاجة غلط و هو بيركب السير و البلية. طيب ايه تفسير أن تسريب الزيت بدأ يظهر بشدة بعد تغيير السير و البلية مباشرة؟أنا ممكن أصدق أن دة العمر الافتراضي بتاع الأويلسيل بس صعب أصدق أن عمره الافتراضي ينتهي بعد اما أرجع من عند الميكانيكي مباشرة :)أحمد

بص... تغيير سير الكاتينة بطبيعتة ملوش علاقة لا من قريب ولا من بعيد بالاويل سيل

انت عندك احتمال من الاتنين:

اما ان حظك و نصيبك ان الاويل سيل تلف لما غيرت السير و دى ساعات بتحصل

و اما و الميكانيكى بيغير السير غلط فى التركيب مثلا و فلت منة مفك او مفتاح و دخل فى الاويل سيل و تلفة... بالتالى دى تبقى غلطة فى طريقة شغل الميكانيكى مش فى الشغلة نفسها

عموما دة حيبان لما تفك و تكشف على الاويل سيل... لو كان الكشف الظاهرى ليه بيوضح انة سليم يبقى حطك و نصيبك جة كدة... اما لو كان الاويل سيل فيه اثار تشوة او خبطات او اى عدم انتظام فى تكوينة مما يدل على انة اتخبط او اتعامل بعنف يبقى دى مشكلة صنايعى

MMamdouh

اقتباس:

---

المشاركة الأصلية كتبت بواسطة mmamdouh

بص... تغيير سير الكاتينة بطبيعتة ملوش علاقة لا من قريب ولا من بعيد بالاويل سيل

انت عندك احتمال من الاتنين:

اما ان حظك و نصيبك ان الاويل سيل تلف لما غيرت السير و دى ساعات بتحصل

و اما و الميكانيكى بيغير السير غلط فى التركيب مثلا و فلت منة مفك او مفتاح و دخل فى الاويل سيل و تلفة... بالتالى دى تبقى غلطة فى طريقة شغل الميكانيكى مش فى الشغلة نفسها

عموما دة حيبان لما تفك و تكشف على الاويل سيل... لو كان الكشف الظاهرى ليه بيوضح انة سليم يبقى حطك و نصيبك جة كدة... اما لو كان الاويل سيل فيه اثار تشوة او خبطات او اى عدم انتظام فى تكوينة مما يدل على انة اتخبط او اتعامل بعنف يبقى دى مشكلة صنايعى

mmamdouh

---

لك جزيل الشكر يا فندم :)

عموما لما أكشف عليها هبقي أبلغكم بالسبب الفعلي للتسريب ان شاء الله.

أحمد

كلنا متابعين علشان انا عندى ترشيح من علبة التقسيمة الى فوق واعتقد انه اويسل ترس الكامة هو لازم نفك الكتينة علشان اغيرة ام الترشيح الى فى العلبة دى منين
متابع يا اساتذة الانوس

بغض النظر عن علاقة تغيير السير بالتسريب لأنه ملهوش علاقة فعلا

لكن أنا شفت فيديوهات لبعض السيارات التسريب كان من البكر اللى بيركب عليه سير الكاتينة بكرة الكاتينة يعنى