الموضوع: اول زيارة للتوكيل بدون حجز

انا هاعتبر دى اول مشاركة لى بعد ما جبت اللوجان
هى عاملة دلوقتى 1600 KM عموما بعد ما سمعت عن خبرة كتير منكو مع التوكيل فلت اجرب النهاردة اروح و اشوف و بالمرة اظبط التكيف لانو بيخلى العربية تنتش و تقطع و كمان ضعيف. كمان فى عضة فى الفتيس على الغيار التانى و بعد ما واحد ابن حلال كسرلى غطا المرايا اليمين اسال اذا كان ليها صرفة.
عموما عشان سحبت الساعة 8:30 على توكيل العبور اللى وصلتلوا بسهولة عن طريق العلامات اللى حطينها فى كل حتة و شفت كمية عربيات لوجان ذيرو لسة بلزقتها مشوفتهاش فى حياتى لدرجة انى افتكرت انهم هايبتدوا يوزعوها ببلاش .
عموما اول ما دخلت فى واحد ساعدنى اركن و طلب الاسم و اخد رقم العربية و قالى يا ريت تتفضل على الريسبشن و سيبلنا العربية مفتوحة و عشان نكيسها - الحقيقة انا مفهمتش نكيسها دى فا قفلت العربية و رحت الريسبشن.
قابلونى فى الرسبشن باول كلمة هو الحجز باسم مين؟؟؟ !!!!
قلتلوا للاسف انا مش عامل حجز. بس رد على و قال لن عندهم زحمة فممكن ارتاح و هايرد على.
استنيت شوية و جالى نفس الموظف و قالى للاسف مش هانقدر نعمل غير check بس على العربية عشان مفيش حجز و عشان مجيتى. انا طبعا كنت حاسس ان ال check ده هايبصوا على المية و الزيت و لمض التابلوه و كام حاجة كده و خلاص فا قلتلوا لا مش عايز تعمل تشيك العربية لسة عاملة 1600 KM بس اظبطولى التكيف. قالى اوك بس التكيف و بس. المهم جه شيك على العربية و كتب فى الورقة ( التكيف ضعيف و الكمبرسور بيشتغل و يفصل) و قالى ساعتين و تكون العربية جاهزة المهم انو كان بيتكلم باحترام فا معرفتش ارد علية و لا اقوله على باقى الحاجات و قلت خليها للخمس الاف.
استنيت فى waiting lounge WIFI و قالولى الشاى ضيافة اى مشروب تانى موجود بس تدفع تمنه و كانت اسعار معقولة جدا.
المهم انو بعد ساعة بالظبط ندهوا على و قالولى العربية خلصت.
جابولى العربية نظيفة جدا من بره على عكس ما اديتهالهوم. و جربلى التكييف لاقيتو مش بيسقع اوى و قالى لسه هايتحسن مع الوقت و الجو النهارده حر ذياده فمش هاتحس بيه
المهم انا خفت لا يكونوا ضحكوا على و خدو العربية يغسلوها و بس. ركبت العربية قلت اجرب هاتقطع؟ لقيتها احسن من الاول مافيش تقطيع بس سحبها ضعيف.
المهم شكرت الباشمهدس اللى كان اسمو خالد و حاولت اديلوا اى حاجة على سبيل الشكر بس رفض تماما.
و تقيمى للتوكيل انو مش بطال و لو كنت عامل حجز كانوا خدمونى احسن
طولت بس حبيت اشاركم اللى حصل معايا ذى ما انتو شاركتونى كل خبراتكم لحد ما جبت اللوجان.
اعتذر للاطالة.