الموضوع: مشاكل كتير بالعربية محتاج نصايحكم ( نصر 128 موديل 1978 )

المشاركة الأصلية كتبت بواسطة refath

السلام عليكم ورحمة الله وبركاته
انا لسه شارى العربية من حوالى شهرين وعملت فيها شوية اصلاحات وهى :-
تم تغيير البوجيهات وسير الدينامو وسير الكاتينة وفلتر الهواء وفلتر البنزين
وكمان غيرت العفشة الامامية بالكامل ( استيراد ) وتم تغيير سلك الدبرياج وبارات الدريكسيون والديسك والاسطوانة والبلية
تم تغيير قلب الفتيس بالكامل

ألف مبروك على العربية وربنا يبارك ليك فيها

لكن ظهرت مشاكل تانية فى العربية وعايز نصايحكم وهى :-
1. صعوبة التدوير صباحا ( بتدور بس بتبطل لوحدها ولو كبستلها بنزين بتشتغل عادى والكلام ده بيحصل الصبح فقط )
أعتقد ممكن تكون المشكلة في تنظيف بكات الكربراتير .. أو في الكربراتير بصفة عامة .. واستبعد طقم الكهربا لأنك بتقول أنك مغيره .. إلا إذا كنت مغيرتش الأبلاتين والكوندنسر

2. صوت صفارة جامدة عند التدوير زى ما يكون فى سير بيزيق ( روحت للكهربائى قالى بلى الدينامو سليم لانه سألنى الصفارة دى بتبقى طول اليوم ولا الصبح فقط قلتله الصبح فقط ولما العربية بتسخن مبسمعش الصفارة طول اليوم )
صوت الصفارة ده ممكن يكون ليه أكتر من سبب .. ممكن يكون بلية الكاتينة أو أي بلية تانية .. ولازم تتبع الصوت طالع منين بالظبط لتحديد السبب .

3. صوت صفارة جامدة عند الضغط على الفرامل
تيل الفرامل وحش .. ومعظم اللي في السوق كدة لسوء الخامات المستخدمة .. وطالما العربية بتقفش مع الفرامل يبقى مفيش مشكلة كبيرة .. ويمكن التعايش معها بتنظيف الطنابير وصنفرة التيل كل فترة .. بس الأصوات حترجع تاني بعد شوية

4. الفرامل بتمسك فى الحنب الشمال فقط وبتعرض منى لو ماشى على سرعات عالية ودوست فرامل جامد
القصة دي خطر جداً ولازم تشوفها في أقرب فرصة .. والسبب فيها أن الماستر الفرعي في الجانب الأيمن فيه مشكلة ولازم يتغير أو يتركب ليه طقم إصلاح .

5. بسمع صوت طقة جامدة من قدام عند الفرملة ( بتاع الزوايا قالى كاوتشات الميزان عايزة تتغير وافحص جلب المقصات وقاعدة الموتور وقاعدة الفتيس )
ده احتمال وارد .. واحتمال تاني بص على الركب في الحوض ممكن تكون عاوزة لحام .. وممكن برضه المشكلة تكون في قواعد الموتور أو الشداد .

6. العربية بتحدف يمين وانا ماشى بس بعد فترة من ترك الدريسكيون ( ملحوظة العجلة اليمين مرحلة للخارج حوالى 1 سم تم عمل ضبط زوايا اكثر من مرة ويقولولى كل 128 كده المهم الزوايا تكون مظبوطة )
علشان تخلص من المشكلة دي بشكل نهائي .. العربية يتعمل ليها زرجينة علشان تظبط المقاسات من فوق ومن تحت في الحوض .. وطبعاً مش كل ال128 كدة .

7. الموتور صوته عالى جدا و ظهور رجة فى الدريكسيون اثناء التدوير صباحا
صوت الموتور العالي ده مع المشي وبعد ما العربية بتسخن ولا في المجمل .. والرجة اللي في الدركسيون دي سببها أن العمود الواصل بين الدركسيون وعلبة الدركسيون ومن ضمنها القطمة مش محكمة كويس .. وكمان تظبيط كهرباء السيارة بيفرق في الرجة دي وكمان الصوت .

8. الفتيس بيعلق ساعات مع الاول والثالث ومع المرشيدير والرابع بيبت بصعوبة شوية وكمان الفتيس بيتحرك لما ارفع رجلى من على دواسة البنزين او الدبرياج وهى على اى غيار وخصوصا الثانى
قصد حضرتك عصاية الفتيس مش الفتيس نفسه .. ودي عاوزة تغيير لـ (معلقة) الفتيس .. حتظبط معاك الحارات بتاعة الغيارات وكمان الهزة اللي في العصاية .. وبالمرة أعمل حشو لعصاية الفتيس للزيادة في الإحكام للعصاية

9. ساعات بشم ريحة بنزين ومرة واحدة نتشت جامد منى وانا ماشى على التالت والرابع
أعتقد أن دي كلها مشاكل في الكربراتير .. سواء تسريب منه أو تسريب من الخراطيم الواصلة ليه .. والنتشه دي من الكهربا

10. صوت من الشكمان شبه الطلقات لما انقل على الغيار الثالث واكبس بنزين
الصوت ده يطلق عليه مجازاً "مدافع" وده سببه أن فيه بوجية قاطع ومحتاج تشوف المشكلة فين بالظبط سواء تركب حاجة اسمها كراسي في مكان تركيب البوجيهات أو الموتور نفسه مش مظبوط .

11. الدريكسون بيرعش جامد مع السرعات العالية عند 80 كم بالتحديد وكمان لما بعدى 90 كم العربية مبتبقاش متزنه يعنى قالقيها بتتمرجح يمين وشمال بس وهى ماشية فى خط مستقيم
رعشة الدركسيون دي سببها الترصيص .. والمرجحة يمين وشمال دي ممكن تكون من الميزان أو المساعدين مش كويسة.

انا عارف انى طولت اوى عليكم بس اعذرونى
منتظر نصائحكم

معلش كنت عاوز أسأل حضرتك .. هل دي أول عربية ليك .. ومدى خبرتك في العربيات أيه؟! وأنت اشتريت العربية دي ولا حد اشترهالك .

نصيحة أخوية أبعد عن طقم الصنايعية اللي بتتعامل معاهم لأنهم شكلهم مش بيفهموا كويس .. حاول تسأل عن ناس تانية يكونوا أحسن من كدة .

العربية أعتقد أنها محتاجة مصاريف شوية .. بس ده النصيب .. حاول تظبط فيها واحدة واحدة لحد ما تظبط كلها إن شاء الله .

الصوت لو طالع من ناحية الدينامو .. ممكن يكون طالع برضه من ناحية بلية الكاتينة .. لأن الاتنين جنب بعض .. بمعنى أخر لازم ودن تكون خبيرة وتعرف الصوت منين بالظبط .

الزرجينة تعملها عند السمكري .. بس يستحسن أنه يكون مشهود ليه بالكفاءة .. علشان الشغل يطلع مظبوط .. والزرجينة دي علشان تتعمل صح وبالأخص من تحت .. لازم الموتور يتحل .. والسمكري يظبط المقاس من فوق ومن تحت .. بس مش دي المشكلة الأهم دلوقتي ومعتقدتش أن ده وقتها .

بتوع الزوايا لازم تقول ليهم عاوز أرصص العجل (والعجل الأمامي هو المهم).. لأن منهم مبيسألش على أساس أن الزبون فاهم هو عاوز أيه .. وعاوزك برضه تشوف الكاوتش أخباره أيه .. ممكن يكون وحش وهو اللي مسبب المشكلة دي .


أنا رأيي بالنسبة لمشكلة حضرتك .. أنك ترتب الأولويات .. وأول حاجة تعملها تشوف موضوع الفرامل اللي بتمسك في ناحية والتانية مبتمسكش .. لأن دي أهم حاجة .. ويا ريت فوراً


بعد كدة خش على تظبيط كهربا الموتور وظبط الكربراتير .. ولو حضرتك لسه بتسوق جديد .. سيب بقية المشاكل لوقت تاني لحد ما تبقى متمرس في السواقة شوية (سوري في اللفظ لحد ما تروح غشومية تعلم السواقة) وبعدين تعمل المشاكل اللي فيها بالتدريج وعلشان كمان متبقاش المصاريف كتيرة ومرة واحدة .

الشكر لله .. وبالتوفيق إن شاء الله